ប្រធានសម្ព័ន្ធសហជីពប្រជាធិបតេយ្យ កម្មករកាត់ដេរកម្ពុជា លោក អាត់ ធន់ បានថ្លែងអះអាងថា សេចក្តីព្រាង​ច្បាប់​សហជីព ដែលក្រសួងការងារ និងភាគីពាក់ព័ន្ធ កំពុងធ្វើការពិភាក្សាដេញដោល ក្នុងពេលបច្ចុប្បន្ននេះ គឺជាច្បាប់​មួយ​បង្កើតឡើង ដើម្បីរិតត្បិតសេរីភាពកម្មករនិយោជិក។ ប៉ុន្តែសម្រាប់រដ្ឋមន្ត្រីក្រសួងការងារវិញ បានថ្លែងថា វានៅមិន​ទាន់ហួសពេលនៅឡើយទេ ក្នុងការជជែកវែកញែកទៅលើ សេចក្ដីព្រាងច្បាប់នេះ។

ច្បាប់ - ក្នុងបទសម្ភាសជាមួយអ្នកសារព័តមាន នៅថ្ងៃទី២៨ ខែឧសភានេះ ស្របពេលដែលច្បាប់​សហជីព​ស្ថិត​នៅ​ក្នុងការពិគ្រោះយោបល់នៅឡើយ លោកអាត់ ធន់ បានឱ្យដឹងថា លោក​ក៏ដូចជាសហជីពផ្សេងទៀត មិនចង់ឱ្យមាន​ច្បាប់នេះនោះទេ ព្រោះបើកាលណាមានច្បាប់ នឹងត្រូវរិតបណ្តឹងសកម្មភាពរបស់សហជីពហើយ ម្យ៉ាងទៀត​ច្បាប់​នេះ​គឺជាកាស្នើឡើងរបស់និយោជក ដើម្បីដាក់កំហិត និងការត្រួតពិនិត្យ ឱ្យបានតឹងរ៉ឹងលើសហជីព។

លោកអធិប្បាយបន្តថា ច្បាប់នេះអាចនឹងធ្វើឱ្យសហជីពខ្សោយ ដោយលោកបានពិនិត្យទៅលើមាត្រាមួយចំនួន​ ឃើញ​ថា មានការរិតត្បិត និងការដាក់សម្ពាធមកខាងសហជីព។ ប្រធានសម្ព័ន្ធសហជីពប្រជាធិបតេយ្យ​កម្មករ​កាត់​ដេរ​កម្ពុជារូបនេះ បានពន្យល់យ៉ាងដូច្នេះថា៖ «ដូចជានៅក្នុងមាត្រា៣ គឺយើងមានស្នើឱ្យបញ្ចូលមន្រ្តីរាជការ ក៏ដូចជា​កម្មករ​សេដ្ឋកិច្ចក្រៅប្រព័ន្ធ ដើម្បីបង្កើតសហជីព ប៉ុន្តែមកដល់ឃើញសេចក្តីពង្រាងនេះ មិនឃើញទេនៅដដែល»។

«នៅមាត្រា១០មានន័យថា ដាក់កំហិតឱ្យមានចាប់ពី២០ភាគរយនៃកម្មករ ទើបអាចបង្កើតសហជីពបាន ហើយយើង​ទៅរកឯណាសមាជិក២០ភាគរយបើយើមិនទាន់បង្កើតសហជីពបានផង អាហ្នឹងគឺជាបញ្ហាមួយ។ ហើយបើយើង​ ចង់បង្កើតសហព័ន្ធ ទាល់តែមានសហជីពមូលដ្ឋាន១៥ អញ្ចឹងតើទៅរក១៥មកពីណា ហើយបើចង់បង្កើត​សហភាព​ទាល់តែមានសហព័ន្ធ១០ទៀត។»

លោកបញ្ជាក់បន្ថែម ការកំណត់ចំនួន គឺការផ្ទុយទៅនឹងអនុសញ្ញាលេខ៨៧ ដែលបានបញ្ជាក់សិទ្ធិ នៃការបង្កើត​សហជីពគ្មានការជ្រៀតជ្រែក និងគ្មានការត្រួតពិនិត្យដោយភាគីណាមួយនោះទេ ព្រោះវាជាសិទ្ធិរបស់កម្មករ​ក្នុង​ការ​លើកតម្កើងសិទ្ធិសេរីភាពរបស់ខ្លួន។

