ក្រោយពីការសន្យារដ្ឋរបស់អាជ្ញាធរ ថានឹងដោះស្រាយករណីជម្លោះដីធ្លី របស់ពួកគាត់នោះមក ពលរដ្ឋមួយចំនួន​មកពីខេត្ត​ក្រចេះទាំងនោះ នៅតែសម្ដែងក្ដីបារម្ភ ដោយបានលើកឡើងថា ពួកគាត់គ្មានជំនឿ ពីការសន្យារបស់​អាជ្ញាធរ​ថានឹង​ដោះស្រាយបញ្ហាដីធ្លីឱ្យ មិនដឹងថាបានឬមិនបាននោះ។ ពលរដ្ឋខ្លះ ថែមទាំងប្ដេជ្ញាថានឹងនៅបន្ត ក្នុងរាជធានីភ្នំពេញ ដើម្បីតវ៉ាលុះត្រាបានដីត្រឡប់មកវិញ។

ក្រុមប្រជាពលរដ្ឋ អ្នកតវ៉ាដីធ្លី មកពីខេត្តក្រចេះ លើកបដាតវ៉ា។ (រូបថត MONOROOM.info/ C. Nita)

ដីធ្លី - នៅថ្ងៃទី២២ ខែឧសភា នេះ លោក ឃួង ស្រេង ព្រមទាំងអភិបាលខេត្តក្រចេះ បានធ្វើដំណើរទៅវត្តសាមគ្គីរង្សី ជាកន្លែងពលរដ្ឋមានជម្លោះដីធ្លីនៅខេត្តក្រចេះស្នាក់នៅ ដើម្បីរួមគ្នារកដំណោះស្រាយ លើបញ្ហាដីធ្លី ដែលប្រជា​ពលរដ្ឋ​បានចោទប្រកាន់ ថាអាជ្ញាធរខេត្តក្រចេះយកដីរបស់ពួកគាត់ ទៅឱ្យក្រុមហ៊ុនវៀតណាម។

លោក ឃួង ស្រេង អភិបាលរងរាជធានីភ្នំពេញ បានប្រសាសន៍ថា បន្ទាប់ពីធ្វើស្ថិតិពិតប្រាកដរួចរាល់ ក្រុម​ប្រជា​ពលរដ្ឋទាំងនេះនឹងត្រូវបានអញ្ជើញ ទៅតំបន់មូលដ្ឋានដែលប្រជាពលរដ្ឋកំពុងតែរស់នៅវិញ ដើម្បីឱ្យខាងសាលា​ខេត្តក្រចេះ ដោះស្រាយពីករណីដីធ្លីរបស់គាត់ ព្រោះរឿងនេះ មិនមែនជាដែនសមត្ថកិច្ចរបស់​សាលារាជធានី​ភ្នំពេញនោះទេ។

ស្រ្តីជាជនជាតិស្ទៀងម្នាក់ អ្នកស្រី ឡន វឿន បានរៀបរាប់ថា បើទោះបីអ្នកស្រីព្រមផ្តិតមេដៃហើយក៏ដោយ តែ​អ្នក​ស្រី​ដាច់ខាតមិនព្រមទៅតាមការអញ្ជើញ របស់សាលារាជធានីភ្នំពេញនោះទេ។ អ្នកស្រីនឹងបន្តនៅភ្នំពេញ លុះត្រាតែ​ដី​របស់អ្នកស្រី ត្រូវអាជ្ញាធរប្រគល់ត្រលប់មកវិញ។

ពលរដ្ឋរដ្ឋម្នាក់ទៀត លោក ប៉ែន ប៉ែត បានឱ្យដឹងថា កន្លងមកនៅពេលមានបញ្ហា មិនដែលមានដំណោះស្រាយ​ពី​អាជ្ញាធរខេត្តទេ។ ចំពោះការសន្យារបស់អាជ្ញានៅព្រឹកនេះ ពលរដ្ឋរូបនេះលើកឡើងថា លោកនៅតែមិនមានទំនុកថា ដីរបស់លោកបានមកវិញ ឬក៏អត់នោះទេ។ លោកអះអាងថា ប្រសិនបើមិនមានយុត្តិធម៌ លោកនឹងត្រលប់​មក​ភ្នំពេញម្តងទៀត ដើម្បីធ្វើការតវ៉ា ព្រោះលោកមិនមានកន្លែងណាស្នាក់នៅទៀតឡើយ ក្រៅពីដីដែលត្រូវ​ក្រុមហ៊ុន​ឈូសឆាយនោះ។

ផ្ទុយមកវិញ សម្រាប់ពលរដ្ឋម្នាក់ទៀត អ្នកស្រី ឌី យ៉ាត បានបង្ហាញក្តីសង្ឃឹម និងជឿជាក់ថា ករណីដីរបស់គាត់ នឹង​ត្រូវបានដោះស្រាយពិតប្រាកដពីអាជ្ញាធរ ។

មន្ត្រីជាន់ខ្ពស់ពីសមាគមការពារសិទ្ធិមនុស្សអាដហុក លោក ណៃ វង់ដា បានឱ្យដឹងថា បើការសង្កេតរបស់លោក​ឃើញថា អាជ្ញាមានភាពសស្រាក់សស្រាំ តាំងពីម្សិលមិញរហូតដល់ថ្ងៃនេះ ក្នុងការរកដំណោះស្រាយជូន​ប្រជា​ពលរដ្ឋ។ ប៉ុន្តែមន្រ្តីសង្គមស៊ីវិលរូបនេះ បានលើកក្តីបារម្ភមកបញ្ជាក់ថា៖ «ការធ្វើបញ្ជីការអ្នកដែលមកទាមទារនេះ គឺពេលដែលត្រលប់ទៅវិញ អាជ្ញាធរខេត្តក្រចេះ អាចនឹងមិនមានការដោះស្រាយល្អ ជូនដល់ប្រជាពលរដ្ឋនោះទេ។ យើងសង្ឃឹមតិចតួចណាស់ ដែលថាដីបានទៅលើប្រជាពលរដ្ឋ។»

សម្រាប់លោក ឃួង ស្រេង យល់ថា ប្រសិនណាបើប្រជាពលរដ្ឋមិនយកបញ្ហារបស់ខ្លួន ភ្ជាប់នឹងរឿងនយោបាយ​ទេនោះ បញ្ហានឹងអាចដោះស្រាយបាន។ លោកថ្លែងយ៉ាងដូច្នេះថា៖ «ខ្ញុំមានជំនឿថានឹងអាចដោះស្រាយបាន នៅ​ពេលណាដែរប្រជាជនខ្វះដីពិតប្រាកដ និងមិនពាក់ព័ន្ធក្នុងរឿងនយោបាយ។ ក្នុងល្កឹកណា ដែលគាត់យករឿងនេះ ទៅជារឿងនយោបាយ អញ្ចឹងរឿងនេះនឹងដោះស្រាយអត់ចប់។»៕