អ្នកចម្រៀងល្បីឈ្មោះ របស់ផលិកម្មហង្សមាស កញ្ញា ពេជ្រ សោភា បានលើកឡើងថា នាងមិនខ្វល់នោះទេ បើទោះ​បីនាងដឹងថា សារដែល ប៉ីប៉ីឌី គម្រាមនោះ ចង់សំដៅ​លើរូបនាងក៏ដោយ ព្រោះអីនាងមិនមានរឿងអាស្រូវ​ដែលត្រូវ​ដេកភ័យនោះទេ។

កញ្ញា ពេជ្រ សោភា អ្នកចម្រៀង របស់ផលិកម្មហង្សមាស។ (រូបថត ហ្វេសប៊ុក)

តារា - តារាហ្វេសប៊ុកដ៏ល្បីឈ្មោះ ក្រោមរហស្សនាម ប៉ីប៉ី ឌី (PeyPey DY) ដែលបច្ចុប្បន្នបានក្លាយជាគូបដិបក្ខ ជា​មួយតារាចម្រៀង របស់ផលិតកម្មហង្សមាស កញ្ញា ពេជ្រ សោភា បានបញ្ជាក់ជាសាធារណៈថា នឹងបើកកកាយ​ដោយមិនសំចៃមាត់ នូវរាល់រឿងអាក្រក់របស់តារាចម្រៀងស្រីម្នាក់ ដើម្បីធ្វើឱ្យតារាស្រីម្នាក់នោះធ្លាក់កូដ ហើយអាច​នឹងប្រឈមនឹងបោះបង់អាជីពសិល្បៈ។

កាលពីម្សិលមិញ តារាហ្វេសប៊ុក ដែលពូកែបង្ហោះសារបាញ់បង្ក្រាបគេឯង បានសរសេរសារមួយ នៅលើទំព័ររបស់​ខ្លួនថា៖ «ចង់អោយពួកញុំ (ខ្ញុំ) ល្បីមែនទេ....??? អរគុណណា តែត្រូវតែមានទៅមានមក ដូច្នេះញុំ ក៏ជួយអោយអ្នក​ល្បីដូចគ្នា ព្រោះអាលូវអ្នកកប់ហើយ ច្រៀងក៏មិនកើត អ្វីដែលជាលក្ខណះពិសេស គឺខាងធ្វើរឿងថោកទាប ចឹងចាំញុំ ជួយផ្សព្វផ្សាយអោយ...!!! មិនបាច់ក្រែងចិត្តទេណា ហើយពួកអ្នកគាំទ្រផ្កាប់មុខហ្នឹង ក៏ចឹងដែរ កុំខឹងញុំ គួរតែ​អរគុណញុំ បានត្រូវ ព្រោះញុំកំពុងជួយអោយ idol របស់អ្នកល្បីឡើងវិញ។»

យ៉ាងណាម៉ិញ ទោះជាសារសរសេរ ដែលពន្លិចឡើងនៅលើជញ្ជាំងហ្វេសប៊ុក របស់តារាហ្វេសប៊ុករូបនេះ មិនបាន​បញ្ជាក់ពីអត្តសញ្ញាណថា ជាតារាម្រៀងស្រីរូបណាក៏ដោយ ប៉ុន្តែគេប្រាកដច្បាស់ណាស់ថា តារា«អាថ៌កំបាំង»នោះ គឺកញ្ញា ពេជ្រ សោភា តារាចម្រៀងប្រចាំផលិតកម្មហង្សមាស។ ការដែលគេប្រាកដថាជាកញ្ញា ពេជ្រ សោភា ដោយ​សារតែពាក្យពេជ្រជាច្រើនរបស់ ប៉ីប៉ី ឌី បានបញ្ជាក់ ពីសាច់រឿងដែលអ្នកទាំងពីនេះ ធ្លាប់រស់នៅជាមួយគ្នា​ដូច​បង​ប្អូន កាលពីលើកមុន ទក្រោយមកក៏មានរឿងបាក់បែកគ្នា។

