ក្រុមគ្រួសារ ដ៏មានសមាជិកច្រើននេះ រស់នៅភូមិកណ្តាល ឃុំសណ្តារ ស្រុកលើកដែក ខេត្តកណ្តាល មានម្តាយឈ្មោះ ស្រេង ឡេង អាយុ៥៤ឆ្នាំ និងឪពុកឈ្មោះ ផង់ ភើយ អាយុ ៥៧ឆ្នាំជាមេគ្រួសារ។ ក្នុងគ្រួសារ ដែលមានសមាជិក ១១​នាក់​នោះ មានបងប្អូនប្រុស៣នាក់ ស្រី៨នាក់។ ស្រ្តីជាម្តាយ មិននឹកស្មានថា កូនរបស់ខ្លួនទាំងអស់ ជួបរឿងអកុសល រហូត​ដល់​ទៅ៤នាក់ ដែលពិការភ្នែកពីកំណើត។

ស្រ្តីម្នាក់ ពីក្នុងចំណោមបងប្អូនពិការភ្នែក ទាំង៤នាក់ បានឲ្យទស្សនាវដ្តីមនោរម្យ.អាំងហ្វូ ដឹងនៅថ្ងែទី១៦ ខែមិនា ឆ្នាំ​២០១៥នេះថា នាងឈ្មោះ ឆើយ សារ៉ា រីឯបងប្អូនបង្កើត ដែលពិការភ្នែកដែរនោះ ម្នាក់ឈ្មោះ ឆើយ ស្រីពៅ អាយុ១៣ឆ្នាំ ម្នាក់​ទៀតឈ្មោះ ឆើយ កូឡា អាយុ១៥ឆ្នាំ និងម្នាក់ទៀតឈ្មោះ ឆើយ សេងលី។ ស្ត្រីអាយុ២២ឆ្នាំ ដែលមានស្វាមី ជាជន​ពិការ​ដូចគ្នា បានប្រសូតកូនប្រុសអាយុ៧ខែ។

ដោយសារមានជីវភាពខ្វះខាត ទើបបងប្អូនពិការភ្នែកទាំងបួន បានបង្កើតជាក្រុមតន្រ្តីមួយ ដើម្បីដើរប្រគុំ នៅតាមផ្សារ​ក្នុង​រាជធានីភ្នំពេញ រកប្រាក់មកចិញ្ចឹមគ្រួសារទាំងមូល។ អ្នកស្រី ឆើយ សារ៉ា បានរៀបរាប់ថា អស់រយៈពេល​កន្លះឆ្នាំ​ហើយ ដែលក្រុមតន្រ្តីនេះ ធ្វើការប្រគុំ រកអ្នកសប្បុរសនៅទីសារធារណៈនេះ ហើយមួយថ្ងៃ អាចរកប្រាក់បានពី១០ ទៅ​៤០ម៉ឺនរៀល តាមទីកន្លែង ដែលមានមនុស្សច្រើន ឬតិច។ តែពេលខ្លះ ក៏ត្រូវបានអះខាន មិនបានប្រគុំរាល់ថ្ងៃដែរ ដោយ​សារបងប្អូនពិការទាំងនោះ មានជំងឺ មិនអាចចេញច្រៀង ឬលេងភ្លេងបាន។

អ្នកជិតខាងមួយរូប របស់ក្រុមគ្រួសារខាងលើ បានឲ្យដឹងថា ស្វាមីដែលជាអ្នកពិការនោះ មិនបានច្រៀងនៅក្រុម​ជា​មួយ​ប្រពន្ធទេ ព្រោះគាត់ជាអ្នកប្រគុំតន្រ្តី នៅក្រុមតន្រ្តីមនុស្សធម៍ ដើម្បីរកប្រាក់ជួយជនពិការដូចគ្នា។ រីឯភរិយារបស់គាត់ អ្នកស្រី ឆើយ សារ៉ា ក៏បានឲ្យដឹងពីបញ្ហានេះដែរ ដោយបាននិយាយថា ស្វាមីគាត់ មិននៅក្រុមច្រៀងជាមួយគាត់ទេ ព្រោះ​គាត់​ជា​អ្នករស់នៅ ជាមួយជនពិការផ្សេងទៀត ដែលបង្កើតជាក្រុមជនពិការ ជួយជនពិការ៕