ការនាំចេញឈើមានអាជ្ញាប័ណ្ណទៅកាន់របទេស ស្ថិតក្នុងកម្រិតកំណត់របស់រាជរដ្ឋាភិបាល នៅក្នុងឆ្នាំ២០១៣ មាន​ទឹកប្រាក់សរុបជាង ៤១លានដុល្លារ ប៉ុន្តែចំនួននេះត្រូវបានអង្គការសង្គមស៊ីវិល ដែលធ្វើការស៊ើបអង្កេត​លើវិនាសកម្ម​ព្រៃឈើនៅកម្ពុជា រិះគន់ថា ជាចំនួនតិចបំផុតបើប្រៀបធៀប ទៅនិងការនាំចេញទៅក្រៅប្រទេសរបស់ក្រុមហ៊ុន ទ្រី ភាព។

រថយន្ដដឹកឈើដុំប្រណិត ជាប់ផុងទៅមុខមិនរួច។ (រូបភាព MONOROOM.info/ Kin.G)

----------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី១៥ ឧសភា ២០១៤
----------------------------

ឧក្រិដ្ឋកម្មព្រៃឈើ - យោងទៅតាមរបាយការណ៍បូកសរុបការងារពាណិជ្ជកម្ម ឆ្នាំ ២០១៣ និងទិសដៅអនុវត្តការងារ​ពាណិជ្ជកម្ម ឆ្នាំ ២០១៤ របស់ក្រសួងពាណិជ្ជកម្មបានឲ្យដឹងថា ក្នុងឆ្នាំ ២០១៣ នេះក្រសួងពាណិជ្ជកម្មបាន​ចេញ​អាជ្ញាប័ណ្ណ​នាំចេញទំនិញ ស្ថិតក្នុង កំណត់របស់រាជរដ្ឋាភិបាល មានទឹកប្រាក់សរុបចំនួន ៤១.៣៦៧.៤២៩,៣៤ ដុល្លារ​អាមេរិក។

នៅក្នុងរបាយការណ៍នោះ បានឲ្យដឹងទៀតថា មុខទំនិញដែលនាំចេញនោះមានដូចជា ឈើកែច្នៃប្រណិត មានចំនួន ៣២,៤៧ លានដុល្លារអាមេរិក ផលិតផលឈើកែច្នៃលេខ១ មានចំនួន ៣,៤៥ លានដុល្លារ ផលិតផលឈើ​កែច្នៃ​លេខ​២ មានចំនួន ០,២០ លានដុល្លារ ចំណិតស្នូលឈើ មានចំនួន ០,៨៦ លានដុល្លារ ក្តារបន្ទះ មានចំនួន ០,១៨ លាន​ដុល្លារ ឈើកៅស៊ូកែច្នៃអារត្រាំទឹកថ្នាំ មានចំនួន ២,២៥ លានដុល្លារ កំទេចឈើដើមអាកាស្យា ០,៧៦ លានដុល្លារ ចំណិតឈើស្តើងផលិតពីដើមស្វាយ មានចំនួន ០,៣៨ លានដុល្លារ និងឈើដើមស្វាយនិងស្វាយចន្ទីអារត្រាំទឹកថ្នាំ មានចំនួន ០,៧៨ លានដុល្លារ។ នៅក្នុងរបាយការនោះបានឲ្យដឹងទៀតថា៖ «បើប្រៀបធៀបឆ្នាំ ២០១២ មានទឹកប្រាក់​សរុបចំនួន ១៩.៥៧២.០៦៧,៧៥ដុល្លារ គឺមានចំនួនកើនឡើងចំនួន ១១១,៣៦%»។

រីឯរបាយការណ៍បូកសរុបការងារកសិកម្ម រុក្ខាប្រមាញ់ និងនេសាទប្រចាំឆ្នាំ ២០១២-២០១៣ វិញ បានឲ្យដឹងថា ក្រសួងបានផ្តល់ទិដ្ឋាការអាជ្ញាប័ណ្ណនាំចេញចំនួន ១៦ ក្រុមហ៊ុន មានដូចជា ក្រុមហ៊ុនរបស់លោកឧកញ៉ា ទ្រី ភាព MDS, Angkor Plywood, Green Island, Angkor Sugar, DTC, Pheapimex, Great Field Cambodia, Decowood, North-East, Wood Innovation, Grand Land, Di Duk Cambodia, Khen Norak Cambodia, Tong Min, Green Rich Group, Hillco Corporation ហើយចំណូលពីផលព្រៃឈើ ចូលថវិការជាតិសរុប ៦០.៨៦៦.៤៩១.៨៦៦.០០រៀល។

លោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម ពុំអាចទំនាក់ដើម្បីធ្វើការអត្ថាធិប្បាយបានទេ កាលពីថ្ងៃ​ព្រហស្បត្តិ៍​ទី១៥ ខែឧសភានេះ។

