អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិសេរីភាព ក្នុងការប្រមូលផ្តុំដោយសន្តិវិធី លោក ម៉ៃណា គីអៃ (Maina Kiai) បានអះអាងថា លោករកវិធីយ៉ាងណាដើម្បីដាក់សម្ពាធ អោយរដ្ឋាភិបាលដោះលែង ជនជាប់សង្ស័យទាំង២៣នាក់។

លោក ម៉ៃណា គីអៃ អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិសេរីភាព ក្នុងការប្រមូលផ្តុំ​ដោយ​សន្តិវិធី។ (រូបថត freeassembly.net)

សិទ្ធិមនុស្ស - នៅថ្ងៃទី០៧ ខែកុម្ភៈ ឆ្នាំ២០១៤ នៅសហគមន៍បឹងកក់ អ្នក​រាយការណ៍​ពិសេសអង្គការ​សហប្រជាជាតិ​ទទួលបន្ទុកសិទ្ធិសេរីភាពក្នុងការប្រមូលផ្តុំដោយសន្តិវិធី លោក ម៉ៃណា គីអៃ(Maina Kiai) បានថ្លែងថា «ខ្ញុំមានការ​បារម្ភមែនទែន ចំពោះការចាប់ខ្លួនអ្នកទាំង២៣នាក់។ ចំពោះខ្ញុំក៏ដូចជាផ្នែកផ្សេងទៀតនៅ UN នឹងព្យាយាមធ្វើ​យ៉ាង​ណា ដើម្បីរកសម្ពាធដាក់លើរដ្ឋាភិបាល អោយដោះលែងអ្នកជាប់ឃុំទាំងនោះ។»

ការថ្លែងរបស់អ្នករាយការណ៍ពិសេសរូបនេះ ធ្វើឡើងស្របពេលដែលប្រជាពលរដ្ឋ នៅតំបន់បឹងកក់បានដាក់លិខិត​អន្តរាគមន៍មួយទៅរូបលោកដើម្បីអោយជួយដោះលែងជនជាប់ចោទទាំង២៣នាក់។ អ្នកជាប់ឃុំទាំងនោះ រួមមាន​សកម្មជនការពារសិទ្ធិមនុស្ស២រូប សកម្មជនការពារសិទ្ធិលំនៅឋាន១រូប និងកម្មករ២០នាក់ផ្សេងទៀត អោយមាន​សេរីភាពឡើងវិញ នៅថ្ងៃទី១១ ខែកុម្ភៈខាងមុខនេះ ក្នុងពេលធ្វើសវនាការរបស់សាលាឧទ្ធរណ៍។ និងគោលបំណង​នៃការអន្តរាគមន៍មួយទៀតគឺសូមអោយអន្តរាគមន៍លើរដ្ឋាភិបាលកម្ពុជា បញ្ឈប់ការបិទសិទ្ធិសេរីភាព​ក្នុងការបញ្ចេញ​មតិ និងការជូបជុំគ្នាទាមទារយុត្តិធម៌ផ្សេងៗ របស់ប្រជាពលរដ្ឋព្រមទាំងព្រះសង្ឃផងដែរ។

ចំពោះការមកដល់របស់តំណាងអង្គការសហប្រជាជាតិរូបនេះ មិនមែនមកជាលក្ខណៈផ្លូវការនោះទេ។ តាម​ការ​បញ្ជាក់របស់អ្នករាយការណ៍រូបនេះ ដំណើរមកកម្ពុជាលើកនេះ ដោយសារលោកចង់ដឹង​ពីសភាពការណ៍នៅកម្ពុជា​ថាយ៉ាងដូចម្តេច? សេរីភាព​ក្នុងការបញ្ចេញមតិឥលូវនេះ តើវាយ៉ាងដូចម្ដេចដែរ? លោកក៏នឹងកំពុងធ្វើសំណើរទៅ​រដ្ឋាភិបាលកម្ពុជា ដើម្បីអញ្ជើញលោកជាផ្លូវការ ដើម្បីមានឱកាសជជែកពិភាក្សាពីបញ្ហាសិទ្ធិសេរីភាព​នៅ​កម្ពុជា​ផង​ដែរ។

ទស្សនាវដ្ដីមនោរម្យ.អាំងហ្វូ មិនអាចសុំការបញ្ជាក់ពីមន្ត្រីរដ្ឋាភិបាលណាម្នាក់បាននៅឡើយ ក្នុងរសៀលថ្ងៃទី០៧ ខែកុម្ភះនេះ។ តែកន្លងមករដ្ឋាភិបាលតែងអះអាងថា ការឃាត់ខ្លួននិងបញ្ជូនសំនុំរឿងទៅតុលាការ ដោយសារតែ​អ្នក​ទាំងនោះប្រព្រឹត្តិកំហុស នៅក្នុងបទ«ញុះញង់» បង្កឲ្យមានអំពើហិង្សា។ ការបង្ក្រាបរបស់កងកម្លាំងអាជ្ញាធរ ដែល​គ្រប់គ្រងដោយរដ្ឋាភិបាល ទៅលើការប៉ុនប៉ងជួបជុំនិងការធ្វើបាតុកម្មកន្លងមក គឺសំដៅរក្សាស្ថេរភាព​និង​សណ្ដាប់​ធ្នាប់សាធារណៈសង្គម។

ប្រតិកម្មទៅនឹងការបង្រ្កាប និងការរិតត្បិតសេរីភាពក្នុងការបញ្ចេញមតិ ដោយអាជ្ញាធរគ្រប់គ្រងដោយរដ្ឋាភិបាល​គណបក្សប្រជាជនកម្ពុជាកន្លងមក លោក ម៉ៃណា គីអៃ បានថ្លែងដូច្នេះថា «ខ្ញុំសូមបញ្ជាក់ថាសិទ្ធិក្នុងការជួបជុំ ជាសិទ្ធ​សេរីភាពចំបងជាងគេ ក្នុងចំណោមសិទ្ធិសេរីផ្សេងៗទៀត។ រដ្ឋាភិបាលគ្មានសិទ្ធិយកលេសអ្វី មកសម្លាប់ប្រជាជន​បានទេ ហើយលក្ខខណ្ឌនេះ មិនអាចទទួលយកបានទេនៅ​ក្នុង​ច្បាប់អន្តរជាតិ។ ការប្រើកម្លាំងត្រូវតែមានសមាមាត្រ ហើយត្រូវតែធ្វើដោយសន្តិវិធី រីឯការប្រើកម្លាំងទៀតសោត លុះ​ត្រា​តែក្នុងករណីចាំបាច់បំផុត។»

ក្នុងជំនួបជាមួយអ្នកនៅតំបន់បឹងកក់នោះដែរ លោកម៉ៃណា គីអៃ បានអះអាងថា នៅថ្ងៃទី១១ ខែកុម្ភះខាងមុខ អ្នក​ទាំង​២៣​នាក់ មានសង្ឃឹមច្រើន ក្នុងការដោះលែងអោយមានសេរីភាពឡើងវិញ៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) - ភ្នំពេញ ថ្ងៃទី ០៨ ខែកុម្ភៈ ឆ្នាំ២០១៤