ម្ដាយរបស់គ្រួសារ ដែលនគរបាលទើបនឹងរកឃើញកាលពីថ្ងៃសោរ៍ ទី១៣ ខែមេសាកន្លងមក នូវសាកសពទារក​ទើប​នឹងកើតតូចៗ ចំនួន៧នាក់ ក្នុងរដ្ឋអ៊ុយតា សហរដ្ឋអាមេរិក បានសារភាពទទួលស្គាល់នៅថ្ងៃចន្ទទី១៤ ខែមេសានេះ ថាខ្លួនបានសម្លាប់ទារករបស់ខ្លួនទាំង៦នាក់ នៅក្នុងរយៈពេលពីឆ្នាំ១៩៩៦ មកទល់នឹងឆ្នាំ២០០៦។

រូបភាពដៃម្ខាង របស់ទារកជាទូទៅម្នាក់ តែមិនបង្ហាញពីរូបភាពទារករងគ្រោះទេ។

ឃាតកម្មរន្ធត់ - សារព័ត៌មាន ឌឺសលឡេកទ្រីប៊ុត (The Salt Lake Tribute) បានឲ្យដឹងថា ស្ត្រីជាម្ដាយឈ្មោះ ម៉េហ្គាន ហនស្មាន (Megan Huntsman) អាយុ៣៩ឆ្នាំ ទំនងជាមិនបានសម្លាប់ទារកទី៧នោះទេ។ ទារកទី៧នេះ បាន​ស្លាប់នៅពេលកើត ដោយយោងទៅតាមសេចក្ដី​ប្រកាសនៅពេលនោះ របស់ស្ត្រីម្ដាយរូបនេះ ប្រាប់ទៅ​នគរបាល។

កងកម្លាំងនគរបាល បានរកឃើញ​ហេតុការណ៍ដ៏រន្ធត់ ដោយសារការរាយការណ៍របស់អតីតស្វាមីរបស់ ម៉េហ្គាន ហនស្មាន នៅពេលបុរសដែលទើបនឹងចេញ​ពីពន្ធនាគាររូបនេះ មានបំណងចង់ចូលទៅរស់នៅ​ក្នុងលំនៅដ្ឋាន​នោះ​វិញ ហើយបានកកាយឃើញសាកសពទារកដំបូង នៅក្នុងរោងចំណងរថយន្ដ។ បន្ទាប់ពីបានលែងលះប្ដីរបស់ខ្លួន​នៅឆ្នាំ២០១១នោះមក ជនសង្ស័យ ម៉េហ្គាន ហនស្មាន បានចាកចេញពីលំនៅដ្ឋាន ដែលជាមរតករបស់ឪពុកម្ដាយ​ប្ដីខ្លួននោះ ហើយបានបន្សល់ទុកកូនស្រីបីនាក់អាយុពី១៣ ដល់២០ឆ្នាំ ឲ្យរស់នៅក្នុងផ្ទះនោះរហូតមក។

ស្ត្រីជាម្ដាយដែលមានចិត្តអាក្រក់រូបនេះ បានសារភាពនៅចំពោះអ្នកស៊ើបអង្កេតថា ខ្លួនបានច្របាច់ករ ឬបន្ថប់ដង្ហើម​ទារកទាំង​៦នាក់ភ្លាមៗ បន្ទាប់ពីពួកគេបានកើតចេញពីឧទររបស់ខ្លួន។ សាកសពទាំងនោះ ត្រូវបានខ្ចប់ទុកនៅក្នុង​កន្សែងឬអាវស៊ឺមី រុំព័ទ្ធពីលើដោយស្បោងផ្លាស្ទីក មុននឹងដាក់ទៅក្នុងប្រអប់​ក្រដាសផ្សេងៗពីគ្នា ហើយបានរៀបទុក​នៅក្នុងរោងចំណតរថយន្ដជាប់ផ្ទះ។

ហេតុការណ៍ដ៏រន្ធត់ដែលទើបនឹងរកឃើញ បានបង្កឲ្យអ្នករស់នៅក្នុងទីក្រុងលេសេន ហ្គ្រូវ (Pleasant Grove) ទាំង​មូលស្ថិតក្នុងភាពស្រឡាំងកាំង រកនឹកមិនយល់។ អ្នកនៅជិតខាងរបស់ ម៉េហ្គាន ហនស្មាន បានលើកជាចម្ងល់​ឡើង​ថា «តើគេអាចលាក់ ការពរពោះក្នុងរយៈពេលជិត១០ខែយ៉ាងដូម្ដេចកើត?» អ្នកខ្លះទៀតនិយាយទាំងតក់ស្លុតថា «គំនិតដែលថា នរណាម្នាក់អាចយកទារកតូចរបស់ខ្លួន ដាក់ខ្ចប់ទៅក្នុងប្រអប់មួយ ធ្វើឲ្យរន្ធត់ហួសនឹងនិយាយ»៕

-------------------------------------------------
ដោយ ឈូករ័ត្ន (ទំនាក់ទំនង៖ [email protected]) - ប៉ារីស ថ្ងៃទី១៥ ខែមេសា ឆ្នាំ២០១៤