ការក្រោកឡើងរបស់ប្រជាពលរដ្ឋពីខេត្តក្រចេះ មកកាន់រាជធានីភ្នំពេញ រឿងដីធ្លី ដែលអាជ្ញាធរបានរឹបអូស​ យកទៅ​ឲ្យក្រុមហ៊ុនវៀតណាមមកទល់នឹងពេលនេះ បានបង្កឲ្យមានប្រតិកម្មបានលេចចេញមកជាបន្តបន្ទាប់។ ប៉ុន្តែសម្រាប់​លោក ខាន់ ចំណាន អភិបាលរងខេត្តក្រចេះ នៅ​តែប្រកាន់ជំហរថា គឺប្រជាពលរដ្ឋទាំងនោះទៅវិញទេ ដែលជាអ្នក​«ទន្ទ្រានយកដីរដ្ឋ» មិនមែនរដ្ឋយក​ដីរបស់​ពួកគាត់​ឡើយ។

លោក ខាន់ ចំណាន អភិបាលរងខេត្តក្រចេះ។ (រូបថត MONOROOM.info/ O. Vary)

វិបត្តិដីធ្លី - ក្នុងកិច្ច​សម្ភាសជាមួយអ្នកសារព័ត៌មាន នាបរិវេណវត្តសាមគ្គីរង្សី រាជធានីភ្នំពេញ ក្នុងនាមជា​អភិបាល​រងខេត្តក្រចេះ និងជាអ្នកតំណាងមកសម្របសម្រួល ជាមួយប្រជាពលរដ្ឋនោះ លោក​ខាន់ ចំណាន  បាននិយាយ​ថា អាជ្ញាធរនិងប្រជាពលរដ្ឋដែលមានបញ្ហា ត្រូវតែធ្វើការ​ដោះស្រាយ​គ្នា និងរិះរកមធ្យោបាយណា ដែលនឹង​ត្រូវធ្វើជា​បន្តទៀត។ លោកបញ្ជាក់ថា «មានបញ្ហាត្រូវតែដោះស្រាយ។ ពេលនេះ ស្ថិតនៅក្នុងដំណើរការដោះស្រាយរបស់​ថ្នាក់ជាតិ ខ្ញុំជាសមាជិកគ្រាន់តែទទួលយកការណែនាំ និងផ្តល់​នូវព័ត៌មានផ្សេងៗ ជាមួយនឹងការទទួលព័ត៌មាន​ឲ្យ​បានអស់​នូវឬសគល់នៃបញ្ហា។»

ជាមួយនឹងបញ្ហាចំណាកស្រុក របស់ប្រជាពលរដ្ឋពីខេត្តក្រចេះ ដើម្បីស្នើដល់រដ្ឋាភិបាលថ្នាក់លើជួយអន្តរាគមន៍នោះ លោកបានមិនបដិសេធ តែក៏មិនធ្វើការឆ្លើយតបយ៉ាងណានោះដែរ លោកគ្រាន់តែបញ្ជាក់ថា ដីចំណុចដែលមាន​ទំនាស់ជាមួយប្រជាពលរដ្ឋនោះ ជាដីព្រៃ«ស្រោង»របស់រដ្ឋ ដែលប្រជាពលរដ្ឋបាននាំគ្នាកាប់ទន្ទ្រានយកធ្វើកម្មសិទ្ធិ ដោយគ្មានការអនុញ្ញាតិឡើយ។ «ដីដែលពួកគាត់ (ប្រជាពលរដ្ឋកាប់រាន ទន្ទ្រានយក ជាដីព្រៃរក្សាទុករបស់រដ្ឋ។ ព្រៃប្រភេទព្រៃស្រោងនេះ យើងមិនបានផ្តល់ឲ្យក្រុមហ៊ុនធ្វើការវិនិយោគទេ។ (....) យើងក៏បានធ្វើការ​អប់រំណែនាំ​ពួកគាត់ ចាប់តាំងពីចុងឆ្នាំ២០១២មក ក្រោយពេលប្រកាសបទបញ្ជាលេខ០១មក។ យើងបានធ្វើការ​ផ្សព្វផ្សាយ​ច្រើន​ណាស់ មិនអាចឲ្យធ្វើការកាប់ទន្ទ្រានដីព្រៃរបស់រដ្ឋទេ។ (...) ដីនោះមានទំហំជាង៤០០ហិកតា ហើយចំណុចដែល​ពួកគាត់កាប់នោះមានចំនួនជិត២០០ហិកតា ឯព្រៃដែលពួកគាត់កាប់នោះអស់ជា៧៥០ហិកតាហើយ។»

