បន្ទាប់ពីបានប្រកាសរដ្ឋប្រហារដោយអគ្គមេបញ្ជាការកងទ័ពជើងគោក លោក ប្រយុទ ចាន់អ៊ូចារ កាលពីរសៀល​ថ្ងៃទី២២ ខែឧសភានេះមក អ្នកនាំពាក្យកងទ័ពថៃ បានចេញមកប្រកាសនៅយប់ថ្ងៃដដែលនេះ ពីការព្យួររដ្ឋធម្មនុញ្ញ​របស់ប្រទេស លើកលែងតែជំពូកដែលមានចែងពីព្រះមហាក្សត្រ។ របបយោធាមួយ ត្រូវបានដាក់ឲ្យកាន់អំណាច​នៅថៃចាប់ពីថ្ងៃនេះតទៅ។

អគ្គមេបញ្ជាការកងទ័ពជើងគោកថៃ លោកឧត្ដមសេនីយ៍ ប្រាយុទ ចាន់អូចា។

នយោបាយថៃ - «កងទ័ពព្យួររដ្ឋធម្មនុញ្ញ លើកលែងតែជំពូកដែលចែងពីរាជានិយម» នេះជាការប្រកាសរបស់អ្នក​នាំពាក្យកងទ័ពថៃ នៅតាមកញ្ចក់ទូរទស្សន៍ នៅយប់ថ្ងៃព្រហស្បត្តិ៍ទី២២ ខែឧសភានេះ បន្ទាប់ពីលោក ប្រាយុទ ចាន់អ៊ូចារ អគ្គមេបញ្ជាការកងទ័ពជើងគោកថៃ ប្រកាសធ្វើ​រដ្ឋប្រហារទម្លាក់រដ្ឋាភិបាលចាំផ្ទះ កាលពីរសៀល​ថ្ងៃ​ដដែល។

អ្នកនាំពាក្យកងទ័ពបានបញ្ជាក់ នៅក្នុងសេចក្ដីប្រកាសរបស់ខ្លួនទៀតថា ការព្យួររដ្ឋធម្មនុញ្ញនិឹងអនុញ្ញាតឲ្យ កងទ័ព​ដឹកនាំប្រទេសថៃ ដោយ«សម្រួល»។ «ព្រឹទ្ធសភាមានដំណើរការធម្មតា តែរដ្ឋាភិបាលត្រូវបានផ្អាកទុក»។

នៅមុននេះបន្តិច បន្ទាប់ពីប្រកាសពីការធ្វើរដ្ឋប្រហាររួចហើយនោះ កងទ័ពថៃបានប្រកាសនឹងផ្ទុះអាវុធ ចាប់ពីថ្ងៃនេះ​តទៅ អនុវត្តទៅលើនរណាក៏ដោយ ដែលល្មើសនឹងការហាមឃាត់នេះ។ «មិនមានការលើកលែងណាមួយ ត្រូវបាន​អនុញ្ញាតឲ្យចេញពីផ្ទះរបស់ខ្លួន រវាងពីម៉ោង១០យប់ ទៅដល់ម៉ោង៥ភ្លឺ»។

គ្រប់ការផ្សាយទាំងឡាយ រាប់ទាំងទូរទស្សន៍ និងវិទ្យុ ត្រូវបានបញ្ជាឲ្យផ្អាក ជាពិសេសបញ្ឈប់នូវកម្មវិធីប្រចាំថ្ងៃ​របស់​ពួកគេ ប៉ុន្តែត្រូវ​ចាក់ផ្សាយពីអ្វី​ ដែលជាសេចក្ដីប្រកាសព័ត៌មានរបស់កងទ័ព និងរបបដឹកនាំ។

ដូចយើងបានជម្រាបជូន ក្នុងអត្ថបទមុនរួចហើយថា មេដឹកនាំបាតុកម្មរបស់ភាគីទាំងសងខាង ត្រូវបានកងទ័ពនាំខ្លួន​ចេញទៅ បន្ទាប់ពីពួកគេបានចេញពីជំនួបចរចាគ្នា ដែលជិតឈានទៅដល់ការព្រមព្រៀងគ្នាហើយនោះ។

នៅក្នុងសេចក្ដីប្រកាសព័ត៌មាន របស់អ្នកនាំពាក្យដដែល បានឲ្យដឹងទៀតថា កងទ័ពហាមឃាត់នូវរាល់ការជួបជុំ​នយោបាយ ចាប់ពី៥​នាក់ឡើងទៅ។ «នរណាក៏ដោយ ដែលរំលោភលើការហាមឃាត់នេះ នឹងត្រូវចាប់ដាក់​ពន្ធនាគារ​មួយឆ្នាំ ឬពិន័យជាប្រាក់១០ពាន់បាត ឬទោសពិន័យទាំងពីរខាងដើម»៕