របប​យោធា​ថៃ ចង់​ធ្វើ​ឲ្យ​រាស្ត្រ​ថៃ «សប្បាយ» !

ជាមួយនឹងម្ហូបចំណីឲ្យទទួលទានដោយមិនគិតថ្លៃ ភ្លេងតន្ត្រី និងអ្នករាំស្រស់ឆើតឆាយ ... របបយោធាថ្មីនៅថៃ ដែល​បានធ្វើរដ្ឋប្រហារ និងកាន់កាប់អំណាចតាំងពីថ្ងៃទី២២ ខែឧសភាមកនោះ បានកំពុង​ព្យាយាមបញ្ចុះបញ្ចូលទឹកចិត្ត របស់ប្រជាពលរដ្ឋថៃ តាមរយៈយុទ្ធនាការមួយ ដែលរបបនេះហៅថា «ដើម្បីសុភមង្គលរបស់ប្រជាជន»។
Loading...
  • ដោយ: កេសរ កូល ដោយ កេសរកូល (ទាក់ទង៖ [email protected]) - ភ្នំពេញ ថ្ងៃទី៧ មិថុនា ២០១៤
  • កែប្រែចុងក្រោយ: June 11, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ជាមួយនឹងម្ហូបចំណីឲ្យទទួលទានដោយមិនគិតថ្លៃ ភ្លេងតន្ត្រី និងអ្នករាំស្រស់ឆើតឆាយ ... របបយោធាថ្មីនៅថៃ ដែល​បានធ្វើរដ្ឋប្រហារ និងកាន់កាប់អំណាចតាំងពីថ្ងៃទី២២ ខែឧសភាមកនោះ បានកំពុង​ព្យាយាមបញ្ចុះបញ្ចូលទឹកចិត្ត របស់ប្រជាពលរដ្ឋថៃ តាមរយៈយុទ្ធនាការមួយ ដែលរបបនេះហៅថា «ដើម្បីសុភមង្គលរបស់ប្រជាជន»។


អ្នកចម្រៀង និងតន្ត្រីកងទ័ពថៃ ចេញធ្វើប្រតិបត្តិការ«ដើម្បីសុភមង្គលរបស់ប្រជាជន»។ (រូបថត AP)

នយោបាយថៃ - និយាយទៅ «ប្រជាជនថៃមិនសូវបានសប្បាយចិត្តទេ តាំងពី៩ឆ្នាំកន្លងមក។ ខ្ញុំក៏អញ្ចឹងដែរ។ ប៉ុន្តែ​តាំងពីថ្ងៃទី២២ ខែឧសភាមក សុភមង្គលបានត្រឡប់មកវិញ»។ នេះជាការថ្លែងកាលពីពេលថ្មីៗ របស់អគ្គ​មេបញ្ជាការ​កងទ័ពថៃ លោក ប្រាយុទ ចាន់អ៊ូចារ៊ ដែលបានដឹកនាំធ្វើរដ្ឋប្រហារ ទម្លាក់រដ្ឋាភិបាលស្របច្បាប់ ចេញពីការបោះឆ្នោត ហើយបានដាក់របបដឹកនាំយោធាថ្មីមួយ​ ក្រោមផ្លាក«ក្រុុមប្រឹក្សាដើម្បីរក្សាសន្ដិសុខសណ្ដាប់ធ្នាប់ និងកំណែទម្រង់»។

យ៉ាងណាក៏ដោយ ប្រជាជនថៃរាប់សិបរយនាក់ បានចុះមកតាមផ្លូវនានា នៅកណ្ដាលរាជធានីបាងកក ហើយបាន​ចូលរួមជាមួយកម្មវិធីរបស់កងទ័ពនេះ។ ពួកគេបានលើកឡើង ពីចំណាប់អារម្មណ៍របស់ពួកគេតែរៀងខ្លួនៗ។ នៅ​ចំពោះ​ក្រុមសិល្បៈករកងទ័ព ជាច្រើននាក់ ដែលកំពុងប្រគុំតន្ត្រីនៅលើឆាក លោក ជុតិម៉ាក គ្រិតចារើន ពលរដ្ឋរស់​នៅក្នុងរាជធានី បានថ្លែងអំណរឡើងថា «នៅថ្ងៃនេះ សង្គមថៃចាប់ផ្ដើមសើចសប្បាយឡើងវិញ»។

រីឯអ្នកស្រី អារុណី អ៊ុមស៊ីន អាយុ៥៩ឆ្នាំ បានលើកពីក្ដីរំភើបរបស់អ្នកស្រី ដែលអាចចេញមកដើរលេងបាន ដោយគ្មាន​ការព្រួយបារម្ភ នឹងការបាញ់បោះ ឬការវាយប្រហារដោយគ្រាប់បែក ដូចកាលពីមុនពេលធ្វើរដ្ឋប្រហារ។ កំពុងតម្រង់​ជួរ ចូលទៅយកចំណីអាហារដែលមិនគិតថ្លៃ ចែកជូនដោយកងទ័ពនោះ អ្នកស្រីនិយាយថា៖ «ពីមុនគេហៅយើងថា ជាប្រទេសនៃស្នាមញញឹម តែយើងបានធ្លាក់ក្នុងវិបត្តិធ្ងន់ធ្ងរ»។

