យុវជន១ចំនួនខ្លាចរអាមិនលេងបុណ្យអ៊ុំទូក ព្រោះនឹកហេតុការណ៍ជាន់គ្នានៅកោះពេជ្រ
- ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី០៥ វិច្ឆិកា ២០១៤
- កែប្រែចុងក្រោយ: November 06, 2014
- ប្រធានបទ: ឧប្បទេវហេតុ
- អត្ថបទ: មានបញ្ហា?
- មតិ-យោបល់
-
«ទោះជាជួលទៀត ក៏មិនទៅដែរ! គ្រាន់តែនឹកឃើញរឿង កាលពីនៅលើកោះពេជ្រ ស្លុតមិនទាន់បាត់ផង!» នេះជាការលើកឡើង របស់យុវតីម្នាក់ ដែលកំពុងជជែកគ្នា ជាមួយមិត្តពីរបីនាក់ផ្សេង រម្លឹកឡើងវិញ នូវហេតុការណ៍នៃបុណ្យអ៊ំទូកកាលពី៣ឆ្នាំមុន។
ការជជែកគ្នាយ៉ាងផុលផុស បន្ទាប់ពីបានឃើញហេតុការណ៍ឧប្បទេវហេតុថ្មីៗនេះ ដែលកើតឡើង នៅក្នុងការបាញ់កាំជ្រួចខុសបច្ចេកទេស បណ្ដាលឲ្យមនុស្សស្លាប់ម្នាក់ និងរបួស៦នាក់ កាលពីយប់ថ្ងៃទី២៩ ខែតុលា ដើម្បីអបអរសាទរខួបទី១០ នៃការឡើងគ្រងរាជ្យសម្បត្តិ របស់ព្រះករុណាសម្ដេចព្រះបរមនាថ នរោត្ដម សីហមុនី និងហេតុការណ៍មួយទៀត គឺការធ្លាក់ដែកពីលើអាគារក្បែររង្វង់មូលនាងគង់ហ៊ីង ដែលបណ្តាលឱ្យស្រ្តីអ្នកដំណើរម្នាក់ ស្លាប់នៅហ្នឹងកន្លែង។
ហេតុការណ៍ ដែលបង្កឱ្យមនុស្សពីរនាក់ស្លាប់ ដោយគ្មានហេតុផលនេះ ពួកគេបានគិតថា ជាប្រផ្នូលមិនសូវល្អ នៅថ្ងៃបុណ្យអុំទូក បណ្ដែតប្រទីប អកអំបុក និងសំពះព្រះខែ ដែលពួកគេគិតថា អាចនឹងកើតមានដោយចៃដន្យ នូវរឿងរ៉ាវដ៏អាក្រក់ និងជាយថាហេតុណាមួយ។
ផ្តើមកិច្ចពិភាក្សាផ្ដើមដំបូង ដោយយុវតីម្នាក់ ដែលបានរួចរស់ជីវិត ពីហេតុការណ៍ផ្អើលរត់ជាន់គ្នាស្លាប់ចំនួន ៣៥៣នាក់ នៅលើស្ពានពេជ្រក្នុងថ្ងៃបុណ្យអុំទូក កាលពីឆ្នាំ២០១០នោះ នាងបានរៀបរាប់ប្រាប់មិត្តភក្តិថា នៅក្នុងថ្ងៃនោះ ខ្លូនបានចាកចេញពីស្ពានពេជ្រ ដែលមនុស្សបានជាន់គ្នាស្លាប់នោះ ប្រមាណជា១៥នាទី បន្ទាប់មានកងសន្តិសុខដេញឱ្យនៅក្រោមស្ពាន។ យុវតីដដែលនេះ បន្តថាខ្លួនមិននឹកស្មានថា មានហេតុការណ៍ជាន់គ្នាស្លាប់នោះទេ ទាល់មានការផ្អើលឈូឆរ ឡានពេទ្យដឹកសាកសព ទើបនាងដឹងមានការជាន់គ្នាស្លាប់។ នាងបន្ថែមថា ហេតុការនេះធ្វើឱ្យនាងតក់ស្លុតខ្លាំងណាស់ រហូតមកដល់ពេលនេះ នាងនៅមិនទាន់ភ្លេចហេតុការណ៍នេះនៅឡើយទេ តែងតែស្រម៉ៃឃើញជានិច្ច។
ចំណែកយុវតីម្នាក់ទៀត ដែលមិនបាននៅក្នុងព្រឹត្តិការណ៍នោះ បានបន្ទរឡើងថា ទោះបីជាបុណ្យមានការប្រគុំតន្រ្តី និងដើកំសាន្តសប្បាយយ៉ាងណាក៏ដោយ ខ្លួននឹងមិនទៅដើរកំសាន្តឡើយ។ នាងនិយាយថា៖ «ការពារប្រសើជាងព្យាបាល»។
ពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ បានរៀបចំឡើងវិញនៅរាជធានីភ្នំពេញ ក្នុងឆ្នាំ២០១៤នេះ បន្ទាប់ពីផ្អាករៀបចំ ចំនួនបីឆ្នាំជាប់ៗគ្នា ដោយសារតែគ្រោះទឹកជំនន់ និងសម្ដេចព្រះនរោត្ដម សីហនុ ចូលទិវង្គត។ ថ្ងៃទីមួយ នៃការប្រារព្ធពិធីបុណ្យជាតិដ៏ធំមួយនេះ មិនសូវមានមនុស្សមើលកកកុញ ដូចឆ្នាំមុនដែលបានរៀបចំឡើយ៕