ដំណឹងចុងក្រោយ បានបង្ហើបឲ្យបានដឹងថា សមាជិកពីររូបក្នុងចំណោមបួនរូប ដែលជា«កូតា» របស់គណបក្ស​សង្គ្រោះ​ជាតិ សម្រាប់មកដឹកនាំគណកម្មាធិការជាតិរៀបចំការបោះឆ្នោត ហៅកាត់ថា គ.ជ.ប អាចជាលោក យ៉េង វីរៈ និងលោក គល់ បញ្ញា មេដឹកនាំអង្គការសង្គមស៊ីវិល ដែលធ្វើការយ៉ាងជិតស្និត ទៅនឹងការ​បោះឆ្នោតកន្លងមកច្រើនឆ្នាំ នៅកម្ពុជា។

លោក យ៉េង វីរៈ (ខាងឆ្វេង) និងលោក គល់ បញ្ញា។ (រូបថត MONOROOM.info/ O. Vary)

សមាជិក គ.ជ.ប - សមាជិកដឹកនាំ គ.ជ.ប បួនរូប ដែលជ្រើសតាំងដោយគណបក្សសង្គ្រោះជាតិ អាចមានពីររូប​ពី​គណបក្សផ្ទាល់តែម្ដង និងពីររូបទៀតចេញពីក្រុមអង្គការសង្គមស៊ីវិល។ នេះបើតាមការបញ្ជាក់របស់ប្រមុខ​គណបក្ស​សង្គ្រោះជាតិ លោក សម រង្ស៊ី និងលោក កឹម សុខា នៅក្នុងវេទិការអ្នកស្ដាប់ របស់វិទ្យុអាស៊ីសេរី នាយប់ថ្ងៃទី២៩ ខែ​កក្កដា ឆ្នាំ២០១៤។ ការលើកឡើងរបស់មេដឹកនាំគណបក្សប្រឆាំង បានធ្វើឡើងបន្ទាប់ពីសមាជិកទី៩ ដែលនឹងមក​ដឹកនាំ គ.ជ.ប ហើយមានការយល់ព្រមពីគណបក្សទាំងពីរ ក៏ជាមេដឹកនាំអង្គការសង្គមស៊ីវិលមួយដែរ។ សមាជិក​ទី៩​នោះ ត្រូវបានគេស្គាល់ឈ្មោះរួចហើយ គឺលោកស្រី ពុង ឈីវកេក អតីតនាយិការរបស់អង្គការការពារសិទ្ធិ​មនុស្ស លីកាដូ។

ចំពោះសមាជិកមួយរូបដែលជ្រើសតាំងដោយ គណបក្សសង្គ្រោះជាតិ ក៏ត្រូវបានគេទម្លាយឲ្យដឹង តាំងពីមុនរួច​ហើយ​ដែរ នោះគឺលោក គួយ ប៊ុនរឿន ដែលទើបនឹងបោះបង់តំណែងជាតំណាងរាស្ត្រជាប់ឆ្នោតរបស់លោក ទៅឲ្យលោក សម រង្ស៊ី។ សម្រាប់សមាជិកដឹកនាំ គ.ជ.ប មួយរូបពីគណបក្ស និងពីររូបទៀតពីអង្គការសង្គមស៊ីវិល នៅមិន​ទាន់​ត្រូវ​បានលោក សម រង្ស៊ី និងលោក កឹម សុខា ទម្លាយឲ្យដឹងនៅឡើយ នៅក្នុងនាទីរបស់វិទ្យុអាស៊ីសេរីនោះ។

ប៉ុន្តែ នៅក្នុងសេចក្ដីរាយការណ៍មួយ របស់វិទ្យុសម្លេងសហរដ្ឋអាមេរិក ដោយបានថ្លែងយោងពីការបង្ហើបរបស់លោក មាជ សុវណ្ណរា មន្ត្រីជាន់ខ្ពស់ទទួលបន្ទុកព័ត៌មាន និងប្រព័ន្ធផ្សព្វផ្សាយ នៃគណបក្សសង្គ្រោះជាតិ បានថ្លែងឲ្យ​ដឹង​ថា សមាជិកពីររូប ពីខាងគណបក្សនេះ ដែលនឹងមកដឹកនាំ គ.ជ.ប ថ្មី អាចជាលោក យ៉េង វីរៈ ប្រធានមជ្ឈមណ្ឌលអប់រំ​ច្បាប់​សម្រាប់​សហគមន៍ និងលោក គល់ បញ្ញា នាយកប្រតិបត្តិ គណៈកម្មាធិការដើម្បីការបោះឆ្នោតដោយសេរី និង​យុត្តិធម៌​នៅកម្ពុជា ហៅកាត់ថា ខុមហ្វ្រែល ដែលធ្លាប់ធ្វើការសង្កេតការណ៍ ក្នុងការបោះឆ្នោតនៅកម្ពុជា តាំងពី​ច្រើន​ឆ្នាំកន្លង​មកហើយ។

លោក ហេង រស្មី អ្នកសារព័ត៌មាន របស់វិទ្យុសម្លេងសហរដ្ឋអាមេរិក បានរាយការណ៍ទៀតថា សមាជិកទីបួន របស់​គណបក្សសង្គ្រោះជាតិ ដើម្បីចូលទៅដឹកនាំគ.ជ.ប អាចជាបុត្រីរបស់លោក កឹម សុខា គឺកញ្ញា កឹម មនោរវិទ្យា។

ដោយឡែក សមាជិកបួននាក់ទៀត ដែលជា«កូតា»របស់គណបក្សប្រជាជនកម្ពុជា ត្រូវបានវិទ្យុ វីអូអេ ដដែល ស្រង់​ការលើកឡើងរបស់លោក ជាម យៀម មន្ត្រីជាន់ខ្ពស់នៃគណបក្សកាន់អំណាច មកបញ្ជាក់ថា អាចជាមន្ត្រី​តុលាការ និងជាមន្ត្រីជើងចាស់ ​ដែលបានកាន់ការនៅ គ.ជ.ប សព្វថ្ងៃនេះ។

យ៉ាងណាក៏ដោយ ការបង្ហើបឲ្យដឹងតែរៀងខ្លួន របស់គណបក្សនយោបាយដ៏ធំទាំងពីរខាងលើ នៅគ្រាន់តែជាការ​បែក​ធ្លាយ​ក្រៅផ្លូវការប៉ុណ្ណោះ។ គេនឹងនៅរងចាំមើល រហូតដល់នាទីចុងក្រោយ ពីសមាសភាព ពីតួនាទីរបស់សមាជិក​ទាំង៩រូបនោះ ថាជានរណាឲ្យពិតប្រាកដ។ ប៉ុន្តែ នរណាមកពីណាឬជាអ្វី មិនសំខាន់ទេ។ រឿងដែលចាំបាច់បំផុតនៅ​ពេលនេះ គេត្រូវ​និយាយ​ពី«សមត្ថភាព និងឯករាជ្យភាព»របស់ក្រុមសមាជិកជ្រើសតាំងទាំងនោះ ដើម្បឲ្យការ​បោះ​ឆ្នោតទាំងឡាយ នៅកម្ពុជាមានយុត្តិធម៌ ភាពសុក្រិត និងអាចទទួលយកបាន៕