តាមការអះអាងពី ប្រជាពលរដ្ឋនៅវត្តត្រឡែងកែង ក្នុង​ខេត្ត​កំពង់ឆ្នាំង បានឱ្យដឹងថា រដូវបុណ្យភ្ជំបិណ្ឌម្តងៗ ស្រ្តី​ដែល​អះអាង​ថា ខ្លួនមានរូបព្រះគោចូលសណ្ឋិត ហើយនៅក្នុងថ្ងៃសីល ឬថ្ងៃពេញបូណ៌មី ស្ត្រីនេះតែង​តែ​មក​វត្ត​ត្រឡែងកែង​នេះ ដើម្បី​ឱ្យ​ព្រះគោ​ចូលរូប។

នៅពេលដែលស្រ្តីឈ្មោះ ផល មុំ កំពុងត្រូវបានវិញ្ញាណ​របស់​ព្រះគោ ចូលសណ្ឋិតម្តងៗ ប្រជា​ពលរដ្ឋ​ប្រុស​ស្រី​ក្មេង​ចាស់ បាន​នាំគ្នាយកទឹក នំចំណី ជាដើម ឱ្យស្រ្តីចូលរូប លិត ខាំ ឬ​ផឹក​ជា​ដើម ដើម្បីយក​សំណល់ពី​ស្រ្តីវ័យកណ្តាលរូបនោះ មកបរិភោគតាមក្រោយ ដោយគេជឿថា គេ​នឹង​មាន​ភាព​ស្រណុក​សុខសប្បាយ។

អ្នកស្រី សេង លីម មកពីតំបន់ស្ទឹងមានជ័យ រាជធានីភ្នំពេញ ដែលប្រជ្រៀតគេប្រជ្រៀតឯង ដើម្បីទៅទទួល​សំណល់​ពីព្រះគោចូលរូប បានរៀបរាប់ថា នេះជាលើកទីមួយហើយ ដែលអ្នកស្រីបានឃើញទិដ្ឋភាពនេះ ព្រោះរាល់ឆ្នាំអ្នកស្រីលឺតែគេថា មិនដែលឃើញផ្ទាល់ភ្នែកនោះទេ។ ស្រ្តីវ័យ៤៥ឆ្នាំរូបនេះ បន្តថា គ្រាន់​ឃើញ​ស្រ្តីរូបនោះ ត្រូវព្រះគោចូលរូបភ្លាម អ្នកស្រីមានអារម្មណ៍ភ្ញាក់ផ្អើល និងរន្ធត់យ៉ាងខ្លាំង ព្រោះថាមុនដំបូង គាត់គ្រាន់តែលេងភ្លេងធម្មតាតែប៉ុណ្ណោះ ប៉ុន្តែស្រាប់តែឃើញ គាត់មានកាយវិការដូចព្រះគោបេះបិទ។

អ្នកស្រី សេង លីម អះអាងពីការជឿជាក់របស់អ្នកស្រីថា៖ «ខ្ញុំជឿថា ពិតជាព្រះគោពិតមែន ព្រោះឃើញ​គាត់​ចេញ​កាយវិការមក រាងដូចគោតែម្តង»។ សម្រាប់អ្នកស្រី ក៏ដូចជាពលរដ្ឋឯទៀតៗ ដែលនាំគ្នាទៅ​ដណ្តើម​យកនំចំណី ដែលព្រះគោចូលរូបបានខ្ជាក់ចេញមកវិញនោះ ដើម្បីយកមកបរិភោគតាមក្រោយ នឹងអាល​អាច​​កើត​នូវសេចក្តីសុខសប្បាយ និងមានសុខភាពល្អ ក្នុងជីវិត។ អ្នកស្រីអះអាងថានៅក្នុងឆ្នាំក្រោយៗទៀត អ្នកនឹងមកទទួលសំណល់ ពីស្រ្តីដែលមានព្រះគោចូលរូបនេះជាថ្មីទៀត។