ចំណែកបញ្ហាមួយទៀត នៅក្នុងមាត្រា១៦ ដែលនិយាយពីការចុះបញ្ជីសហជីព ត្រូវបានប្រធានសហជីបដ៏ល្បីឈ្មោះ អះអាងថា មានភាពមិនប្រក្រតី ព្រោះក្រសួងអាចមានហេតុផលមួយចំនួន ក្នុងការពន្យាពេលមិនចុះបញ្ជីបាន ដូច​ជា​ការពិនិត្យមើលមានភាពមិនត្រឹមត្រូវ មិនឯករាជ្យស្ថិតក្រោមឥទ្ធិពលអ្វីមួយ ឬក៏មានឯកសារមិនគ្រប់គ្រាន់ជាដើម។ លោកបន្តថា៖ «នៅពេលបច្ចុប្បន្ននេះ មិនទាន់មានច្បាប់ហ្នឹងផង ក្រសួងពន្យាពេលមិនចុះបញ្ជី ចុះទម្រាំមាន​ច្បាប់​បានន័យថា ក្រសួងមានហេតុផលច្រើនណាស់ ដែលពន្យាពេលមិនចុះបញ្ជី អញ្ចឹងវាធ្វើឱ្យមានការស្មុកស្មាញ។»

«ហើយនៅមាត្រា៦៦ និយាយពីការអនុវត្តមិនត្រឹមត្រូវរបស់សហជីព អញ្ចឹងបើគ្រាន់តែកម្មករប្រមូល​សមាជិក​ធ្វើ​កូដកម្ម ហើយយើងមិនពេញនឹងអនុសញ្ញារួម ឬការចរចាអីមិនបាននោះ គឺត្រូវដាក់នៅក្នុងការអនុវត្តមិនត្រឹមត្រូវ។ ហើយបើនិយាយ ពីទោសវិន័យនៅក្នុងមាត្រា៧៨ កាលណាកម្មករធ្វើកូដកម្មខុសនិតិវិធី គេព្យួរបញ្ជីការរយៈពេល​២ខែ ហើយនៅតែបន្តនឹងព្យួរ៦ខែ ហើយនៅតែបន្តទៀតព្យួរ១២ខែ ហើយចុងក្រោយអាចនឹងរំលាយចោល អង្គការ​វិជ្ជាជីវៈនេះចោលតែម្តង។» នេះជាការបញ្ជាក់បន្ថែមរបស់លោក អាត់ ធន់។

ឆ្លើយតបនឹងបញ្ហាខាងលើនេះលោក អ៊ិត សំហេង រដ្ឋមន្រ្តីក្រសួងការងារបានបញ្ជាក់ថា ការរៀបចំបង្កើតច្បាប់នេះ មិនមែនជាការកាត់បន្ថយសិទ្ធិសេរីភាពទេ តែជាការពង្រឹងសហជីពឱ្យកាន់តែប្រសើឡើង។ រដ្ឋាភិបាល​ គ្មានគំនិតអ្វី ទៅរិតបណ្តឹងសិទ្ធិសេរីភាពសហជីពនោះទេ។ លោករដ្ឋមន្ត្រី បានថ្លែង​ថា៖ «ដូច​ប្រសាសន៍សម្តេចតេជោ គាត់​បាន​លើកហើយ ថាកម្ពុជាបានចាត់ទុកការអនុវត្តសិទ្ធិសេរីភាពសហជីព និងសិទ្ធិកម្មករនិយោជិតនេះ គឺជាសិទ្ធិមនុស្ស​នៅកម្ពុជា។ (...)  សិទ្ធិសេរីភាពសហជីពនៅកម្ពុជា ពិតជាមានលក្ខណៈទូលំទូលាយខ្លាំងណាស់។»។

លោក អ៊ិត សំហេង បានស្នើរបន្ថែមថា៖ «បើមានអ្នកណានិយាយថា ច្បាប់នេះគាបអ្នកនេះអ្នកនោះ នៅក្នុងពេលនេះ​ ជារឿងមួយដែលឆាប់រហ័សពេក។ អញ្ចឹងទេ ខ្ញុំស្នើថាភាគីនិមួយៗ នៅមានឱកាសក្នុងការពិភាក្សា នៅដំណាក់​កាល​ពិគ្រោះយោបល់ នៅក្នុងសេចក្តីព្រាងច្បាប់នេះ»៕