ប៉ុន្តែទិដ្ឋភាពបែបនេះ ធ្លាប់កើតមានរួចហើយ កាលពីពេលបាតុកម្មប្រឆាំងរដ្ឋាភិបាល របស់លោកស្រី យីងឡាក់ ស៊ីណាវ៉ាត្រា ទាមទារឲ្យលោកស្រីរំលាយរដ្ឋាភិបាល ហើយបង្កើតឲ្យមាន«ក្រុមប្រឹក្សាប្រជាជន» ដែល​មិនចេញ​ពី​ការបោះឆ្នោតមួយឡើង ដូចគ្នាដែរ។ លោកស្រី យីងឡាក់ ដែលជាប្អូនស្រីរបស់លោក ថាក់ស៊ីន ស៊ីណាវ៉ាត្រា បុរស​សំខាន់មួយរូប ស្ថិតនៅក្នុងការស្អប់ខ្ពើមយ៉ាងខ្លាំង ពីសំណាក់ក្រុមប្រឆាំងដែលភាគច្រើន សុទ្ធសឹងជាអ្នកអន្ទ្រើសៗ និងជាក្រុម«អាមាត្រ»ស្និតនឹងរាជបាល្ល័ង្គ។

អពមង្គលនៃប្រជាជាតិ ...

ទោះជាកងទ័ពតាំងខ្លួន ជាអ្នកកណ្ដាលចូលមកដោះស្រាយ វិបត្តិនយោបាយនេះក៏ដោយ ប៉ុន្តែអ្នកវិភាគ​នយោបាយ​ថៃ ជាច្រើនបានរំពឹងរួចជាស្រេច ថាការកញ្ឆក់យកអំណាចដោយយោធានេះ គឺជាអ្វីដែលជាការ​ចង់​បាន​របស់ក្រុម​ប្រឆាំង បូករួមនឹងមេដឹកនាំយោធានេះតែម្ដង។ លោកសាស្ត្រាចារ្យ ធីរិទ្ធនន ពង្សស៊ូឌីរ៉ាក់ (Thitinan Pongsudhirak) មកពីសកលវិទ្យាល័យ ជូឡាឡុងកន នៅរាជធានីបាងកក បានថ្លែងថា៖ «បើមើលទៅលើវិបត្តិនយោបាយ ដែល​កើត​មាននៅទស្សវត្តចុងក្រោយនេះ ប្រជាជនថៃបានជួបនឹងភាពអពមង្គលយ៉ាងច្រើន ហើយកងទ័ពបានដឹងពីរឿងនេះ​ច្បាស់ណាស់។ ប៉ុន្តែគែមិនអាចដោះស្រាយ បញ្ហាអពមង្គលរបស់ប្រជាជាតិ ដោយគ្រាន់តែធ្វើយុទ្ធនាការច្រៀងរាំ និងចែកបាយដោយឥតគិតថ្លៃដូច្នេះឡើយ។»

កាលពីចុងសប្ដាហ៍នេះ របបយោធាបានចាប់ខ្លួនមេដឹកនាំប្រឆាំងរដ្ឋប្រហារមួយរូប លោក សម្បត្តិ ប៊ូនញ៉ាម៉ានុង (Sombat Boonngamanong) ដែលល្បីឈ្មោះតាមបណ្ដាញសង្គម តែងតែអំពាវនាវឲ្យមានការងើបឡើង ជំទាស់នឹង​ការហាមឃាត់បំបិទសិទ្ធិនានា។ ប៉ុន្តែលោក សម្បត្តិ មិនមែនជាមនុស្សតែម្នាក់ឯងទេ ដែលត្រូវបានចាប់ឃាត់ខ្លួន ដោយរបបយោធា ព្រោះបណ្ដាជនរាប់រយនាក់ផ្សេងទៀត ក្នុងនោះអ្នកនយោបាយ បញ្ញាជន និងអ្នកសារព័ត៌មាន ត្រូវ​បានកោះហៅនិងឃាត់ខ្លួនដោយកងទ័ពទាំងអស់។ បើទោះជាអ្នកទាំងនោះមួយចំនួន រួមទាំងលោកស្រី យីងឡាក់ ស៊ីណាវ៉ាត្រាផង ត្រូវបានដោះលែងមកវិញក៏ដោយ តែរបបយោធាបានបង្ខំអ្នកទាំងនោះ ឲ្យធ្វើកិច្ចសន្យាមួយ ឲ្យឈប់​ធ្វើ«នយោបាយ»ឬការតវ៉ាផ្សេងៗ៕

រូបភាពខាងក្រោមនេះ ឆ្នៃប្រឌិតដោយ ក្រុមអ្នកតវ៉ាថៃ និងផ្សព្វផ្សាយនៅលើបណ្ដាញសង្គម៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...