អស់រយៈពេល១៤ឆ្នាំហើយ ដែល​កញ្ញា ឆោម និមល បាន​ចេញ​ពី​ប្រទេស​កម្ពុជា ទៅ​រស់​នៅ​សហរដ្ឋ​អាមេរិក។ ប៉ុន្តែ​​ទើប​តែ​កាល​ពី​ថ្ងៃ​ទី២២ តុលា ២០១៤​ថ្មីៗ​នេះ​ទេ​ ដែល​នាង​បាន​ទទួល​សញ្ជាតិ​អាមេរិក​ជា​ផ្លូវ​ការ។ កម្មវិធី​ប្រគល់​​សញ្ជាតិ​ដល់​តារា​ចម្រៀង​រ៉ុក​រូប​នេះ ធ្វើ​ឡើង​នៅ​មជ្ឈមណ្ឌល​សន្និបាត នៃ​ទីក្រុង Los Angeles រដ្ឋ California សហរដ្ឋ​​អាមេរិក។

តាម​រយៈ​បណ្តាញ​សង្គម​ហ្វេសប៊ុក​របស់​នាង សមាជិក​របស់​ក្រុមចម្រៀង Dengue Fever ដដែល​នេះ បាន សរសេរ​សារ ទាំង​អារម្មណ៍​រំភើប​រីក​រាយ​ថា៖ «ខ្ញុំ​បាន​រង់​ចាំ​ថ្ងៃ​នេះ អស់​រយៈ​ពេល​១៤ឆ្នាំ​ហើយ។ ថ្ងៃ​នេះ ខ្ញុំ​ជា ប្រជាជន​អាមេរិក ជា​ថ្ងៃ​ដែល​ខ្ញុំ​សប្បាយ​រីក​រាយ​បំផុត​នៅ​ក្នុង​ជីវិត របស់​ខ្ញុំ (I have been waiting for this day for 14 years. Today I am a U.S. Citizen! One of the happiest days of my life)។»

ជាមូយក្តីរំភើបរីករាយរបស់តារាចម្រៀង ក្រោយពីទទួលបានសញ្ជាតិអាមេរិកពេញសិទ្ធិ ក៏នៅមានមហាជន និងប្រិយមិត្តជាច្រើន ចូលរួមអបអរ នឹងភាពជោគជ័យរបស់នាងផងដែរ។

កញ្ញា ឆោម និមល គឺជាតារា​ចម្រៀងល្បីមួយរូប ក្នុងអំឡុងឆ្នាំ១៩៩៧។ នាងចាប់អាជីពជាអ្នកចម្រៀង ក្រោយ​ពីនាងបានទទួលបានចំណាត់លេខ១ ក្នុងកម្មវិធីប្រឡងចម្រៀងមួយរបស់ស្ថានីយទូរទស្សន៍អប្សារា។ ក្នុង​អំឡុង​​ឆ្នាំ ២០០០ នាងបានចាកចេញទៅរស់នៅសហរដ្ឋអាមេរិក និងបន្ទាប់មក បានក្លាយជាសមាជិកម្នាក់ របស់​ក្រុម​ចម្រៀងមួយដែលមានឈ្មោះថា Dengue Fever ។ នាងធ្លាប់បានមកលេងស្រុកខ្មែរ ចំនួន៣លើកមក​ហើយ។ លើកចុងក្រោយ មកចូលរួមការប្រគំតន្ត្រី ក្នុងមជ្ឈមណ្ឌលតាំងពិព័រណ៍កោះពេជ្រ ដើម្បីរៃអង្គាសប្រាក់​ជួយទៅដល់សមាគមសិល្បៈខ្មែរអមតៈ (Cambodia Living Art) ដែលមានមុខងារក្នុងការជួយ​ថែរក្សាតម្លៃ​សិល្បៈខ្មែរ និងផ្ដល់ឲ្យកូនខ្មែរគ្រប់រូបបានចូលរៀនផ្នែកសិល្បៈ កាលពីថ្ងៃទី១៨ ខែវិច្ឆិកា ២០១១។

នេះជាបទចម្រៀងមួយបទ របស់តារាចម្រៀងស្រីរូបនេះ៖