មនុស្សលើយន្ដហោះបាត់ខ្លួន នៅមានជីវិតគ្រប់គ្នា នៅអាហ្វហ្គានីស្ដង់?
- ដោយ: សេក មនោរកុមារ ដោយ សេក មនោរកុមារ (ទំនាក់ទំនង៖ [email protected]) - ប៉ារីស ថ្ងៃទី១៥ មេសា ២០១៤
- កែប្រែចុងក្រោយ: April 15, 2014
- ប្រធានបទ: គ្រោះអាកាស
- អត្ថបទ: មានបញ្ហា?
- មតិ-យោបល់
-
បាត់យន្ដហោះ - ការសែតមួយរបស់ប្រទេសរ៉ូស្ស៊ី បានលើកយកសាក្សី ដែលជាភ្នាក់ងារសម្ងាត់របស់រដ្ឋាភិបាលរ៉ូស្សីនោះមកបញ្ជាក់ ហើយត្រូវបានសារព័ត៌មានរបស់ប្រទេសអង់គ្លេស មីរ័រ (Mirror) ធ្វើការផ្សព្វផ្សាយបន្ត នៅថ្ងៃទី១៥ ខែមេសា ឆ្នាំ២០១៤នេះ។ ការសែតរ៉ូស្ស៊ី បានសរសេរតាមសម្ដីសាក្សីដូច្នេះថា៖ «ក្រុមភេវរជន បានចាប់ពង្រត់យន្ដហោះ ហើយ បានបង្ខំឲ្យចុះចត នៅក្នុងទីក្រុងកាន់ដាហារ (Kandahar) នៃប្រទេសអាហ្វហ្គានីស្ដង់។ អ្នកដំណើរគ្រប់រូប ដែលស្ថិតនៅ លើយន្ដហោះនេះ នៅរស់រានមានជីវិតនៅឡើយ ប៉ុន្តែកំពុងស្ថិតនៅជាប់ជាចំណាត់ខ្មាំង។»
តើនេះជាការពិត ឬគ្រាន់តែជាការបំភ្លៃព័ត៌មាន ដើម្បីមូលហេតុអ្វីមួយ? នៅមុននេះ ព័ត៌មានដែលត្រូវបានបណ្ដាញផ្សព្វផ្សាយ ចាប់អារម្មណ៍ដែរនោះ បានបញ្ជាក់ថា អ្នកដំណើរម្នាក់នៅលើយន្ដហោះ ដែលជាវិស្វកររបស់ក្រុមហ៊ុនបច្ចេកវិទ្យា អាយប៊ីអ៊ីម (IBM) ដ៏ល្បីរបស់អាមេរិក លោក ហ្វីលីព វូដ (Philip Wood) ទំនងជាបានផ្ញើររូបថតមួយសន្លឹក ទៅលើប្រព័ន្ធអាំងធើណែត ហើយបាននិយាយថា លោកកំពុងជាប់ក្នុងពន្ធនាគារងងឹតមួយ នៅជាមួយអ្នកដំណើរផ្សេងទៀត។ រូបថតនោះ ត្រូវបានគេដឹងថា ថតចេញពីចំណុចមានទីតាំងក្បែរនឹង បន្ទាយទាហានយោធាអាមេរិកាំង ស្ថិតនៅលើប្រជុំកោះ ឌីយ៉េហ្គោ ហ្គាស៊ីយ៉ា (Diego Garcia) កណ្ដាលមហាសមុទ្រឥណ្ឌា។ ប៉ុន្តែព័ត៌មាននេះ ត្រូវបានអ្នកនាំពាក្យរបស់ស្ថានទូតអាមេរិក ប្រចាំប្រទេសម៉ាឡេស៊ីបដិសេធ ដោយនិយាយថា ជាព័ត៌មានគ្មានការពិត។
