លោក សុខ សេរី នាពេលកន្លងមក ក្នុងការបំពេញការងារ របស់លោក ជាអ្នកសារព័ត៌មាន លោកតែង ធ្វើទំនាក់ទំនង ជាមួយបណ្តាមិត្តរួមអាជីពទាំងអស់ ដែលលោកស្គាល់ តាមរយៈកម្មវិធី វ៉ាត់អាប់ (WhatsApp) ក្នុងទូរស័ព្ទរបស់លោក។ គឺតាមរយៈកម្មវិធីនេះហើយ ដែលទស្សនាវដ្តីមនោរម្យ.អាំងហ្វូ បានទទួលនូវសម្លេងរបស់លោក និងអាចជាសម្លេងចុង​ក្រោយរបស់លោក មុនពេលលាចាកលោក។

លោក សុខ សេរី និពន្ធនាយកព័ត៌មានស្ថានីយទូរទស្សន៍អាស៊ីអាគ្នេយ៍ (SEATV) និងជាអតីតអ្នកយកព័ត៌មាន ជាង​១០ឆ្នាំ ឲ្យវិទ្យុអាស៊ីសេរី បានទទួលមរណភាពដោយជំងឺស្ទះសសៃឈាម និងជំងឺសួត កាលពីថ្ងៃអាទិត្យ ទី១៥ ខែមីនា ឆ្នាំ២០១៥ វេលាម៉ោង ជិត១០ព្រឹក ក្នុងវ័យ៤៣ឆ្នាំ។ តាមប្រភពដែលស្និត នឹងគ្រួសាររបស់លោក បានបញ្ជាក់ប្រាប់ថា ក្រៅពីជំងឺដ៏រ៉ាំរ៉ៃទាំងពីរខាងលើ លោក សុខ សេរី ទំនងជារងគ្រោះ នឹងជំងឺទឹកនោមផ្អែមមួយទៀត។

យ៉ាងណាក៏ដោយ លោកតែងតែធ្វើការតស៊ូ ទៅពិនិត្យ និងព្យាបាលជាប្រចាំ។ ផ្ទុយទៅវិញ ស្ថានភាពជំងឺពីមួយថ្ងៃ ទៅ​មួយថ្ងៃ ហាក់មិនមានភាពស្រាកស្រាន្ដ ហើយលោកចេះតែមាន សភាពកាន់តែហេវហត់ និងអស់កម្លាំង ស្ទើតែមិន​ចង់​និយាយស្តីរួច។ លោកក៏បានសម្រេចចិត្តខាងលើ ក្នុងអំឡុងពេលលោកអវត្តមាននេះ។

តាមប្រភពនៃអ្នករួមអាជីព ពីស្ថានីយ៍វិទ្យុទូរទស្សន៍អាស៊ីអាគ្នេយ៍ បានបង្ហើបប្រាប់ថា លោក សុខ សេរី បានស្នើច្បាប់​សម្រាក ព្យាបាលជំងឺ ជាងមួយសប្តាហ៍ហើយ រហូតមកទល់នឹងពេល ដែលលោកបានទទួលមរណៈភាព។ ប៉ុន្តែក្នុង​អំឡុងពេលនោះ លោកបានផ្តាំផ្ញើរ នូវបណ្តាំមួយចំនួន ទៅកាន់មិត្តរួមការងារ និងរួមអាជីពរបស់លោក ដូចខាង​ក្រោម។ បច្ចុប្បន្ននេះ សពរបស់លោក ត្រូវបានក្រុមគ្រួសារ រៀបចំតម្កល់ នៅវត្តឧត្តរាវតី ក្នុងខណ្ឌឫស្សីកែវ ដើម្បីធ្វើ​បុណ្យ​តាម​ទំនៀមទំលាប់។

សម្លេងរបស់លោក ក្នុងពេលសម្រាកពិនិត្យ និងព្យាបាលនៅមន្ទីរពេទ្យកាល់ម៉ែត្រ ដែលទស្សនាវដ្ដីមនោរម្យ.អាំងហ្វូ ទទួលបាន៖