ការជជីកសួរដេញដោលមួយ រវាងតំណាងរាស្រ្តខេត្តស្វាយរៀង មកពីគណបក្សសង្គ្រោះជាតិ ជាមួយនឹង​លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន របស់រដ្ឋាភិបាលកម្ពុជា បានធ្វើឡើងបង្កការ​ចាប់​អារម្មណ៍ ពីសំណាក់អ្នកសារព័ត៌មាន ជាពិសេសសំនួរឆ្លើយ ពីការរុករានកាន់កាប់ របស់ពលរដ្ឋ និងទាហាន​វៀតណាម មកលើដីរបស់ខ្មែរ។ ការជជីសួរនោះ បានធ្វើឡើង នៅក្នុងសន្និសីទសារព័ត៌មានមួយ នាព្រឹកថ្ងៃ ទី២ ខែកក្កដា ឆ្នាំ២០១៥នេះ នៅទីស្តីការគណរដ្ឋមន្រ្តី ខណៈពេលលោក វ៉ា គឹមហុង ដែលជាប្រធាន​គណៈ​កម្មាធិការចម្រុះ កិច្ចការព្រំដែនកម្ពុជាផងនោះ បានធ្វើបទបង្ហាញ និងការប្រកាសជាផ្លូវការ នូវផែនទីបង្ហាញ​ព្រំដែន កម្ពុជា-វៀតណាម ដល់ក្រុមអ្នកសារព័ត៌មាន។

សូមអាន និងទស្សនា នូវកិច្ចសួរដេញដោល រវាងលោក វ៉ា គឹមហុង និងលោក រៀល ខេមរិន្រ្ទ នូវសំនួរមួយ​ចំនួនដូចខាងក្រោម៖

រៀល ខេមរិន្រ្ទ៖ «អ្នកនាំពាក្យក្រសួងមហាផ្ទៃ លោក ខៀវ សុភ័ក្រ បានលើកឡើងថា នៅតំបន់នោះ មិន​ទាន់​មានការដោះស្រាយ (ប្រទាញប្រទង់) ហេតុអ្វីទាហានយួន ប្រជាជនយួន មកវាយខ្មែរ លើតំបន់ខ្មែរ​កាន់​កាប់? តើនោះជាតំបន់សរ តំបន់ដីវៀតណាម ឬជាតំបន់ដីខ្មែរ?»

វ៉ា គឹមហុង៖ «យើងកំពុងតែចរចារ។ ប៉ុន្តែយើងដឹងថា កន្លែងហ្នឹង វៀតណាមធ្វើស្រែ ចូលដីក្នុងដីយើង ធ្វើយូរ​ហើយ។ តាមគោលការណ៍ ថ្ងៃទី១៧ ខែមករា ឆ្នាំ១៩៩៥ ជាសេចក្តីសម្រេច របស់នាយករដ្ឋមន្រ្តីទាំងពីរ មិន​មែនខ្ញុំធ្វើទេ។ (...) ស្រែនោះ ជាស្រែវៀតណាមកាន់កាប់ វាកាន់កាប់ពីមុនមក ធ្វើរហូតដល់ឥឡូវ។ វាមាន​​សិទ្ធិ ការពារអាដីដែលវាធ្វើ និងកាន់កាប់។ (...) ពេលយើងបោះបង្គោលព្រំដែន អាផ្នូរខ្មោចនោះ វានៅរាប​នឹងដី គ្មាន​អាណាដឹងថា ខ្មោចនៅក្រោមដីនោះទេ។ អត់មានអាណាដឹង រឿងខ្មោចនៅក្រោមដីហ្នឹងទេ ដល់ពេល​រួច វា​សាយ​ភាយពីលើទើបយើងដឹង។ (...) យើងស្នើសូមកុំបារម្ភ ចាំខ្ញុំរកដីសងវិញ គ្រាន់តែបង្ខិតខាងនោះ (ដី) ទៅ​គេ​ទៅ ខាងយើងមានដីមិនខ្វះទេ សងឲ្យលោក។»

រៀល ខេមរិន្រ្ទ៖ «គេវាយខ្មែរ នៅលើដីខ្មែរ ឯកឧត្តមគិតថា អាហ្នឹងខ្មែរខុស ឬយួនខុស?»

វ៉ា គឹមហុង៖ «ជាគោលការណ៍ យើងអនុញ្ញាតឲ្យគេរក្សា ការគ្រប់គ្រងនៅឡើយ។ គេមិនទាន់ប្រគល់​មក​ឲ្យ​យើង​ទេ។ ដីនោះដីខ្មែរ ខ្ញុំអត់មានថាខុសទេ នោះដីខ្មែរ តែលុះត្រាតែយើងបានបំពេញ និងបោះបង្គោល​ព្រំ​ខណ្ឌ​សីមា នៅខេត្តស្វាយរៀងនោះរួចអស់ គេនឹងប្រគល់ដីនោះមកឲ្យយើង អត់មានដូរអីទេ គេប្រគល់​មក​​ឲ្យ​យើង ឯកឧត្តមចង់ទៅមើលថ្ងៃណា គ្មានអ្នកណាប៉ះពាល់ទេ។»

តំណាងរាស្រ្តខេត្តស្វាយរៀង លោក រៀល ខេមរិន្រ្ទ ក៏បាន នាំពាក្យនាយទាហានវៀតណាម ដែលបានប្រាប់​មកលោកកាលពីថ្មីៗនេះ ថាដីផ្នូរខ្មោចនោះពិតជាដីខ្មែរ ជាផ្នូរខ្មោចរបស់ខ្មែរ។ ចំពោះការអះអាងនេះ លោក វ៉ា គឹមហុង មិនបានធ្វើការឆ្លើយតបឡើយ ឬបញ្ជាក់យ៉ាងណានោះឡើយ។ យ៉ាងណាលោក វ៉ា គីមហុង ទេស​រដ្ឋមន្ត្រី ទទួលបន្ទុកកិច្ចការព្រំដែន បានបង្ហាញថាលោកនៅតែស្វាគម និងស្នើឲ្យលោក សម រង្ស៊ី បង្ហាញ​ផែនទី​ទាំង២៦ផ្ទាំងរបស់លោក ដើម្បីដាក់ពិនិត្យ និងធ្វើការផ្ទៀងផ្ទាត់គ្នា និងផ្តល់ចម្លើយតបវិញនាពេលក្រោយ។

» សូមទស្សនាវីដេអូ នៃការសួរដេញដោល នៃតំណាងរាស្ត្រមកពីគណបក្សប្រឆាំង និង​មន្ត្រីរដ្ឋាភិបាលនេះ​ទាំង​ស្រុង ដូចខាងក្រោម៖