ការបញ្ចេញសារគំរាម បន្ទាប់ពីបែកធ្លាយរូបថតឱបរឹតគ្នា២សន្លឹក រវាង ប៉ីប៉ីឌី និងប្រុសក្មេងម្នាក់ ត្រូវបានបង្ហោះឡើង​នៅលើគណនីហ្វេសប៊ុកមួយ ដែល ប៉ីប៉ីឌី បានអះអាងថា ជាអតីតគណនីរបស់ខ្លួន តែត្រូវបានតារាចម្រៀងស្រីម្នាក់ យកទៅប្រើប្រាស់ដើម្បីទម្លាយអាថ៌កំបាំង រឿងខ្លួនស្រឡាញ់ភេទដូចគ្នា ព្រមទាំងរៀងបរិហាកេរ្តិ៍តារាផ្សេងទៀត។  ប៉ីប៉ីឌី ទំនងចង់សំដៅថា តារាស្រីចម្រៀង«អាថ៌កំបាំង»នោះ  ជាអ្នកធ្វើឱ្យរូបថតអាក្រាតកាយឱបថើបគ្នា របស់ខ្លួន​បែកធ្លាយ ទើបប្រកាសខ្លួនហែករឿងអាក្រក់របស់នាងតបវិញ ដើម្បីសងសឹក។

គេនៅចាំម្តងថា កាលពីមុន បន្ទាប់ពី ប៉ីប៉ីឌី ចាកចេញពីផ្ទះកញ្ញា ពេជ្រសោភា ប៉ីប៉ីឌីក៏ធ្លាប់បង្ហោះវីដេអូឃ្លីបមួយ ដោយ​ចោទប្រកាន់ថា ពេជ្រ សោភានិយាយដើមខ្លួនដែរ។ ប៉ីប៉ី ឌី បាននិយាយដាក់កញ្ញា ពេជ្រ សោភា ថា៖ «បងឯង​និយាយ​ដើមខ្ញុំណ្នឹង គឺវាអាក្រក់ស្ដាប់ជាងសារព័ត៌មាន ដែលបានចុះ (ពី)ខ្ញុំទៅទៀត»។

ប្រតិកម្មតប នឹងការគម្រាមរបស់ប៉ីប៉ីឌី ទោះមិនបញ្ចេញអត្តសញ្ញាណថា ជាតារារូបណាមួយក៏ដោយ កញ្ញា ពេជ្រ សោភា ក្នុងកិច្ចសម្ភាសជាមួយសាព័ត៌មានក្នុងស្រុកមួយ ដូចជាបានទទួលខ្លួនថា នាងជាតារាចម្រៀង​«អាថ៌កំបាំង»​ម្នាក់ ដែលប្រើគណនីហ្វេសប៊ុកចាស់របស់ ប៉ីប៉ីឌី នោះ។ តារាចម្រៀងល្បី របស់ផលិតកម្មហង្សមាសរូបនេះ បាន​និយាយ ថាបានដឹងពីការគំរាមរបស់ប៉ីប៉ីឌី ប៉ុន្តែនាងមិនចាប់អារម្មណ៍ទេ ដោយសារតែនាងមិនបានធ្វើអ្វីអាក្រក់ ដូច​ដែល ប៉ីប៉ីឌី «កំពុងយល់ច្រឡំ» និងមិនមានរឿងអាក្រក់ណាមួយ ដែលត្រូវភិតភ័យឡើយ។

កញ្ញា ពេជ្រ សោភា បានពន្យល់ថា វាជារឿងសាមញ្ញទៅហើយ ដែលមនុស្សម្នាក់ៗ ពិតជាមានរឿងរ៉ាវអវិជ្ជមាន​ជាប់​ខ្លួន ប៉ុន្តែមកពីរឿងទាំងនោះមិនមែនធ្ងន់ធ្ងរ ទើបអត់ខ្វល់ ហើយងាកមកគិតតែរឿងសិល្បៈ និងបញ្ហាឪពុកឈឺ៕