កម្មវិធី«អ្នកនឹងក្លាយជាសេដ្ឋី» ថាដើម្បីលើកកំពស់ការយល់ដឹងរបស់ពលរដ្ឋ
- ដោយ: ក. វិច្ចនី ដោយ ក.វិច្ចនី (ទាក់ទង៖ [email protected]) - ភ្នំពេញ ថ្ងៃទី ០៨ តុលា ២០១៤
- កែប្រែចុងក្រោយ: October 09, 2014
- ប្រធានបទ: ទូរទស្សន៍
- អត្ថបទ: មានបញ្ហា?
- មតិ-យោបល់
-
កម្មវិធី«អ្នកក្លាយជាសេដ្ឋី» របស់ទូស្សន៍ CTN ជាកម្មវិធីមួយបង្ហាញ ពីចំណេះដឹងទូទៅ និងផ្តល់ឱកាសដល់យុវជន ឬនិស្សិត បានចូលរួមប្រកួតប្រជែងឆ្លើយសំនួរ ដើម្បីដណ្តើមតំណែងជា«សេដ្ឋី»ប្រចាំកម្មវិធី។ «អ្នកនឹងក្លាយជាសេដ្ឋី» មិនត្រឹមតែជួយឲ្យបេក្ខជនបានទទួលទឹកប្រាក់ ក្លាយជាសេដ្ឋីនោះទេ ប៉ុន្តែកម្មវិធីនេះបានជួយបង្កើនចំណេះដឹង ដល់យុវជន និងប្រជាជនខ្មែរដែលទស្សនាកម្មវិធីនេះផងទៀត។
កម្មវធីនេះ មានបេក្ខជនមកពីគ្រប់បណ្តាខេត្តក្រុង ចូលរួមប្រកួតប្រជែងឆ្លើយសំនួរ ដណ្តើមប្រាក់លានដើម្បីក្លាយជាសេដ្ឋី។ បេក្ខជនដែលមានសមត្ថភាព អាចឆ្លើយសំនួរទាំងអស់នៅក្នុង កម្មវិធីបាននឹងទទួលបានប្រាក់ចំនួន ១រយលានរៀល។ កម្មវិធីតម្រូវឲ្យបេក្ខជនមានភាពវៃឆ្លាត រហ័សរហួន និងចំណេះដឹងទូទៅច្រើន ទើបទទួលបានជ័យជំនះ។ អបដោយពិធីករ លោក អ៊ិត សេដ្ឋា ដែលមានសមត្ថភាពខ្ពស់ និងមានភាពក្រម៉ាច់ក្រមើមពូកែឆ្កឹះឆ្កៀលបេក្ខជននោះផង កម្មវិធីបានធ្វើឲ្យអ្នកចូលរួមទស្សនា ផ្ទុះសំណើច និងបង្កឲ្យមានភាពសប្បាយរីករាយ កាន់តែខ្លាំងឡើង។
ផា ភក្តី ជាទស្សនិកជន របស់កម្មវិធី«អ្នកនឹងក្លាយជាសេដ្ឋី»ម្នាក់ បានលើកឡើងថា៖ «កម្មវិធីនេះល្អ។ ខ្ញុំចូលចិត្តមើល ព្រោះវាជួយបង្កើនចំណេះដឹងរបស់យើង ទាក់ទងនឹងប្រវត្តិសាស្ត្រ និងចំណេះ ដឹងថ្មីៗ និងធ្វើឲ្យយើងមានអារម្មណ៍រីករាយ។ មិនតែប៉ុណ្ណោះ វាជួយពង្រឹងស្មារតីយើងឲ្យមានភាពក្លាហាន និងមានភាពឆ្លាតវៃ និងជួយឲ្យយើងមានភាពរហ័សរហួន។»
បេក្ខជនមួយរូប យុវជន មូ សេងហៀង ដែលបានចូលទៅលេង និងបានឆ្លងជិតផុតជុំទី ២ បានទទួលទឹកប្រាក់ចំនួន ១៦០ម៉ឺនរៀល។ នៅសល់តែមួយសំនួរទៀតនោះ ដែលយុវជនត្រូវឆ្លើយឲ្យត្រូវ ដើម្បីឡើងទៅជុំទី៣។ តែគួឲ្យស្ដាយ...
យុវជន មូ សេងហៀង បានប្រាប់ទស្សនាវដ្តី មនោរម្យ.អាំងហ្វូថា៖ «ថ្វីត្បិតតែខ្ញុំមិនបានឈ្នះ ដល់វគ្គបញ្ចប់ក្នុងកម្មវិធីនេះក៍ដោយ ប៉ុន្តែខ្ញុំបានបង្ហាញពីសមត្ថភាពរបស់ខ្ញុំ ដល់សារធារណៈជន ជាពិសេសប្រជាជនខ្មែរ បើទោះជាគាត់មិនបានមកមើលផ្ទាល់ ប៉ុន្តែពួកគាត់បានមើលតាមរយៈអនលាញ ហើយគេអាចមើលដល់ក្រៅប្រទេសទៀត។»
សូមបញ្ជាក់ដែរថា កម្មវិធី«អ្នកក្លាយជាសេដ្ឋី»នេះ ជាកម្មវិធីដើមមួយ មានឈ្មោះជាភាសាអង់គ្លេស «Who Wants to Be a Millionaire?» ផលិតដោយស្ថានីយ៍ទូរទស្សន៍អង់គ្លេស ITV តាំងពីឆ្នាំ១៩៩៨មកម្លេះ។ បន្តិចម្ដងៗ កម្មវិធីនេះ បានទទួលការចាប់អារម្មណ៍ ពីបណ្ដាបណ្ដាញទូរទស្សន៍ក្នុងប្រទេសផ្សេងទៀត រហូតបានស្នើសុំទិញសិទ្ធិ យកមកផលិតដាក់ក្នុងទូរទស្សន៍តែរៀងៗខ្លួន។ រហូតមកដល់ពេលនេះ តួលេខដែលផ្សាយឲ្យដឹង បានបង្ហាញថា កម្មវិធីនេះមានផ្សាយនៅជាង៦០ស្ថានីយ៍ទូរទស្សន៍ ក្នុងប្រមាណជាជាង៥៥ប្រទេស នៅលើពិភពលោក៕