ធ្វើ​ដូច​ម្ដេច ដើម្បី​ឲ្យ​ពស់​ថ្លាន់​យក្ស​លេប​ទាំង​រស់? (vdo)

កម្មវិធី «លេបទាំងរស់ (Eaten Alive)» របស់ទូរទស្សន៍អាមេរិក ឌឺសខូវើរី (Discovery) ត្រូវ​បាន​បញ្ចាំង​នៅ​ថ្ងៃ​យប់​ថ្ងៃ​អាទិត្យ។ តាមពិតទៅ កម្មវិធីបានបង្ហាញដោយខ្លួនឯងថា លោក ផូល រ៉ូសូលី (Paul Rosolie) មិន​ត្រូវ​បាន​សត្វ​ពស់​ថ្លាន់​យក្ស ស៊ីលេបទាំងស្រុង ដូចអ្វីដែលបាននិយាយមុននេះទេ។
ក្រុមការងារថតឯកសារ ចាប់ពស់សែង។ (រូបថតផ្តិតពីវិដេអូ)
Loading...
  • ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី០៩ ធ្នូ ២០១៤
  • កែប្រែចុងក្រោយ: December 10, 2014
  • ប្រធានបទ: ធម្មជាតិ
  • អត្ថបទ: មានបញ្ហា?
  • មតិ-យោបល់

អស់រយៈពេលជាច្រើន​សប្ដាហ៍​មក​ហើយ ដែល​អ្នក​ស្រឡាញ់​បរិស្ថាន ផូល រ៉ូសូលី និង​ទូរទស្សន៍ ឌឹសខូវើរី របស់​អាមេរិក បាន​បង្កើត​នូវ​កម្មវិធី​មួយ ដែល​បាន​បង្អើល​ពិភពលោក មាន​ឈ្មោះ​ថា «លេប​ទាំង​រស់»។ បើ​តាម​ពួកគេ បាន​អះ​អាង​ថា លោក ផូល រ៉ូសូលី ត្រូវ​បាន​លេប​ទាំង​រស់ ដោយ​សត្វ​ពស់​ថ្លាន់​យក្ស​ដ៏​ធំ​មួយក្បាល ដើម្បី​ឆ្លើយ​តប​ទៅ​នឹង​ការ​ស្រាវ​ជ្រាវ​មួយ។ កម្មវិធី​នេះ ត្រូវ​បាន​ក្រុម​អ្នក​ការពារ​ធម្មជាតិ និង​សត្វ​ព្រៃ ធ្វើ​ការ​រិះគន់​ជា​មុន​ហើយ ដោយ​ពួក​គេ​បាន​ចាត់​ទុក​ថា វា​គ្រាន់​តែ​ជា​ការ​ផ្សព្វផ្សាយ ដើម្បី​ប្រជា​ប្រិយ​ភាព​របស់​ខ្លួន​ប៉ុណ្ណោះ។

» វីដេអូ នៅ​ខាង​ក្រោម​បំផុត នៃ​អត្ថបទ។

កម្មវិធី ត្រូវ​បាន​ចាក់​បញ្ចាំង​នៅ​យប់ថ្ងៃអាទិត្យ ទី៧ ខែធ្នូ ឆ្នាំ២០១៤នេះ តែមិនបានឆ្លើយតបទៅនឹងអ្វី ដែល​ទូរទស្សនិកជនបានទន្ទឹងរងចាំ តាមការផ្សព្វផ្សាយពាណិជ្ជកម្មនោះទេ។ នៅក្នុងការផ្សព្វផ្សាយដំបូង បាន​ឲ្យ​ដឹងថា ផូល រ៉ូសូលី ត្រូវបានស៊ីលេបទាំងរស់ ដោយសត្វពស់យក្សមួយ។ តែសត្វពស់ដែលមានបណ្ដោយ​ប្រវែង​​៦ម៉ែត្រ គ្រាន់តែសាកល្បងចង់រួមរឹត តារាទូរទស្សន៍រូបនេះ ដូចទៅនឹងចំណីដែលវាធ្លាប់បានធ្វើរាល់​ដងប៉ុណ្ណោះ។ នៅមុនពេលសត្វពស់ចាប់ផ្ដើមលេបចំណីដ៏ចម្លែកមួយនេះ លោក ផូល ដែលទំនងជាភ័យទ្រាំ​លែងបាននោះ បានស្រែកឲ្យគេជួយរំដោះខ្លួន ចេញពីសត្វពស់។

លោក ផូល រ៉ូសូលី បាននិយាយពន្យល់ នៅក្នុងកម្មវិធីនោះថា៖ «ពស់ថ្លាន់នោះ បានរឹតខ្លួនខ្ញុំ ហើយបានបន្ដឹង​កាន់តែខ្លាំងឡើងៗ រហូតខ្ញុំលែងអាចកម្រើកដៃរបស់ខ្ញុំតទៅទៀត»។ នៅពេលដែលពស់ថ្លាន់ញី បានបើក​មាត់​ដ៏ធំរបស់វា ត្របាក់កាសគ្របក្បាលរបស់លោក អ្នកស្រឡាញ់ធម្មជាតិរូបនេះ បានគិតថា ដៃរបស់​លោក​បានបាក់ទៅហើយ ទើបស្រែកសុំឲ្យក្រុមការងាររបស់ពួកគាត់ ជួយអន្តរាគមន៍។ លោក ផូល បានបញ្ជាក់​ទៀត​ថា បើគ្មានអាវក្រោះពិសេស ដែលបានបង្កើតឡើងសម្រាប់កម្មវិធីនេះទេ ខ្លួនលោកទំនងជាមិនអាចទ្រាំរួច លើស​ពី១០វិនាទីឡើយ។

បើទោះជាទូរទស្សនិកជនសម្ដែងការខឹងសម្បារ តែលោក ផូល រ៉ូសូលី នៅតែបង្ហាញនូវភាពសប្បាយរីករាយ នឹងអ្វីដែលលោកបានធ្វើ។ នៅពេលនេះ លោកបានដឹងយ៉ាងច្បាស់ហើយថា អាវក្រោះការពារពិតជា​អាច​ការពារដងខ្លួនរបស់លោកបាន។ ដូច្នេះលោកបានត្រៀមខ្លួនជាថ្មី ដើម្បីសាកល្បងឲ្យសត្វពស់លេបម្ដងទៀត ជាពិសេសជាមួយនឹងសត្វពស់មួយក្បាលទៀត ដែលក្រុមការងារបានជួបជាលើកទីមួយ និងមានទំហំធំជាង រហូតដល់ទៅ៧,៥ម៉ែត្រ និងមានទំងន់ដល់ទៅ១៣៥គីឡូក្រាម។

សម្រាប់នៅលើបណ្ដាញសង្គមវិញ ប្រតិកម្មរបស់ទូរទស្សនិកជនមានច្រើនហួសពីការស្មាន។ ប៉ុន្តែមិនសូវ​មាន​ប្រតិកម្ម«វិជ្ជមាន»ប៉ុន្មានទេ។ ផ្ទុយទៅវិញ គេសង្កេតឃើញ ប្រតិកម្មទាំងនោះ សម្បូរទៅដោយ​ការ​«ចំអក»​ឡក​ឡឺយយ៉ាងគគ្រឹកគគ្រេង៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...