រដ្ឋាភិបាលកម្ពុជាបានធ្វើការបដិសេធភ្លាមៗ ចំពោះការចោទរបស់គណបក្សប្រជាធិបតេយ្យ ជាគណបក្សជំទាស់​ធំជាងគេរបស់ប្រទេសថៃ ដែលបានចោទប្រកាន់ថា ពលរដ្ឋកម្ពុជាមានជាប់ពាក់ព័ន្ធ​នឹងការបាញ់សម្លាប់មេដឹកនាំ​ក្រុមអាវលឿងដ៏សំខាន់មួយរូបកាលពីពេលថ្មីៗនេះ។ ការចោទប្រកាន់ដោយគណបក្សជំទាស់ថៃនេះ ត្រូវបាន​រដ្ឋាភិបាលកម្ពុជា ចាត់ទុកថាវាគ្រាន់តែជាសម្តីរបស់បុគ្គលម្នាក់ និងគ្នានមូលដ្ឋានច្បាស់លាស់។

លោកស៊ូថេប ថងស៊ូបាន មេដឹកនាំបាតុកម្មប្រឆាំងរដ្ឋាភិបាលថៃបច្ចុប្បន្ន។ (រូបថត sindikasi.net)

ការទូត - មន្រ្តីអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានអត្ថាធិប្បាយប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី២៧ ខែមករា ឆ្នាំ២០១៤ នេះថា រដ្ឋាភិបាលកម្ពុជា ក៏ដូចជាប្រទេសកម្ពុជា មានគោលនយោបាយការពារ​អធិបតេយ្យភាពជាតិយ៉ាងម៉ឺងម៉ាត់ ហើយក៏គោរពអធិបតេយ្យភាពរបស់ប្រទេសជិតខាង ដោយមិនលូក​លាន់ចូល​កិច្ចការផ្ទៃក្នុងរបស់ប្រទេសណាមួយនោះទេ។

ចំពោះការចោទប្រកាន់របស់គណបក្សជំទាស់ថៃ មកលើពលរដ្ឋកម្ពុជា ត្រូវបានលោក ផៃ ស៊ីផាន លើកឡើងថា ការចោទប្រកាន់ទាំងនោះ គឺគ្រាន់តែជាសម្តីរបស់បុគ្គលតែម្នាក់តែប៉ុណ្ណោះ វាមិនមែនជាការលើកឡើង​របស់​សមត្ថកិច្ច ឬរដ្ឋាភិបាលថៃក្រោយការស៊ើបអង្កេតនោះទេ។ ដូច្នេះវាជាការចោទក្រកាន់ដោយ​គ្មានមូលដ្ឋាន​ច្បាស់​លាស់ និងគ្នានតម្លៃគួរឲ្យជឿជាក់។ លោក ផៃ ស៊ីផាន បញ្ជាក់ថា៖ «យើងច្រានចោលទាំងស្រុង ចំពោះការចោទ​ប្រកាន់ទាំងឡាយណាមកលើពលរដ្ឋកម្ពុជា និងប្រទេសកម្ពុជា ក្នុងពេលដែលមិនមានភស្តុតាងជាក់ស្តែង។»

គួររម្លឹកថា សារព័ត៌ប៊ីប៊ីស៊ី(BBC) ក្នុងអត្ថបទចុះផ្សាយថ្ងៃទី២៦ ខែមករា ឆ្នាំ២០១៤ បានផ្សាយថា លោក សូធីន តារ៉ាទីន (Suthin Taratin) ជាមេដឹកនាំបាតុករអាវលឿងទាមទារ ឲ្យនាយករដ្ឋមន្រ្តីថៃលោកស្រី យីងឡាក់ ស៊ីណាវ៉ាត្រា ចុះចេញពីតំណែង និងមានបំណងបង្អាក់ការបោះឆ្នោតនោះ ត្រូវបានឃាតករបាញ់សម្លាប់ ខណៈ​លោក សូធីន តារ៉ាទីន និងអ្នកគាំទ្រ ឡោមព័ទ្ធការិយាល័យរៀបចំការបោះឆ្នោតមួយ នៅប្រទេសថៃ។

ជុំវិញការបាញ់សម្លាប់លោក សូធីន តារ៉ាទីន (Suthin Taratin) នេះ ត្រូវបាន លោកស៊ូថេប ថងស៊ូបាន ជាអតីត​មន្រ្តីជាន់ខ្ពស់របស់គណបក្សប្រជាធិបតេយ្យ បញ្ជាក់ប្រាប់ប្រព័ន្ធផ្សព្វផ្សាយក្នុងប្រទេសថៃថា ៖ «ខ្ញុំសង្ស័យថា ខ្មាន់​កាំភ្លើងដែលបាញ់លោកស៊ូធីន ជាថ្វីដៃរបស់ក្រុមប្រមាញ់ ស្ថិតក្រោមការគ្រប់គ្រងរបស់ប៉ូលិស ឬអាចជាអង្គភាព​សកម្មជនរបស់កម្ពុជា។ ហើយប្រសិនបើខ្មាន់កាំភ្លើងជាជនកម្ពុជាពិតមែន បង្ហាញថា លោកស្រីយីងឡាក់ ស៊ីណាវ៉ាត្រា មានភាពឃោរឃៅ និងបណ្ដោយឱ្យបរទេសរំលោភបំពាន លើអធិបតេយ្យភាពរបស់ថៃ(...)»។

ទស្សនាវដ្តីមនោរម្យ.អាំងហ្វូ មិនអាចទាក់ទង លោក កុយ គួង មន្រ្តីអ្នកនាំពាក្យក្រសួង​ការបរទេស​កម្ពុជា ដើម្បី​ធ្វើការអត្ថាធិប្បាយបន្ថែមបាននៅឡើយ។ តែបើតាមការដកស្រង់សម្ដីរបស់មន្ត្រីការទូតរូបនេះ ដោយវិទ្យុសម្លេង​សហរដ្ឋអាមេរិក កាលពីយប់ថ្ងៃទី២៧ ខែមករានេះ លោកបានហៅសម្ដីរបស់មេដឹកនាំបាតុកម្មថៃ លោក ស៊ូថេប ថាមានចរិក​«ឆ្កួតលីលា»។

អ្នកតាមដានស្ថានការណ៍នយោបាយ និងសង្គមកម្ពុជា បានកត់សម្គាល់ថា ប្រទេសថៃជានិច្ចជាកាលតែងតែ​ចោទ​ប្រកាន់ពលរដ្ឋកម្ពុជា ឬយកប្រទេសកម្ពុជាទៅពាក់ព័ន្ធ​នឹងបញ្ហាផ្ទៃក្នុងរបស់ប្រទេសថៃ ជាពិសេសនៅពេលជម្លោះ​នយោបាយផ្ទៃក្នុងប្រទេសមានភាពតានតឹងខ្លាំង។ តែ​ការចោទប្រកាន់ទាំងនោះ ភាគច្រើនមិនបានធ្វើឡើង ដោយ​មានភស្តុតាងច្បាស់លាស់ក្នុងការសំអាងនោះទេ ហើយ​តែងត្រូវបានភាគីកម្ពុជា​ទាត់ចោលជាបន្តបន្ទាប់៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២៧ ខែមករា ឆ្នាំ២០១៤