ហ៊ុន ម៉ានី ទៅប្រជុំនៅយួន ដើម្បីរឹតចំណងមិត្តភាពយុវជន វៀតណាម-ឡាវ-កម្ពុជា
- ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី០៩ ធ្នូ ២០១៤
- កែប្រែចុងក្រោយ: December 10, 2014
- ប្រធានបទ: ទំពាំង
- អត្ថបទ: មានបញ្ហា?
- មតិ-យោបល់
-
មិត្តភាពចាក់ទឹកមិនលេច រវាងប្រទេសជាប់ខាងទាំងបី នឹងស្ថិតស្ថេរជានិច្ចនិរន្ដរ ចិរកាលរាប់ម៉ឺនឆ្នាំតទៅ។ ព្រោះបើរាប់ចាប់តាំងពីបក្សកុម្មុយនីសឥណ្ឌូចិន ត្រូវបានបង្កើតនៅឆ្នាំ១៩៣០ នោះមក សម្ព័នភាពនិងអត្ថន័យរបស់វាមកដល់ថ្ងៃនេះ នៅតែមានសភាពផ្អែមល្អែម មិនខុសពីទឹកឃ្មុំខែចែត្រប៉ុន្មានឡើយ។ ព្រឹត្តិការណ៍កំពុងចាក់ឬសបន្តទៀត ទៅក្នុងយុវជនរវាងប្រទេសទាំងបី នៅក្នុងសន្និសីទមួយដែលមានឈ្មោះថា សន្និសីទស្ដីពីសហប្រតិបត្តិការយុវជន វៀតណាម-ឡាវ-កម្ពុជា និងកំពុងប្រព្រឹត្តិទៅនៅរដ្ឋធានី ហាណូយ ប្រទេសវៀតណាមចាប់ពីថ្ងៃទី៨ រហូតដល់ថ្ងៃទី១០ ខែធ្នូនេះ។
សន្នីសីទប្រចាំឆ្នាំនេះ កើតចេញពីកិច្ចព្រមព្រៀង ដើម្បីសហប្រតិបត្តិការគ្នាមួយ រវាងសមមិត្ត ង្វៀន ដាក់វិញ (Nguyen Dac Vinh) អគ្គលេខានៃគណកម្មាធិការកណ្ដាល របស់សហព័ន្ធយុវជនកុម្មុយនីសវៀតណាម សមមិត្ត វីឡៃវង្ស ប៊ូដាកខាំ (Vilayvong Bouddakham) អគ្គលេខានៃគណកម្មាធិការកណ្ដាល របស់សហព័ន្ធយុវជនប្រជាមានិតឡាវ និងលោក ហ៊ុន ម៉ានី ប្រធានសហព័ន្ធយុវជនកម្ពុជា។ ប្រទេសទាំងបី នឹងផ្លាស់ប្ដូរវេនគ្នាដើម្បីរៀបចំសន្និសីទនេះ នៅក្នុងប្រទេសផងខ្លួន មួយឆ្នាំម្ដង។ នេះបើតាមការផ្សាយឲ្យដឹង របស់ទីភ្នាក់ងារព័ត៌មានផ្លូវការរបស់វៀតណាម ហៅកាត់ថា VNA។
សន្និសីទនេះ មិនត្រឹមតែបង្កើនចំណេះដឹង ខាង«បដិវត្ត និងប្រវត្តិ»របស់ប្រទេសមួយៗប៉ុណ្ណោះទេ ប៉ុន្តែក៏មានផងដែរ នូវការជំរុញឲ្យការច្របាច់បញ្ចូលគ្នាកាន់តែខ្លាំងឡើង អំពីចំណងមិត្តភាពជាប្រពៃណី និងកិច្ចសហប្រតិបត្តិការ សម្រាប់ការអភិវឌ្ឍន៍ក្នុងប្រទេសទាំងបី។
អ្វីដែលគួរឲ្យកត់សម្គាល់នៅក្នុងសន្នីសីទ ដែលមានចូលរួមពីតំណាងពីប្រទេសទាំងបី ចំនួន៦០នាក់នោះ បានសង្កត់ធ្ងន់ទៅលើ «បទពិសោធន៍ នៅក្នុងការរៀបចំសកម្មភាពស្ម័គ្រចិត្ត សម្រាប់សហគមន៍ និងសង្គម»។ បើតាមទីភ្នាក់ងារព័ត៌មានដដែល បានបញ្ជាក់ទៀតថា សន្នីសីទនេះ បានយល់ព្រមពង្រីកនូវការផ្លាស់ប្ដូរ តំណាងជាន់ខ្ពស់ និងសកម្មភាពវប្បធម៌ រវាងក្រុមយុវជនទាំងសងខាង ក៏ដូចជាបង្កើតឲ្យមានភាពជាដៃគូរ រវាងខេត្តនានា ដែលនៅជាប់នឹងព្រំដែននៃប្រទេសទាំងបី៕