ដោយសារការចរចាមិនទទួលបានលទ្ធផល ដូចដែលខាងបុគ្គលិកកូដកររំពឹងចង់បាន បានធ្វើឲ្យការទាមទារតវ៉ា បាន​ឈានដល់របត់ថ្មី។ នៅព្រឹកថ្ងៃទី១៥ ខែឧសភានេះ បុគ្គលិកអ្នកតវ៉ារបស់ក្រុមហ៊ុនកាល់តិច បានបន្តយកញត្តិ​មក​ដាក់​នៅស្ថានទូតអាមេរិក ដើម្បីស្វែងការអន្តរាគមន៍ និងដាក់សម្ពាធទៅលើក្រុមហ៊ុនឆេវរ៉ុន។

បុគ្គលិកកូដករ នាំមុខដោយលោក សរ ម៉ូរ៉ា ប្រធានសហព័ន្ធសហជីពកម្មករចំណីអាហារ និងសេវាកម្ពុជា នៅមុខស្ថានទូតអាមេរិកថ្ងៃទី១៥ ខែឧសភា ឆ្នាំ២០១៤។ (រូបថត MONOROOM.info/ S.Tith)

---------------------------------------
ដោយ ក.ចាន់នីតា (ទំនាក់ទំនង៖ [email protected] ) -ភ្នំពេញ ថ្ងៃទី ១៥ ឧសភា ២០១៤
---------------------------------------

ប្រាក់ខែ - បុគ្គលិកស្ថានីយប្រេងឥន្ធនៈកាល់តិច ប្រមាណជាង ៣០នាក់ បាននាំគ្នាយកញត្តិទៅដាក់ នៅស្ថានទូត​អាមេរិក នៅព្រឹកថ្ងៃទី១៥ ឧសភានេះ ដើម្បីសុំឲ្យស្ថានទូតជួយអន្តរាគមន៍ ទៅក្រុមហ៊ុនឆេហ្វរ៉ុន ក្នុងការផ្តល់នូវប្រាក់​ខែដែលធានានូវការរស់នៅសមរម្យ និងស្របទៅនឹងច្បាប់របស់ប្រទេសកម្ពុជា។

លោក ស ម៉ូរ៉ា ប្រធានសហព័ន្ធសហជីពកម្មករ ចំណីអាហារ និងសេវាកម្ពុជា ដែលដឹកនាំបុគ្គលិកក្រុមហ៊ុនកាល់តិច ក្នុងការដាក់ញត្តិនៅស្ថានទូតអាមេរិក បានថ្លែងពន្យល់ពី​មូលហេតុ ថាអាមេរិកជាប្រទេសមួយ ដែលខ្វល់ខ្វាយនឹង​ក្រុមហ៊ុនរបស់ខ្លួន ដែលដំណើរការរកស៊ីនៅក្រៅប្រទេស ជាពិសេសតែងតែយកចិត្តទុកដាក់ ទៅលើការគោរព​សិទ្ធិ​មនុស្ស អំពើពុករលួយ និងបញ្ហាសង្គមផ្សេងៗ។ លោកថ្លែងបន្តថា៖ «អញ្ចឹងនៅពេលនេះ ក្រុមហ៊ុនកាល់តិចដែល​ជា​ក្រុមហ៊ុនសាំងដ៏ធំមួយ របស់សហរដ្ឋអាមេរិចហ្នឹង គឺមិនបានផ្តល់ប្រាក់ឈ្នួល ដែលធានាដល់ការរស់នៅសមរម្យ​ដែល​ស្រប ទៅនឹងច្បាប់ការងារមាត្រា១៤០ នៃច្បាប់ព្រះរាជាណាចក្រកម្ពុជា។ ដូច្នេះហើយទើបយើង ស្នើឱ្យមាន​ការ​អន្តរាគមន៍ពីរដ្ឋាភិបាលអាមេរិក ក្នុងការជំរុញឱ្យក្រុមហ៊ុនកាល់តិច ផ្តល់នូវប្រាក់ឈ្នួលដែលធាការរស់នៅ​សមរម្យ។»

លោកបញ្ជាក់បន្ថែមថា សកម្មភាពនៃការស្វែងអន្តរគមន៍ ឱ្យដាក់សម្ពាធលោកក្រុមហ៊ុនសាំងមួយនេះ មែនមែន​ធ្វើ​ត្រឹមតែនៅកម្ពុជានោះទេ នឹងបន្តនៅបណ្តាប្រទេសផ្សេងទៀត។ លោកបញ្ជាក់យ៉ាងដូច្នេះថា៖ «នៅថ្ងៃនេះ ក្រៅពី​យើងដាក់លិខិតស្នើទៅស្ថានទូត ដើម្បីស្នើរទៅកាន់រដ្ឋាភិបាលអាមេរិក ក៏យើងមានការបញ្ជូនលិខិតរបស់យើង ស្នើ​ទៅសហជីពសហរដ្ឋអាមេរិក ក៏ដូចជាផ្នែកដែលពាក់ព័ន្ធ នៅក្នុងសហរដ្ឋអាមេរិក ដើម្បីឱ្យមានការជំរុញ​ដល់ក្រុមហ៊ុន​ឆេវរ៉ុន ឱ្យមានការទទួលខុសត្រូវចំពោះកម្មករនិយោជិករបស់ខ្លួន។»

