ការរិះគន់យ៉ាងច្រើនព្រោងព្រាត បានកក្រើក​ពេញ​ទាំង​បណ្តាញ​សង្គម ហ្វេសប៊ុក ជុំវិញ​ប្រធានបទ «កម្ពុជា​​ជាធុង​សម្រាម​របស់​បរទេស» បន្ទាប់​ពី​រដ្ឋាភិបាល តំណាង​ដោយ​លោក ស​​ ខេង រដ្ឋមន្ត្រី​មហាផ្ទៃ​កម្ពុជា បាន​​ចុះ​ហត្ថលេខា យល់​ព្រម​ទទួល​យក​ជន​ភៀស​ខ្លូន​ខុស​ច្បាប់ ដែល​សុំ​សិទ្ធិ​ជ្រក​កោន ពី​ប្រទេស​អូស្ត្រាលី តែ​​បែរ​​ជា​ប្រទេស​ធំ​មួយ​នេះ​មិន​ចង់​បាន និង​ត្រៀម​បញ្ជូន​មក​កម្ពុជា​វិញ។

អ្នក​ប្រើ​ប្រាស់​បណ្ដាញ​សង្គម​មួយ​រូប បាន​សរសេរ​រំលឹក​នូវ​ប្រវត្តិសាស្រ្ត​ជូរ​ចត់ ពីម្ភៃឆ្នាំមុនរបស់កម្ពុជា ដែល​ត្រូវបានគេនាំយកកាកសំណល់វិទ្យុសកម្ម ជាច្រើនតោន មកចាក់ចោលនៅក្រុងព្រះសីហនុ ឬកំពង់សោម។ អ្នក​ប្រើប្រាស់​បណ្ដាញសង្គម លោក យឹម សាវី (Yim Savy) បានសរសេរបន្តថា៖ «ប៉ុន្តែម្តងនេះ (ជា) កាក​សំណល់​មានជីវិត»។

មិនត្រឹមតែកាកសំណល់វិទ្យុសកម្មទេ បើសូម្បីតែម៉ូតូ ឡាន ... ឬប្រដាប់ប្រដាចាស់ៗផ្សេងទៀត ក៏ត្រូវបាន​គេយកមកគ្រវាត់ចោល ហើយពលរដ្ឋកម្ពុជាបាននាំគ្នាយកលុយ ទៅទិញយកសម្ភារៈចាស់ៗទាំងនោះ មក​ជួសជុលប្រើថែមទៀត។ លោក អ៊ូ សំម (Somm Ou) បានសម្ដែងការសញ្ជប់សញ្ជឹងរបស់លោកថា៖ «លោក ហ៊ុន សែន ដូចជាមិនស្រួល»។

យ៉ាងណាក៏ដោយ ក៏ការសម្រេចទទួលជនភៀសខ្លួនពីប្រទេសអូស្ត្រាលី នៅតែជាចំងល់ និងអាថ៌កំបាំង ដែល​គ្រប់គ្នាចង់ឲ្យមានការបកស្រាយ។ ​លោក ម៉ាយ៉ា សាគី (Maya Saki) បានលើកឡើងថា អូស្ត្រាលី ជា​ប្រទេសដែលសល់ទំហំដីធំ តែគេមិនទទួល ចុះកម្ពុជាមានដីប៉ុន្មាន ទើបព្រមទទួលយកនោះ? តើពលរដ្ឋ​ម្ចាស់ស្រុក(ខ្មែរ) ត្រូវបានរដ្ឋាភិបាលសព្វថ្ងៃគិតគូររួចរាល់ ហើយឬនៅ?

លោកបានសរសេរដូច្នេះថា៖ «ប្រទេសអូស្ត្រាលីធំណាស់ ហេតុអ្វីបានជាមិនអាចគ្រប់គ្រង ឬក៏ផ្តល់កន្លែង​ជ្រកកោន សំរាប់ជនភៀសខ្លួនទាំងនោះ ចាំបាច់អីបញ្ជូនមកប្រទេសខ្មែរ? ប្រជាជនខ្មែរយើងមួយចំនួន​រាល់​ថ្ងៃនេះ គ្មានទាំងផ្ទះសំបែងសំរាប់ជ្រកកោនផង! ហេតុអីក៏មិនគិត? ទៅគិតសាសន៍ដទៃ ខ្លាចអត់មាន​កន្លែង​ជ្រក!!!»។

ចំណែក កញ្ញា ដួង ណាវី (Navy Duong) វិញ បានចូលរួមបន្ទោសថ្នាក់ដឹកនាំខ្មែរយ៉ាងចាស់ដៃថា៖ «មេ​ដឺក​នាំ​ប្រទេសខ្មែរ មិនត្រឹមខ្វាក់ភ្នែកនោះទេ ថែមទាំងខ្វាក់ខួ។ ពីព្រោះប្រជារាស្រ្តខ្មែរក្រីក្រលំបាកវេទនា ស្ទើរ​តែ​ដាច់​ពោះស្លាប់មិនជួយ បែរជាទៅទទួលជនភៀសខ្លួន ពីប្រទេសអូស្រ្តាលី។»

