ជាទូទៅ បុរសជាប្ដីច្រើនតែមិនទុកឲ្យភរិយា ដែលមានគ៌ភរបស់ខ្លួន ធ្វើដំណើរតែឯង ឬបើករថយន្ដដោយផ្ទាល់ខ្លួន​នោះទេ។ តែជាមួយនឹងការសិក្សារបស់សមាគមវេជ្ជសាស្រ្តមួយ នៅប្រទេសកាណាដា បានបង្ហាញថា កាយវិការ​របស់​បុរស​ជាប្ដី ជា​រឿងមួយដ៏ត្រឹមត្រូវ ព្រោះដោយសារតែស្រ្តីមានផ្ទៃពោះ  អាចនឹងងាយបង្កគ្រោះថ្នាក់ចរាចរណ៏ ច្រើនជាង​ស្រ្តីដទៃទៀត។

អនាគតម្ដាយមួយរូប បើករថយន្ដ។ (រូបថ MONOROOM.info/ D.KEO)

សុខភាព - អ្នកស្រាវជ្រាវជាច្រើន ដែលមានឯកទេសខាងទារក នៅខេត្ត អនតារីយ៉ូ (Ontario) ប្រទេសកាណាដា ក្នុងអំឡុងពេល៥ឆ្នាំនៃការសិក្សា បានរកឃើញថា ស្រ្តីដែលមានផ្ទៃពោះ៦ខែ ងាយរងគ្រោះថ្នាក់ចរាចរណ៏ គំរាម​គំហែងដល់អាយុជីវិតកើនឡើង រហូតដល់៤២ភាគរយ។ មូលហេតុទាំងនោះ ត្រូវបានអ្នកស្រាវជ្រាវ ជឿជាក់ថា ដោយសារស្រ្តីមានផ្ទៃពោះ មានបញ្ហាច្រើនជាងស្រ្តីគ្មានផ្ទៃពោះ ដូចជាខ្សោយកម្លាំង ជំងឺធ្លាក់ទឹកចិត្ត ឈឺពោះ និងរាងកាយ។

លោកវេជ្ជបណ្ឌិត ដូណាឌ រ៉េដូម៉ែលដឺ (Donald Redelmeier) ដែលបានដឹកនាំនិពន្ធ និងជាអ្នកស្រាវជ្រាវម្នាក់ នៃ​សាកលវិទ្យាល័យ តូរ៉ូនតូ ផ្នែកថ្នាំពេទ្យ បាននិយាយថា តាមស្ថិតិជាច្រើនបានបង្ហាញថា ស្រ្តីមានផ្ទៃ​ពោះងាយ​រង​គ្រោះថ្នាក់ចរាចរណ៏ ជាងការស្លាប់កំឡុងពេលឆ្លងទន្លេ។

ដូច្នេះ តើស្រ្តីដែលមានផ្ទៃពោះ គួរបញ្ជប់ការបើកបររបស់ខ្លួនឬ?

លោក វេជ្ជបណ្ឌិត រ៉េដូម៉ែលដឺ បាននិយាយថា៖ «អ្វីដែលពួកយើងមិនបាននឹកឃើញនោះ គឺយើងគួរតែឲ្យភារកិច្ចនេះ ទៅបុរសជាប្ដី ជាអ្នកកាន់ចង្កូតរថយន្ដវិញ»។ ប៉ុន្តែយ៉ាងណាក៏ដោយ លោក នៅតែនិយាយថា បុរសៗ ដែលស្ថិត​នៅ​ក្នុងចង្កោមអាយុស្របាលគ្នា នៅតែមានអត្រាគ្រោះថ្នាក់ចរាចរណ៍ ច្រើនជាងស្ត្រីដែរ៕