ប្រធានសហជីពរូបនេះ បង្ហាញជំនឿចិត្តថាក្រុមហ៊ុនកាល់តិច ពិតជាមានលទ្ធភាពក្នុងការតម្លើងប្រាក់ខែ ជូនបុគ្គលិក​របស់ខ្លួន ដល់១៦០ដុល្លាបាន ព្រោះក្រុមហ៊ុននេះ ជាក្រុមដែលមានស្តង់ដា និងមានការគាំទ្រច្រើន​ពីប្រជាពលរដ្ឋ​ខ្មែរ។ យ៉ាងណាម៉ិញ ក្នុងមួយថ្ងៃក្រុមហ៊ុនលក់បានយ៉ាងហោចណាស់ ក៏ជាងមួយម៉ឺនដុល្លាដែរ និងនៅក្នុងតំបន់ ក្រុមហ៊ុននេះលក់បានច្រើនជាងគេ ដែលក្រុមហ៊ុនដទៃទៀតមិនអាចធ្វើបាន និងម្យ៉ាងក្រុមហ៊ុនដៃគូរប្រកួតប្រជែង របស់កាល់តិចដូចជាតូតាល់ និងក្រុមហ៊ុនផ្សេងៗទៀត គេមានលទ្ធភាពអាចផ្តល់ជូនកម្មកររបស់គេ ពី១៣០ដុល្លា ដល់១៦០ដុល្លា។

យឿន រ៉េត បុគ្គលិកផ្នែកចាក់សាំងនៅសាខាទឹកល្អក់ និងជាប្រធានសហជីពប្រចាំមូលដ្ឋាន បានឱ្យដឹងថា ការយក​ញត្តិមកដាក់នៅស្ថានទូតនេះ ជាជម្រើសចុងក្រោយ របស់បុគ្គលិកបំរើការនៅក្រុមហ៊ុនកាល់តិច។ តែប្រសិនបើ​មិន​មានដំណោះស្រាយ ពីខាងស្ថានទូតទៀត ខាងបុគ្គលិកទាំងអស់ ក៏នៅតែបន្តធ្វើកូដកម្មដោយសន្តិវិធី។ បុគ្គលិក​រូប​នេះ បានរំពឹងទុកថា៖ «នឹងទទួលបានជោគជ័យ ព្រោះថាក្រុមហ៊ុននេះ ជាក្រុមហ៊ុនដែលមានស្តង់ដា ហើយជា​ក្រុមហ៊ុន របស់អាមេរិចកាំងទៀត អញ្ចឹងខ្ញុំសង្ឃឹមថា អាមេរិកមិនបណ្តែតបណ្តោយ អូសបន្លាយ​ពេលវេលា​តទៅ​ទៀតទេ។»

នៅព្រឹកនេះដែរ ខាងតំណាងស្ថានទូតអាមេរិកលោក ដេវិត ស្ទែហ្វត បានមកទទួលយកញត្តិដោយផ្ទាល់ ពី​តំណាង​បុគ្គលិកកូដករ​របស់ក្រុមហ៊ុនកាល់តិច។

សូមបញ្ជាក់ផងដែរថា លក្ខខណ្ឌចុងក្រោយ ដែលខាងបុគ្គលិកកូដករ ទាមទារឱ្យស្ថានទូតអាមេរិក និងភាគីពាក់ព័ន្ធ​ទាំងអស់ជួយធ្វើអន្តរាគមន៍ មានដូចជា៖

១- សូមឲ្យក្រុមហ៊ុនផ្តល់ប្រាក់ខែទី១៣ យ៉ាងហោចណាស់ស្មើនឹងប្រាក់ឈ្នួលខែចុងក្រោយ ដោយអនុវត្តចាប់​ពីឆ្នាំ​២០១៤ តទៅ។

២- ដំឡើងប្រាក់ឈ្នួលគោល ដល់កម្មករ និយោជិតផ្នែកអនាម័យ ផ្នែកចាក់សាំង ផ្នែកប្តូរប្រេងម៉ាស៊ីន ចំនួន ១៦០ ដុល្លារក្នុងមួយខែ និងដំឡើងប្រាក់ឈ្នួលបន្ថែមចំនួន ៥០ដុល្លារ ដល់កម្មករ និយោជិតផ្នែកបេឡា ហើយ​អនុវត្តន៍​ចាប់ពីឆ្នាំ២០១៤តទៅ។

ទស្សនាវដ្ដីមនោរម្យ.អាំងហ្វូ នៅមិនទាន់ទទួលប្រតិកម្មពីខាងក្រុមហ៊ុនកាល់តិច ទាក់ទងនឹងការដាក់ញត្តិនេះ​នៅ​ឡើយ មកទល់នឹងម៉ោងនេះ៕