លោក ហម សឿម (Saoum Hom) និយាយបរិហាថា «ជួយខ្មែរមិនរួចផង...។ ប្រជាជនខ្មែរ រស់នៅ​វេទនា​ណាស់ សុខចិត្តធ្វើចំណាកស្រុកទៅធ្វើកម្មករគេ ចិញ្ចឹមខ្លួនមិនរស់ ហេតុអ្វី (លោក) ហ៊ុន សែន មិនគិត? ទៅ​ទទួល​យក​ជនភៀសខ្លួន?...មិនចេះគិតសោះ។»

ការទទួលជនភៀសខ្លួនពីអូស្រ្តាលី មិនឆ្លងកាត់រដ្ឋសភា

មានចម្ងល់មួយបានចោទសួរថា បើបញ្ហាកាត់តំរឹមសិទ្ធិសេរីភាពរបស់ប្រជាពលរដ្ឋខ្មែរ ចេះដាក់​ចូល​រដ្ឋសភា និងបង្ខំឲ្យរដ្ឋសភាទទួលអនុម័ត។ តែវាចម្លែកត្រង់ថា ហេតុអ្វីទទួលជនបរទេស ដែលមិនដឹងពីប្រវត្តិ​ច្បាស់​ទាល់តែសោះនោះ មិនដាក់ឲ្យរដ្ឋសភាអនុម័តជាមុនផង? ឬមួយមានសម្លេងបក្សប្រឆាំង នៅក្នុង​រដ្ឋសភា បាន​ជាមិនហ៊ានយកទៅឆ្លងសភា? លោក ផាន សុធីរៈ (Sothirak Phan) បញ្ជាក់ដូច្នេះថា៖ «រឿងនេះ វា​ទាក់​ទង​នឹង​អាយុជីវិតប្រទេសជាតិ ហេតុអ្វីរដ្ឋាភិបាលមិនដាក់ឆ្លងសភា ជាមុនសិន មុននឹងសម្រេច?»

រីឯអនុប្រធានទីមួយនៃរដ្ឋសភា លោក កឹម សុខា មកពី​គណបក្ស​សង្គ្រោះជាតិ ក៏មិនបានរួចខ្លួនដែរ។ អនុ​ប្រធានគណបក្សប្រឆាំង ដែលទើបមានតំណែងក្នុង​រដ្ឋសភា​ បានរងការរិះគន់យ៉ាងជូរចត់ដែរថា ព្រោះ​ខ្លាច​បាត់«តំណែង»នេះ ទើបបានជាមានភាពកម្សោយ ក្នុងការធ្វើប្រតិកម្ម។ មិនត្រឹមតែប៉ុណ្ណោះ ថែមទាំង​បាន​ផ្លាស់ប្តូរឥរិយាបទ ពីការប្រើប្រាសពាក្យថា«ប្រឆាំង» មក ជាពាក្យថា«អំពាវនាវ»ទៅវិញនោះទៀត។

លោក អង់ វណ្ណៈ (Vannak En) សរសេររិះគន់លោក កឹម សុខា ដូច្នេះថា៖ «ឥឡូវហ៊ានត្រឹមនិយាយថា សុំ​អំពាវនាវ ទេ? អត់ហ៊ាននិយាយថា ប្រឆាំងដាច់ខាតដូចពីមុនទៀតទេឬ? ខ្លាចជ្រុះបាត់កៅអី​អនុប្រធាន​សភា​ទី១មែន(ឬ)ទេ?»

ឯលោក ភូ ខ្មែរ (Phou Khmer Unity) ហាក់បង្ហាញនូវការអស់សង្ឃឹម ចំពោះលោក កឹម សុខា បានសរសេរ​ទាំងទោរមនស្សថា៖ «តើយើងនៅអាចសង្ឃឹម លើអ្នកណាទៀត បើទោះបីជាមានការរិះគន់ជាច្រើនហើយ គេនៅតែទទួលទៀតចឹង?»។

សូមបញ្ជាក់ដែរថា គេកម្រឃើញអ្នកប្រើប្រាស់បណ្ដាញសង្គម ឬក៏មានតិចតួចណាស់ ដែលសរសេរគាំទ្រ​គម្រោង​រដ្ឋាភិបាល ក្នុងបញ្ហានេះ ឬអាចនិយាយបានម្យ៉ាងទៀតថា អ្នកគាំទ្ររដ្ឋាភិបាល ទំនងជាមិន​ចង់​តទល់​នឹងក្រុមអ្នករិះគន់ ដែលមានកម្លាំងខ្លាំងដូចទឹកធ្លាក់ទាំងនោះ៕