នៅព្រឹកថ្ងៃទី០៤ ខែកក្កដា ឆ្នាំ២០១៤នេះ ក្រសួងការងារ និងក្រុមសហជីពជាតិ និងអន្តរជាតិ បានរៀបចំសិក្ខា​សាលា​មួយ ដើម្បីជជែកពីមូលហេតុ និងរកដំណោះស្រាយពីបញ្ហា ដែលនាំឱ្យការងារវិស័យកាត់ដេរនៅកម្ពុជា មិនមាន​សន្តិសុខ។

សិក្ខាសាលា ស្តីពីសន្តិសុខការងារ ថ្ងៃទី៤ ខែកក្កដា ឆ្នាំ២០១៤។ (រូបថត MONOROOM.info/ S. Tith)

ការងារ - ក្នុងរយៈពេលថ្ងៃពីរនេះ ចាប់ពីថ្ងៃទី០៤ ដល់ទី០៥ ខែកក្កដា ឆ្នាំ២០១៤ ក្រុមប្រឹក្សាសហភាពការងារ​អន្តរជាតិ​ ប្រចាំកម្ពុជា បានរៀបចំធ្វើសិក្ខាសាលាមួយស្តីពីសន្តិសុខការងារ និងទំនាក់ទំនងឧស្សាហកម្មនៅកម្ពុជា ដោយមានការចូលរួម ពីតំណាងសហជីពធំៗមួយចំនួន មន្ត្រីក្រសួងការងារ និងម្ចាស់ជំនួយពីប្រទេសជប៉ុន ដែល​នឹងជជែកគ្នាពីបញ្ហាសន្តិភាព និងសន្តិសុខការងារនៅក្នុងវិស័យកាត់ដេរកម្ពុជា។

បើតាមលោក រ៉ុង ឈុន ប្រធានសហភាពសហជីពកម្ពុជា បានឱ្យដឹងថា មូលហេតុដែលលើកយក​ប្រធានបទនេះ​ឡើង ដើម្បីឱ្យមានការស្វែងយល់ អំពីសារៈសំខាន់នៃសន្តិការងារ នៅកម្ពុជា ដោយសារតែភាពធ្ងន់ធ្ងរ​នៃការរំលោភ​សិទ្ធិកម្មករនៅកម្ពុជា ទើបធ្វើឱ្យអ្នកបញ្ជាទិញអស់ជំនឿចិត្ត ហើយបញ្ឈប់ការបញ្ជាទិញផលិតផល ពីរោងចក្រនៅ​កម្ពុជា បណ្តាលឱ្យវិស័យកាត់ដេរនៅកម្ពុជា មិនមានស្ថេរភាព ។

លោកពន្យល់ទៀតថា វិស័យកាត់ដេរនៅប្រទេសកម្ពុជា នៅលក្ខណៈផុយស្រួយណាស់ ប្រសិនបើរដ្ឋាភិបាលមិន​យកចិត្តទុកដាក់ ដោះស្រាយនូវបញ្ហារលោភសិទ្ធកម្មករដូចបច្ចុប្បន្ននេះ និងការព្រនើយកន្តើយ មិនដោះស្រាយ​បញ្ហាប្រាក់ឈ្នួលរបស់កម្មករ ដែលនៅមានកំរិតទាបនៅឡើយ។ លោកបានបន្តថា៖ «កន្លងមកនេះ​យើងឃើញ​មានរឿងជាច្រើនកើតឡើង នៅតាមបណ្តារោងចក្រកាត់ដេរ មានបញ្ហាកើតឡើងច្រើន ជាពិសេសទាក់ទង​ទៅ​នឹង​បញ្ហាប្រាក់ឈ្នួល បញ្ហាការប្រាស់ប្រាស់កិច្ចសន្យាការងារ និងបញ្ហារើសអើងសេរីភាពរបស់សហជីព។ បើកត្តា​ទាំង​បីហ្នឹង មិនបានដោះស្រាយពេលហ្នឹង សន្តិសុខការងារនៅក្នុងសហគ្រាស ក្នុងរោងចក្រ នឹងមិនមាននោះទេ។»

រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក សាត សាមុត ទទួលស្គាល់ផងដែរពី បញ្ហាកម្មករ​នៅក្នុងវិស័យកាត់ដេរ ថាពិតជាមានលក្ខណៈមិនទាន់ល្អប្រសើរ។ ប៉ុន្តែស្របគ្នានឹងនេះដែរឃើញថា វាក៏បណ្តាល​មកពីសហជីពធំៗមួយចំនួន នៅមិនទាន់មានការសហការគ្នា រកផ្លូវដើរ ដើម្បីឱ្យវិស័យកាត់ដេរនៅកម្ពុជា​នេះ​មាន​ដំណើរការទៅដោយរលូន៕