អ្នកជំនាញចាប់ក្រឡារាំ លោក យ៉នីស ម៉ាស្សល (Yanis Marshall) បានបង្កឲ្យមានការភ្ញាក់ផ្អើល សារជាថ្មី ជាមួយ​នឹងចង្វាក់រាំរបស់លោក ដែលយកលំនាំតាមតារាចម្រៀងអាមេរិក ដ៏ល្បី នាង ប៊ីយ៉ុនស្សេ (Beyoncé)។

លោក យ៉នីស ម៉ាស្សល និងដៃគូរាំរបស់លោក នៅក្នុងក្បាច់រាំថ្មី។ (រូបថតផ្តិតពីវីដេអូ)

ចង្វាក់រាំ - ជាមួយនឹងគូកនរបស់ខ្លួន ទាំងពីរនាក់ កំពូលអ្នករាំរូបនេះ បានបង្ហាញសារជាថ្មីទៀត នូវចង្វាក់លោតហក់ កាច់ចង្កេះយ៉ាងពិសេស គ្រវីគ្រវាត់គ្រប់ល្វែងនៅពីលើស្បែកជើងកែងចោទដ៏ខ្ពស់។ មិនត្រឹមតែយកលំនាភាគច្រើន តាមចង្វាក់រាំរបស់ម្ចាស់សំនៀង ដែលច្រៀងនិងរាំ នៅក្នុងចម្រៀង «ឆ្កួតនឹងស្នេហ៍ (Crazy in love)»  នោះប៉ុណ្ណោះទេ តែបុរសអ្នករាំទាំងបី បានបន្ថែមនូវអ្វីដែលជាចង្វាក់រាំបង្កើតថ្មី របស់ពួកខ្លួនថែមទៀត។

វីដេអូក្បាច់រាំថ្មីនេះ ដែល យ៉នីស ម៉ាស្សល ដាក់ផ្សាយទៅលើគេហទំព័រយូធូប (Youtube) រហូតមកដល់ថ្ងៃនេះ ទើប​នឹងមានអាយុ៥ថ្ងៃប៉ុណ្ណោះ តែបានទទួលមនុស្សចូលទៅទស្សនា ប្រមាណជាជិតប្រាំលានដងទៅហើយ។ ទិដ្ឋភាព​បែបនេះ បង្កផលចំណេញទៅឲ្យទាំងអ្នករាំទាំងបី និងទៅឲ្យនាងប៊ីយ៉ុនស្សេ ខ្លួននាងនោះផង ព្រោះតារាចម្រៀង​រូប​នេះ ត្រៀមនឹងចេញថាសចម្រៀងរបស់ខ្លួន នៅប៉ុន្មានខែខាងមុខ។

សូមបញ្ជាក់ដែរថា ដោយសារគេហទំព័រយូធូបនេះហើយ ទើបនាង ប៊ីយ៉ុនស្សេ បានរកឃើញ នូវអ្នករាំដ៏ជំនាញ​របស់​នាងពីរនាក់ ដែលជាកូនភ្លោះអាយុ២៦ឆ្នាំ ជាតិបារាំង។ ក្នុងពេលបច្ចុប្បន្ន យុវជនទាំងពីរ ម្នាក់ឈ្មោះ ឡារី (Larry) ដែលសម្បូរទៅដោយចលនាឥតខ្ចោះ និងម្នាក់ទៀត ឡូរ៉ង់ (Laurent) ដែលមានមិនចេះខ្វះនូវកាយវិការពិបាកៗនោះ បានដើរតាមនាង នៅគ្រប់ទីកន្លែងសម្ដែងទាំងអស់ នៅក្នុងពិភពលោក។

ដូច្នេះ បើលោកអ្នកមានជំនាញចេះរាំ និងចេះបង្កើតនូវក្បាច់ថ្មីៗពិសេសនោះ អ្នកត្រូវតែមានសង្ឃឹមឡើង៕

សូមទស្សនាវីដេអូ របស់លោក យ៉នីស ម៉ាស្សល ស្ដីពីចង្វាក់រាំថ្មីនេះដូចតទៅ៖