អតីតតារាបាល់ទាត់របស់ប្រទេសអាហ្សង់ទីន ឌីយ៉េហ្គូ ម៉ារ៉ាដូណា (Diego Maradona) បានបើកកកាយ ប្រឆាំង​សហព័ន្ធបាល់ទាត់អន្តរជាតិ ហៅកាត់ថាហ្វីហ្វា (Fifa)​ ទាក់ទងនឹងអំពើ«រត់ការក្រោមតុ» នៅក្នុងសំនុំរឿងប្រគល់​សិទ្ធិ​អំណាចឲ្យប្រទេសកាតា រៀបចំការប្រកួតបាល់ទាត់ ដណ្ដើមពានរង្វាន់ពិភពលោក នៅឆ្នាំ២០២២ខាងមុខ។ អតីត​តារាបាល់ទាត់រូបនេះ ថែមទាំងទទូចឲ្យមានការស៊ើបអង្កេត ប្រឆាំងនឹងអ្នកដែលទទួលសំណូក«ក្រោមតុ» ទៅកាន់​តុលាការនោះទៀត។

កីឡាករ ម៉ារ៉ាដូណា លើកពានបាល់ទាត់ពិភពលោក ឲ្យប្រទេសអាហ្សង់ទីន នៅឆ្នាំ១៩៨៦។ (រូបថត AP)

បាល់ទាត់ពិភពលោក - លោក ម៉ារ៉ាដូណា បានថ្លែងកាលពីថ្ងៃអាទិត្យទី៨ ខែមិថុនានេះ ក្នុងនាមជា​រដ្ឋទូត​កីឡា​នៅ​ក្នុងប្រទេសអារ៉ាប់រួម ថា៖ «មានសំណូកនៅក្រោមតុយ៉ាងធំសម្បើម ទៅឲ្យសហព័ន្ធបាល់ទាត់អន្តរជាតិ ហ្វីហ្វា ហើយ​គេត្រូវពិនិត្យមើលគណនីរបស់អ្នកទទួលខុសត្រូវទាំងឡាយ ជាពិសេសអ្នកដែលកាន់សំនុំឯកសារ បាល់ទាត់​ពិភព​លោកឆ្នាំ២០២២ នៅប្រទេសកាតា»។

នៅក្នុងកិច្ចសម្ភាសជាមួយកាសែតចេញប្រចាំថ្ងៃមួយ របស់ប្រទេសអារ៉ាប់រួម កំពូលតារាបាល់ទាត់ ដែលបាន​ដណ្ដើមជើងឯកពិភពលោក ឲ្យប្រទេសអាហ្សង់ទីនក្នុងឆ្នាំ១៩៨៦នោះ បានអះអាងទៀតថា សំណូកក្រោមតុនេះ បានកើតឡើងរាប់សិបឆ្នាំមកហើយ​ នៅហ្វីហ្វា។

អតីតកីឡាករអាយុ៥៣ឆ្នាំរូបនេះ នឹងត្រូវទៅចូលរួមក្នុងព្រឹត្តិការណ៍ ប្រកួតបាល់ទាត់ពិភពលោកឆ្នាំ២០១៤ របស់​សហព័ន្ធបាល់ទាត់អន្តរជាតិ (ហ្វីហ្វា) ចាប់ពីថ្ងៃព្រហស្បត្តិ៍ទី១២ ខែមិថុនានេះ នៅប្រទេសប្រេស៊ីល ក្នុងនាមលោក​ជាអ្នកធ្វើអត្ថាធិប្បាយនៃការប្រកួត ឲ្យស្ថានីយ៍ទូរទស្សន៍មួយ របស់ប្រទេសវ៉េណេហ្សុយអេឡា។

លោកបានរំពឹងពីក្ដីសង្ឃឹមថា «បាល់ទាត់គួតែត្រូវបានរក្សានូវឬសគល់ដើមរបស់វា ជាកីឡា ប៉ុន្តែត្រូវដាក់វានៅ​ឲ្យ​ឆ្ងាយពីអំពើស៊ីសំណូក សូកប៉ាន់ និងអំពើពុករលួយ ដែលធ្វើឲ្យបាល់ទាត់ធ្លាក់ចុះខ្សោយ របៀបដូចសព្វថ្ងៃ»។

កំពូលតារាបាល់ទាត់ បានបរិហាទៀតថា មនុស្សពិសេសៗមួយចំនួន ដូចយ៉ាងអតីតកំពូលកីឡាករពិភពលោក ជនជាតិបារាំង លោក មីឆែល ប្លាទីនី (Michel Platini) បានទម្លាក់«អម្រែកគោលការណ៍»នេះចោល ដោយសារតែ​លោក ប្លាទីនី ត្រូវបានគេដាក់ឲ្យឈរឈ្មោះ សម្រាប់ការជ្រើសតាំងមេដឹកនាំហ្វីហ្វាថ្មី ជំនួសជនជាតិស្វីសសព្វថ្ងៃ លោក ចូសេហ្វ ប្លាស្ទ័រ (Joseph Blatter)។

ប្រទេសកាតាវិញ បានបដិសេធដាច់អហង្កា នូវរាល់ការចោទ​ប្រកាន់​ទាំង​ឡាយ ដែលទាក់ទងនឹងការ​ប្រគល់សិទ្ធិ​អំណាចឲ្យខ្លួន រៀបចំការប្រកួតបាល់ទាត់ ដណ្ដើមពានរង្វាន់ពិភពលោក នៅឆ្នាំ២០២២ ថាពោរពេញ​ទៅដោយ​អំពើ​ពុករលួយ។ ការសែតអង់គ្លេស Sunday Times ធ្លាប់បានបើកកកាយរឿងនេះ ដោយសំអាងលើសារអេឡិចត្រូនិក​ជាច្រើនសិប និងឯកសារផ្សេងទៀតផង មកបញ្ជាក់ថា ការផ្ទេរប្រាក់ដែលមានទំហំយ៉ាងធំសម្បើម ត្រូវបាន​ធ្វើដោយ​ជនជាតិកាតាមួយរូប ដើម្បីឈានទៅដល់ការប្រគល់សិទ្ធិឲ្យរៀបចំការប្រកួតនេះ៕