រដ្ឋមន្ត្រីក្រសួងការងារបណ្ដុះបណ្ដាវិជ្ជាជីវៈ លោក អ៊ិត សំហេង នៅថ្ងៃទី៩ ខែមិថុនានេះ បានចាត់ទុកថារបាយ​ការណ៍របស់​អង្គការ ILO នាពេលកន្លងមកថា មានភាពច្បាស់លាស់ ជាងអ្វីដែលលើកឡើងដោយលោក សម រង្ស៊ី ប្រធានគណបក្សប្រឆាំងនៅកម្ពុជា។

រូបភាពរបស់អង្គការអាយឡូ នៅកម្ពុជា។

វិស័យការងារ - លោក អ៊ិត សំហេង រដ្ឋមន្ត្រីក្រសួងការងារបណ្ដុះបណ្ដាវិជ្ជាជីវៈ បានបង្ហាញនូវការគាំទ្រជាថ្មី ទៅ​លើរបាយការណ៍អង្គការពលកម្មអន្តរជាតិការងារ (ILO) កាលពីពេលថ្មីៗនេះ ទាក់ទងទៅនឹងអត្រានៃអ្នក«អត់» ការងារធ្វើនៅកម្ពុជា មានត្រឹមតែ០,៣ភាគរយនោះ។ ការលើកឡើងនេះ ត្រូវបានធ្វើឡើងនៅទីស្តីការក្រសួងការងារ បន្ទាប់ពីលោករដ្ឋមន្រ្តីត្រឡប់ពីចូលរួមកិច្ចប្រជុំ សន្និបាទរបស់អង្គការពលកម្មអន្តរជាតិការងារ (ILO) លើកទី១០៣ នៅប្រទេសស្វីស។

រដ្ឋមន្រ្តីរូបនេះបានបញ្ជាក់ដូច្នេះថា៖ «របាយការណ៍ ILO ជារបាយការណ៍មានលក្ខណៈអព្យាក្រិត្យ ដែល​អាចជឿ​ទុកចិត្តបាន។ (...) អត្រាឥតការងារធ្វើ បើប្រៀបធៀបប្រទេសយើងនៅក្នុងអាស៊ានមានទាបបំផុត បើប្រៀបធៀប​ទៅយើងមានកម្រិតត្រឹមតែ០,៣ភាគរយតែប៉ុណ្ណោះ នៅក្នុងចំណោមប្រជាពលរដ្ឋយើង។»

ក្នុងរបាយការណ៍អង្គការ ILO ឆ្នាំ២០១៣  ប្រទេសកម្ពុជាសម្រាប់​អាត្រា​គ្មាន​ការងារធ្វើ ទាបជាងគេ តែត្រឹម០,៣ ភាគរយប៉ុណ្ណោះ ពីចំណោមប្រទេសជាសមាជិកអាស៊ានទាំង១០។ ក្នុងនោះប្រទេសជិតខាងនៃកម្ពុជា រួមមាន​ដូច​ជាប្រទេសឡាវមានដល់១,៤ភាគរយ។ ប្រទេសវៀតណាមមាន ១,៩ភាគរយ និងប្រទេសថៃមាន០,៨ភាគរយ។ នេះបើយោងតាមការចុះផ្សាយ របស់គេហទំព័រឌីណេស៊ិន (THE NATION) របស់ថៃ។

លោក សម រង្ស៊ី ប្រធានគណបក្សសង្រ្គោះជាតិ ថ្មីៗនេះក៏បានថ្លែងក្នុងលិខិតមួយ ជាភាសាអង់គ្លេសទៅ​កាន់​ប្រធាន​អង្គការ ILO ប្រចាំកម្ពុជាថា របាយការណ៍អង្គការ ILO នេះមិនឆ្លើយតបទៅនឹងស្ថានការជាក់ស្តែង នៃអត្រាអ្នក​«គ្មាន»​ការងារធ្វើនៅកម្ពុជានោះទេ។ លោកបានចាត់ទុកថា របាយការណ៍នោះមិនត្រឹមត្រូវទេ។ លោកនិយាយថា៖ «(វា)គួរឲ្យសោកស្តាយខ្លាំងណាស់ ក្នុងការអាននូវរបាយការណ៍របស់អង្គការ ILO និង អង្គការអន្តរជាតិ​មួយ​ចំនួន​ទៀត ដូចជា IMF ជាដើម ដែលនៅតែចេញផ្សាយ នូវទិន្នន័យដែលមានលក្ខណៈមួលបង្កាច់ ហើយខុសទាំងស្រុង​ពីអ្វីដែលជាការពិត។»

លោករដ្ឋមន្រ្តីក្រសួងការងារ ដែលទំនងជាចង់«ប្រឆាំង»ទៅនឹងអ្វី ដែលជាការ​លើក​ឡើងដោយគណបក្ស​សង្គ្រោះ​ជាតិផងដែនោះ បានបញ្ជាក់ឲ្យដឹងទៀតថា៖ «បក្សប្រឆាំង មិនដែលថាមានអ្វីល្អ ឬប្រសើរ​សម្រាប់​រាជរដ្ឋាភិបាល សម្រាប់​ប្រជាពលរដ្ឋ គាត់មិនដែលថាល្អទេ។ (...) អ្វីដែលបក្សប្រឆាំងនិយាយ (វា) មិនដែលពិតទេ តែងតែផ្ទុយ​ពី​ការពិត។ (...) ILO គាត់ធ្វើការតាមវិជ្ជាជីវៈឯករាជ្យ គាត់ឃើញល្អ ថាល្អ ហើយមិនមែនដូច​ការ​លើក​ឡើងរបស់បក្ស​ប្រឆាំងនោះទេ។ (...) តើយើងគួរជឿអ្នកណាឥឡូវ គួរជឿបក្សប្រឆាំង ឬគួរជឿ ILO?»៕