លោក អ៊ូច ឡេង ប្រធានក្រុមកិច្ចការពិសេសសិទ្ធិមនុស្សកម្ពុជា បានមានប្រសាសន៍ថា ចំនួនដែលបង្ហាញស្របច្បាប់ របស់ក្រសួងពាណិជ្ជកម្មនោះ គឺជាចំនួនមួយតិចបំផុត បើប្រៀបធៀបទៅនឹងការនាំចេញ របស់ក្រុមហ៊ុន ទី្រ ភាព ទៅប្រទេសចិន។ លោកបានថ្លែងឲ្យដឹងថា ក្នុងមួយថ្ងៃក្រុមហ៊ុន ទ្រី ភាព បាននាំឈើចេញតាម​ច្រកកំពង់ផែរ​ស្វ័យត​ក្រុងព្រះសីហនុ មានចំនួនជាមធ្យមចំនួន ៣០កុងទីន័រ ហើយក្នុងមួយកុងទីន័រមានតម្លៃប្រមាណជា៥លានដុល្លារ។ លោកបានថ្លែងឲ្យដឹងទៀតថា៖ «ដូច្នេះក្នុងមួយថ្ងៃក្រុមហ៊ុន ទ្រី ភាព បាននាំឈើចេញពីកម្ពុជា មានតម្លៃប្រមាណ​ជា១៥០លានដុល្លារ គឺវាច្រើនជាងចំនួនដែលនាំចេញរយៈពេលពេញមួយឆ្នាំ ហើយចំនួននេះគ្រាន់​តែក្រុមហ៊ុនមួយ​ប៉ុណ្ណោះ»។

លោកបានថ្លែងឲ្យដឹងទៀតថា ដើម្បីទប់ស្កាត់នូវវិនាសកម្មព្រៃឈើ និងរក្សារព្រៃដែលនៅសល់ចំនួន​តិចតួចចុង​ក្រោយនោះ លោកស្នើរសុំឲ្យរដ្ឋាភិបាលបិទអាជ្ញាប័ណ្ណ នាំឈើចេញទៅក្រៅប្រទេស ពីព្រោះក្រុមហ៊ុន​ទាំងនោះឆ្លៀត​ឱកាសយកអាជ្ញាប័ណ្ណនោះ ដើម្បីកាប់បំផ្លាញព្រៃឈើ និងនាំឈើចេញទៅក្រៅប្រទេស លើសចំនួនដែល​រដ្ឋបាន​កំណត់។ លោកបានថ្លែងឲ្យដឹងទៀតថា៖ «បើរដ្ឋាភិបាល មិនទប់ស្កាត់ទាន់ពេលទេនោះ ឈើក្នុងរយៈពេល២ឆ្នាំទៀត លែងមានវត្តមាននៅក្នុងប្រទេសកម្ពុជាទៀតហើយ គឺនៅសល់តែដើមកៅស៊ូប៉ុណ្ណោះ»។

«វាគ្រាន់តែជាការបិទបាំងអំពើពុករលួយ...»

លោក ឈឹម សាវុធ ប្រធានអង្គការការពារធនធានធម្មជាតិ មានប្រសាសន៍ថា បើយោងទៅតាមការស្រាវជ្រាវ​របស់​លោក ចំនួនដែលបង្ហាញដោយក្រសួងនោះ គឺមិនស្មើមិនស្មើរនិងការនាំឈើចេញរបស់ក្រុមហ៊ុន ទ្រី ភាព កន្លះខែផង នេះគឺជាចំនួនមួយទាបបំផុត ដែលពុំអាចទទួលយកបាន បើធៀបទៅនឹងទំហំនៃការបាត់បង់ព្រៃឈើ នាពេល​បច្ចុប្បន្ន។ លោកបានថ្លែងឲ្យដឹងទៀតថា៖ «ចំនួនដែលបង្ហាញនេះ វាមិនខុសអីពីចំនួនភ្ញៀវចូល​ទស្សនាអង្គវត្ត​នោះ​ទេ ដូច្នេះវាគ្រាន់តែជាការបិទបាំងអំពើពុករលួយមួយប៉ុណ្ណោះ»។

របាយការណ៍របស់ទីភ្នាក់ងារអន្តរជាតិ ស្តីពីបរិស្ថាន ចេញផ្សាយកាលពីថ្ងៃចន្ទ ទី១២ខែឧសភា ឲ្យដឹងថា ចាប់ពីឆ្នាំ​២០១០ យ៉ាងតិចឈើប្រណិត៤៩លានតោន ១៩៥៨ម៉ែត្រគូប និង១៣០៩បន្ទះ ត្រូវបាននាំចេញទៅប្រទេសចិន។ ចាប់តាំងពីឆ្នាំ២០០០ ការនាំចេញឈើប្រណិតពីតំបន់ទន្លេមេគង្គ រួមមានវៀតណាម កម្ពុជា ឡាវ មីយ៉ាន់ម៉ា និងថៃ មានតម្លៃទៅដល់២៤០០លានដុល្លារ។ ចំណែកការនាំចេញឈើប្រណិតពីកម្ពុជា មានកើនឡើង៣ដង បើប្រៀប​ធៀប​កាលពីឆ្នាំមុន៕