តន្ត្រីនៃក្តីស្រលាញ់ T-ARA និង SPEED សម្តែងរួមគ្នានៅកម្ពុជា
ការកក្រើកជាថ្មីនៅកម្ពុជា ចំពោះការប្រគុំតន្រ្តីបន្តផ្ទាល់ នៃវត្តមានក្រុមតារាចំរៀងនារី T-ARA និងក្រុមចំរៀងបុរស SPEED របស់ប្រទេសកូរ៉េខាងត្បូង ដែលប្រព្រឹត្តទៅក្នុងមជ្ឈមណ្ឌលសន្និបាតកោះពេជ្រ ថៃ្ងទី១៤ ខែកុម្ភៈ ឆ្នាំ២០១៤ ខាងមុននេះ។ ការប្រគុំតន្ត្រីដែលបានធ្វើចុះថ្ងៃនៃសេចក្តីស្រលាញ់នោះតែម្ដង។
ក្រុមតារាចំរៀងនារី T-ARA របស់កូរ៉េខាងត្បូង មកសម្ដែងការប្រគុំតន្ត្រី នៅកម្ពុជា។ (រូបថត ផ្សាយស្ពត)
ប្រគុំតន្ត្រី - ជាការជូនដំណឹងដ៍អស្ចារ្យ សំរាប់ទស្សនិកជនឬយុវវ័យ អ្នកចូលចិត្តគាំទ្របទចំរៀងជាភាសាកូរ៉េ ដែលទូរទស្សន៍ CTN និង My TV បានរៀបចំការប្រគុំតន្រ្តីពិសេស ជាព្រឹត្តិការណ៍ក្រុមតន្ត្រីបុរសជួបជាមួយក្រុមតន្ត្រីនារីមកចូលរួមសម្តែងរួមគ្នា ដើម្បីបង្កើតបរិយាកាសអោយកាន់តែសប្បាយរីករាយ។
លោក ប៊ែរណាដ អ៊ែនថូនី អគ្គនាយករបស់ទូរទស្សន៍ស៊ីធីអិនបានថ្លែងប្រាប់សារព័ត៌មានក្នុងស្រុកថា៖ «ស្របនឹងកេរ្តិ៍ឈ្មោះរបស់ CTN កំពុងមានប្រជាប្រិយខាងផ្តល់កម្មវិធីកម្សាន្ត យើងនឹងផ្តល់អ្វីមួយដែលកាន់តែពិសេសថែមទៀតនោះដល់ទស្សនិកជនរបស់យើង ក្នុងឱកាសទិវានៃក្តីស្រឡាញ់ខាងមុខនេះ»។ ទាក់ទងព្រឹត្តិការណ៍នេះដែរ លោកអ៊ែនធូនី បានអះអាងថា ដោយសារតែជាការប្រគំតន្ត្រីប៉ះចំថ្ងៃបុណ្យនៃក្តីស្រឡាញ់ ដូច្នេះហើយទើបលោកសម្រេចចិត្តនាំមកទាំងក្រុមបុរស និងក្រុមនារី ។
ចំពោះតម្លៃសំបុត្រចូលទស្សនា គឺចាប់ពី៨ដុល្លារ រហូតដល់១៥ដុល្លារចាប់ពីថ្ងៃទី៩ កុម្ភៈ ២០១៤ នេះតទៅនៅស្ថានីយទូរទស្សន៍ CTN ឫស្សីកែវ និងកោះពេជ្រចំថ្ងៃសម្តែងតែម្តង ។ក្រុមតន្ត្រី SPEED និង T-ARA នឹងសម្តែងនៅលើឆាកមួយដែលមានកៅអីអ្នកទស្សនា៣.០០០នាក់ ក្រោមការឧបត្ថមពីទឹកផ្លែឈើ ZENYA ប្រពន្ធ័ទូរសព្ទ័ចល័ត Mobitel ជាដើម។
ក្រុមចម្រៀងនារីកូរ៉េខាងត្បូង T-ara បង្កើតឡើងក្នុងឆ្នាំ២០០៩ដែលមានអ្នកគាំទ្រជាច្រើន នៅប្រទេសកម្ពុជា។ បទចម្រៀងរបស់ពួកគេភាគច្រើនមានលក្ខណៈក្រមិចក្រមើម ច្រើនជាងសិចស៊ី ដូចជាបទ “Bo Peep Bo Peep”, “Roly Poly”, និង “Lovey Dovey” ជាដើម។ បច្ចុប្បន្នក្រុមចម្រៀងនេះមានសមាជិក ៦នាក់។ ចំនែកឯក្រុមSpeed មានសមាជិកប្រាំពីរនាក់ ដោយបង្កើតឡើងក្នុងឆ្នាំ២០១២ជាមួយបទToo late។
គួររម្លឹកដែរថា បណ្តាញទូរទស្សន៍ CTN និង My TV ធ្លាប់បានអញ្ជើញក្រុមចម្រៀងកូរ៉េជាច្រើនសំរាប់ថៃ្ងឈប់សំរាក ឬថៃ្ងបុណ្យផេ្សងៗ ដូចជា Baby Vox, Shiness, Ukiss, Sistar, Tahiti ...។ល។ ហើយបានទាក់ទាញទស្សនិកជនមិនតិចទេ ក្នុងការមកទស្សនាម្តងៗ៕
សូមទស្សនាវីដេអូចំរៀងមួយ របស់ក្រុមអ្នកចំរៀងស្រី T-ARA ៖
-------------------------------
ដោយ ក. ស៊ន សុខឃៀង (ទំនាក់ទំនង៖ [email protected]) - ភ្នំពេញ ថ្ងៃទី០៧ ខែកុម្ភៈ ឆ្នាំ២០១៤