យុវតីអាយុ២១ឆ្នាំមួយរូប ត្រូវបានបុរសបីនាក់ ចាប់រំលោភបូក ហើយបន្ទាប់មកត្រូវបានយកទៅព្យួរក ដើម្បីបង្វែរ​សំនុំរឿងថា ជាការធ្វើអត្តឃាត។ អ្វីដែលគួរឲ្យហួសចិត្តនោះ គឺជនម្នាក់ ពីក្នុងចំណោមជនល្មោភកាមទាំងបី មិនមែន​នរណាផ្សេង ដែលនាងមិនដែលស្គាល់នោះឡើយ ព្រោះ«ជាសង្សារបស់នាង»។

ស្ត្រីជាតិប៉ាគីស្តង់មួយរូប។ (រូបថត ឯកសារ)

រំលោភសេពសន្ថវៈ - សំនុំរឿងចាប់រំលោភថ្មី ដែលធ្វើឲ្យរំជួលដល់ប្រទេសប៉ាគីស្ថាន។ យុវតីអាយុ២១ឆ្នាំមួយ ត្រូវ​បានរងនឹងការចាប់រំលោភបូក យ៉ាងសាហាវព្រៃផ្សៃ មុននឹងនាងត្រូវបានជនល្មើស យកទៅព្យួរក។ នេះបើតាមការ​ប្រកាសឲ្យដឹង របស់នគរបាល។

ព្រឹត្តិការណ៍ដែលគេនឹងស្មានមិនដល់នោះ ជនល្មើសម្នាក់ពីក្នុងចំណោមនោះ ជាសង្សារបស់ជនរងគ្រោះ។ យុវជន សាគីប ត្រូវបានកំណត់អត្តសញ្ញាណបាន ហើយបានសារភាពពីហេតុការណ៍ ដែលពួកខ្លួនបានធ្វើ៖ រំលោភ រួច​សម្លាប់។ យុវជននេះ បានទទួលស្គាល់ថា ខ្លួនបានបង្ខំឲ្យយុវតីជាសង្សារបស់ខ្លួន ឲ្យរួមភេទជាមួយនឹងមិត្តភ័ក្រ​របស់​ខ្លួនពីរនាក់ទៀត តែនាងមិនព្រម។

យកទៅព្យួរក ដើម្បីបង្វែងដានថា ជាអត្តឃាត

យុវតីរងគ្រោះ ដែលធ្លាប់ទទួលក្ដីសង្ឃឹមពី សាគីប ថានឹងរៀបអាពាហ៍ពិពាហ៍ជាមួយនាងនោះ ត្រូវបានគេរកឃើញ​ព្យួរក នៅនឹងមែកឈើមួយ នៅព្រឹកថ្ងៃបន្ទាប់។ អ្នកទទួលខុសត្រូវមួយរូបរបស់នគរបាល បានបង្ហាញថា សាកសព​របស់នាងដែលមានស្លាកស្នាមរឹតនៅត្រង់ក ត្រូវបានយកទៅព្យួរក ដើម្បីធ្វើឲ្យគេជឿថា នាងបានធ្វើអត្តឃាត។ អ្នក​ទទួលខុសត្រូវនោះ បានបន្តអះអាងទៀតថា៖ «តែមែកឈើ ដែលបានព្យួរនាងនោះ នៅទាបមែនទែន រហូត​ដល់​សាកសពមានជើងប៉ះដី»។

រហូតមកដល់ពេលនេះ ជនល្មើសពីរនាក់ទៀត កំពុងស្ថិតក្នុងការតាមចាប់ខ្លួននៅឡើយ។

មែកឈើដែលគេបានឃើញចងព្យួរ យុវតីរងគ្រោះ។ (រូបថតនគរបាល)

យុវតីរងគ្រោះ ជាកូនស្រីច្បងគេនៅក្នុងគ្រួសារមួយ ដែលមានបងប្អូន៨នាក់។ ឪពុកម្ដាយរបស់នាង មានភ្នែក​ខ្វាក់​ទាំងគូរ ហើយធ្វើការចិញ្ចឹមជីវិត ដោយការដាំដុះបន្ដិចបន្ដួច។ ឧក្រិដ្ឋកម្មនេះ មានរូបរាងប្រហាក់ប្រហែល​នឹង​ឧក្រិដ្ឋកម្មមួយកាលពីខែមុន នៅប្រទេសឥណ្ឌាជាប់ជិតខាង ដែលយុវតីជំទង់មួយរូបបានរងនូវការរំលោភបូក ហើយ​ត្រូវបានរកឃើញព្យួរក ដូចគ្នានេះដែរ។​ កាលពីខែមីនាកន្លងទៅ នៅក្នុងករណីមួយទៀត យុវតីជំទង់ជាតិប៉ាគីស្ដង់​មួយរូបទៀត អាយុ១៧ឆ្នាំ ដែលរងគ្រោះនឹងការរំលោភបូក បានដុតខ្លួនឯង ដើម្បីសម្ដែងការខឹងសម្បារប្រឆាំង នឹង​ការសម្រេចចិត្ត របស់នគរបាល ដែលបានដោះលែងជនសង្ស័យម្នាក់៕