មកពីរាជធានីភ្នំពេញដូចគ្នា អ្នកស្រី សុខ ថា (ឈ្មោះអ្នកសារព័ត៌មានដាក់ឱ្យ) ដែលតែងមកដាក់បិណ្ឌ នៅ​វត្តត្រឡែងកែងនេះជារៀងរាល់ឆ្នាំ បានរៀបរាប់ថា អ្នកស្រីពិតជាមានអារម្មណ៍រំភើបមែនទែន ដោយជឿ​ជាក់​​យ៉ាងពេញទំហឹងថា វិញ្ញាណដែលសណ្ឋិតស្រ្តីរូបនោះ គឺពិតជាព្រះគោមួយរយភាគរយ។

ក្នុងពេលដែលអ្នកមានជំនឿដទៃទៀត នាំគ្នាដណ្តើមយកផ្លែឈើ នំចំណីនោះ អ្នកស្រី សុខ ថា វិញ បានយក​លុយទៅឱ្យព្រះគោដែលចូលសណ្ឋិតក្នុងខ្លួននោះលិត (លិតលុយ) ដោយអ្នកស្រីមានជំនឿថា៖ «ចង់បាន​លាភបានជ័យពីព្រះគោ ព្រោះព្រះគោមិនដែលបានជួបទេ ម្លោះហើយខ្ញុំចង់បានហ្នឹង ដើម្បីឱ្យរកស៊ី​មាន​បាន ត្រជាក់ត្រជុំ ចំរ៉ុងចម្រើនក្នុងគ្រួសារ និងមានអាយុវែង»។

រីឯអ្នកស្រី ផល មុំ ដែលបានអះអាងថា ត្រូវបានព្រះគោចូលសណ្ឋិតនោះ បានឱ្យដឹងថា អ្នកស្រីមានគ្រូកាន់​តាំងពីអាយុ២៥ឆ្នាំ។ មូលហេតុដែលអ្នកស្រីជឿថា ពិតជាមានវិញ្ញាណព្រះគោ ចូលក្នុងខ្លួនអ្នកស្រីនោះ ព្រោះ​កាលពីប៉ុន្មានឆ្នាំមុននោះ អ្នកស្រីបានយល់សប្ដិឃើញ «ព្រះគោបានរត់ចេញពីប្រទេសថៃ»។ បន្ទាប់ពី​ពេល​នោះ​មក អ្នកស្រី បានសាងសង់រូបព្រះគោហោះមួយ នៅក្នុងវត្តនេះ។

ចំពោះការចូលរូបវិញ អ្នកស្រីប្រាប់ឱ្យដឹងទៀតថា៖ «កាលពីមុន ទើបតែចូលមកជល់អីៗ ទើបដឹង។ ហើយ​នៅពេលដែលវាត្រូវចូល គឺត្រូវតែចូលតែម្តង ទប់អត់ឈ្នះទេ ញ័រសាច់ទទ្រើកតែម្តង។» អ្នកស្រីថា នៅពេល​ច្រត់ព្រះន័ង្គល ព្រះគោនោះឱ្យអ្នកស្រីរៀបចំពិធី នៅទីហ្នឹងរាល់ឆ្នាំ។

មិនអាចទាក់ទងមន្ត្រីអាជ្ញាធរមូលដ្ឋាន ដើម្បីសុំការបញ្ជាក់បានពីបញ្ហាចូលរូបនេះ បាននៅឡើយ។ ប្រទេស​កម្ពុជា ជាប្រទេសមួយ ដែលមានប្រពៃណីទំនៀមទម្លាប់ច្រើនប្រភេទ និងជំនឿសាសនា​យ៉ាង​សម្បូរ​បែប រួម​ផ្សំ​នឹងស្ថានភាពនយោបាយដ៏លំបាកលំបិន នៅក្នុងរយៈពេល៥០ឆ្នាំចុងក្រោយនោះផង បាន​ជំរុញ​ឲ្យ​ប្រជាជន​ក្នុងប្រទេសនេះ នៅតែប្រកាន់នូវជំនឿស៊ប់នៅឡើយ ទៅលើអបិយជំនឿដ៏ចម្លែកៗ។ ពួកគេជឿថា អបិយជំនឿ​ទាំង​នោះ អាចនឹង៊ជួយរំដោះគ្រោះផ្សេងៗ ឬអាចទទួលបានមកវិញ នូវភាពស្រណុកសុខ​សប្បាយ ឬ​​យ៉ាង​​ហោច​​នូវជំនឿទុកចិត្តសម្រាប់ខ្លួនឯង និងគ្រួសារ៕