បទ«ពង្សាតារខ្មែរ» ដាស់ស្មារតី«ជាតិនិយម»
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី០៩ តុលា ២០១៤
- កែប្រែចុងក្រោយ: October 10, 2014
- ប្រធានបទ: ចម្រៀង
- អត្ថបទ: មានបញ្ហា?
- មតិ-យោបល់
-
បទ«ពង្សាតាខ្មែរ» ជាចម្រៀងមួយប្រភេទ ដែលច្រៀងជាពួក ។ បទនេះប្រជាពលរដ្ឋទូទៅ អាចស្តាប់ឮ សឹងតែជារៀងរាល់ព្រឹកព្រលឹម នៅតាមបណ្តាការចាក់ផ្សាយ របស់ស្ថានីយ៍ទូរទស្សន៍ និងវិទ្យុមួយចំនួនធំនៅកម្ពុជា នៅមុនពេលផ្តើមបើកកម្មវិធីរបស់ខ្លួនម្តងៗ ហើយក៏ត្រូវបានលោកគ្រូ អ្នកគ្រូ និងនាយកសាលា បានតម្រូវឲ្យសិស្សានុសិស្ស យកមកច្រៀងនៅពេលគោរពទង់ជាតិផងដែរ។
តាមអត្ថន័យនៃ«បទពង្សាវតារខ្មែរ»នេះ មានលក្ខណៈជាតិនិយម។ ដោយបានទូន្មាន ដល់បណ្តាប្រជាពលរដ្ឋខ្មែរគ្រប់រូប ឲ្យយល់ដឹងពីសាវតារជាតិ និងវប្បធម៌ដ៏រុងរឿងរបស់ខ្លួន តាំងពីសម័យមហានគរតរៀងមក។ ក្នុងបទនេះ បានបង្ហាញពីកិត្យានុភាពនៃវប្បធម៌របស់ខ្មែរ ដែលធ្លាប់មានភាពល្បីរន្ទឺ រហូតដល់ចុងបូព៌ា និងជាពិសេស បង្ហាញនូវមោទនភាព ដែលបានកើតមកជាកូនខ្មែរ រស់នៅលើទឹកដីអាណាចក្រខ្មែរ និងឲ្យស្រឡាញ់ទឹកដីជាដើម។ ជាងនេះទៅទៀត បទចម្រៀងនេះ ក៏បានដាស់សតិកូនខ្មែរគ្រប់រូប ឲ្យងើបឡើង តាំងចិត្តឲ្យមុតមាំ ដើម្បីថែរក្សា និងលើកតម្កើនវប្បធម៌ជាតិខ្លួន ឲ្យរុងរឿងដូចសម័យមហានគរ។
សូមរំលឹកដែរថា «បទពង្សាវតារខ្មែរ» ជាស្នាដៃរបស់សាស្រ្តាចារ្យ នួនកន (១៩៣៤ - ២០០២) នៃសកលវិទ្យាល័យភូមិន្ទវិចិត្រសិល្បៈ។ លោកបាននិពន្ធបទនេះ នៅថ្ងៃទី ១២ខែកញ្ញា ១៩៥៨។ តែតាមឯកសារខ្លះ សរសេរថា បទពង្សាតាខ្មែរ ជាស្នាព្រះហសត្ថនិពន្ធ របស់សម្តេចព្រះសង្ឃរាជ ជួនណាត។ បើយោងតាមឯកសារភាគច្រើន បានបញ្ជាក់ថា ព្រះអង្គបាននិពន្ធតែទំនុកច្រៀង« បទនគររាជ» សម្រាប់ភ្លេងជាតិខ្មែរប៉ុណ្ណោះ (និពន្ធនៅថ្ងៃទី២០ ខែកក្កដា ឆ្នាំ១៩៤១ ជាមួយនឹងបទសរភញ្ញ ដែលទ្រង់បាននិពន្ធ កាលពីឱកាសបុណ្យពុទ្ធសករាជ២៥០០)។
សូមចូលរូមច្រៀង និងសណ្តាប់បទ «ពង្សាតាខ្មែរ» ដូចខាងក្រោម៖
១. ខ្មែរអើយ ចូរចាំជាក់ថា តាមពង្សាវតារ ជាតិខេមរា ធ្លាប់តែថ្កើង ទឹកដីខ្មែរធំ ទូលំទូលាយ សព្វសាយរុងរឿង គេឯងតែងលើកតម្កើង តម្កល់ជាតិយើង ចាត់ទុកឡើងជាជាតិច្បង ។
២. អារ្យធម៌ ខ្ពង់ខ្ពស់ឆើតឆាយ បានចេញផ្សព្វផ្សាយ គ្រប់ទិសទាំងឡាយ ចុងបូព៌ា សាសនាសិល្បៈ ចម្លាក់វិចិត្រ គំនិតសិក្សា តន្ត្រីទស្សនវិជ្ជា ព្រះពុទ្ធសាសនា ជាគោលការណ៍ខ្មែរផ្សាយទៅ ។
៣. ខ្មែរអើយ ចូរស្ដាប់សាវតារ ដែលបានចរចា បញ្ជាក់ប្រាប់ថា ពូជខ្មែរថ្កើង តាំងចិត្តឲ្យមាំ ខិតខំប្រឹងវេញ បញ្ចេញតម្កើង តម្លៃនៃជាតិខ្មែរយើង ឲ្យបានរុងរឿង ជាថ្មីឡើងតាមសាវតារ ។