លោកបានបន្ថែមថា តាមការណែនាំពីប្រមុខរាជរដ្ឋាភិបាល អាជ្ញាធរបានធ្វើការអំពាវនាយឲ្យមានការគោរពច្បាប់ ទាំងច្បាប់ព្រៃឈើ និងច្បាប់ភូមិបាលទៅដល់ប្រជាពលរដ្ឋទាំងនោះ។

ប្រជាពលរដ្ឋពីខេត្តក្រចេះដែលរងគ្រោះ​ទាំង​នោះ តែងតែចោទប្រកាន់ទៅលើក្រុមអាជ្ញាធរមួយចំនូន ដែលឆ្លៀត​កេងចំណេញពីបទបញ្ជាលេខ០១ ចុះថ្ងៃទី៧ ខែ​ឧសភា ឆ្នាំ២០១២ ទាំងដីព្រៃ និងដីលំនៅដ្ឋាន ដែលជាកម្មសិទ្ធិ​របស់ប្រជាពលរដ្ឋ ទៅលក់ឲ្យក្រុមហ៊ុនយួនដាំកៅស៊ូ និងមិនមានការសងនូវសំណងណាមួយឡើយ។ ជាងនេះ​ទៅ​ទៀតក៏បានរុញ ឈូស ឆាយកំទេចនូវផ្ទះសម្បែង​ដែល​ជាជំរកប្រចាំថ្ងៃ របស់ប្រជាពលរដ្ឋក្រីក្រទៀតផង។

ឆ្លើយទៅនឹងករណីខាងលើ លោកអភិបាលរងខេត្តក្រចេះរូបនេះបានធ្វើការបដិសេធចោល ដោយមិនទទួល​យក​ការចោទប្រកាន់ទាំងនោះទេ។ លោកបានអះអាងផ្ទុយពីនេះយ៉ាងដូច្នេះថា «កិច្ចប្រតិបត្តិការទៅលើព្រៃរក្សាទុក ជា​កាតព្វកិច្ចរបស់អាជ្ញាធររដ្ឋ។ អាជ្ញាធររដ្ឋមានក្រុមអន្តរាគមន៍ពិសេស ដែលជាក្រុមចម្រុះថ្នាក់ខេត្ត និងថ្នាក់ស្រុក​បាន​ចុះធ្វើអន្តរាគម ដោយសារតែជាព្រៃរក្សាទុក។ (...) អាជ្ញាធរចាំបាច់ត្រូវតែគោរពច្បាប់ស្តីពីព្រៃឈើ និងបទបញ្ជារបស់​រាជរដ្ឋាភិបាល ក្នុងការការពារព្រៃ ក៏ដូចជាដី របស់រដ្ឋ។»

លោកបានបញ្ជាក់ថា ក្រុមការងាររបស់លោក តែងតែធ្វើការផ្សព្វផ្សាយ ទៅដល់ប្រជាពលរដ្ឋ​ទាំង​អស់​ដែលខ្វះខាតដី ឲ្យដាក់ពាក្យស្នើសុំដីសម្បទានសង្គមកិច្ច ដើម្បីរដ្ឋមានវិធានការជួយដោះស្រាយ។ លោកបន្តថាសព្វថ្ងៃនេះ អាជ្ញាធរ​កំពុងតែរៀបចំដីសម្បទានសង្គមកិច្ច ប្រមាណចាង៧០០ពាក់ហិកតាទៀតនៅក្នុងស្រុកសំបូរ ខេត្តក្រចេះ។ «រឿង​ដី​ខេត្តក្រចេះមិនខ្វះទេ ប៉ុន្តែមិនអាចទៅរៀបចំ តាមការចង្អុលបង្ហាញ របស់ពួកគាត់ទេ។ រដ្ឋមានផែកការ​ច្បាស់​លាស់​របស់រដ្ឋ។ ដីដែលយើងកំពុងរៀបចំនេះ ជាដីសម្បទានសេដ្ឋកិច្ច ដែលរាជរដ្ឋាភិបាលបានលប់ពីក្រុមហ៊ុន​សម្បទាន​សេដ្ឋកិច្ច ក្នុងស្រុកសម្បូរណ៍។»៕