ប៉ុន្តែសម្រាប់ព័ត៌មានលើកនេះ ដែលបញ្ជាក់ដោយសារព័ត៌មានរ៉ូស្ស៊ី Moskovsky Komsomolets ចេញក្នុងថ្ងៃនេះ មិនទាន់មានអ្វីឲ្យច្បាស់ មកបញ្ជាក់បាននៅឡើយ។ អ្វីដែលគេដឹងបាននោះ គឺសារព័ត៌មានបានលើកយកប្រភព ដែលគួរឲ្យជឿជាក់បាន មានជំនាញ និងបានបញ្ជាក់យ៉ាងលំអិត ពីអ្វីដែលបានលើកឡើង។
«អ្នកបើកបរយន្ដហោះ គ្មានកំហុសទេ» សាក្សីដែលបានថ្លែងក្នុងលក្ខខ័ណ្ឌមិនបញ្ចេញឈ្មោះនោះ បានបន្តទៀតថា ក្រុមភេវរករដែលមិនអាចកំណត់អត្តសញ្ញាណបានទាំងនេះ បានបង្ខំឲ្យមេបញ្ជាការបើកបរយន្ដហោះ ឲ្យធ្វើតាមខ្លួន។ យន្ដហោះបានធ្វើការចុះចតយ៉ាងគំហុក នៅលើផ្លូវលំតូចមួយ នៃតំបន់ដាច់ស្រយ៉ាលជាប់នឹងទីក្រុង។ ស្លាបមួយចំហៀងរបស់យន្ដហោះ បានបាក់នៅពេលចុះចតនោះ។
សារព័ត៌មានរ៉ូស្ស៊ីដដែល បានរាយការណ៍ទៀតថា អ្នកដំណើរទាំងអស់ត្រូវបានបែងចែកចេញជា៧ក្រុម ហើយកំពុងដាក់ឲ្យរស់នៅក្នុងខ្ទមតូចៗ ធ្វើពីឈើនិងស្លឹក។ ពួកគេមិនសូវមានចំណីអាហារប៉ុន្មានទេ។ អ្នកដំណើរដែលមានដើមកំណើតអាស៊ីចំនួន២០នាក់ ត្រូវបានបញ្ជូនទៅកាន់តំបន់មួយទៀត នៅក្នុងប្រទេសប៉ាគីស្ដង់ ហើយនឹងត្រូវចាប់ទុកជាចំណាប់ខ្មាំង ក្នុងមូលដ្ឋានយោធាដ៏សំងាត់មួយ។
យន្ដហោះប៊ូអីង ៧៧៧ ភ្ជាប់ជើងហោះហើរ MH370 បានបាត់ខ្លួននៅព្រឹកព្រហាមថ្ងៃទី៨ ខែមីនា ឆ្នាំ២០១៤ នៅក្រោយពេលដែលយន្ដហោះ បានបង្ហើបខ្លួនពីដី បានប្រមាណជិត១ម៉ោង។ យន្ដហោះ របស់ក្រុមហ៊ុន ម៉ាឡេស៊ីអែរឡាញនេះ បានហោះចេញពីរដ្ឋធានី កូឡាឡំពួរ ឆ្ពោះទៅកាន់រដ្ឋធានីប៉េកាំង ដោយមានអ្នកដំណើរ ២២៧នាក់ និងអ្នកបម្រើការរួមនឹងអ្នកបើកបរយន្ដហោះ ១២នាក់ ជិះនៅលើយន្ដហោះនោះផង។
ការរុករកសព្វថ្ងៃត្រូវបានធ្វើ នៅក្នុងលំហខាងត្បូងនៃមហាសមុទ្រឥណ្ឌា ជាមួយនឹងប្រទេសជាច្រើន។ មកដល់ថ្ងៃនេះ បន្ទាប់ពីបានរកឃើញស្លាកស្នាម នៃការបែកធ្លាយប្រេង អណ្ដែតមកខាងលើផ្ទៃសមុទ្រនោះមក ការរុករកឈានដល់ដំណាក់កាលនៃការបញ្ជូនប្រអប់យន្ដជ្រមុជទឹក ឲ្យចុះក្នុងសមុទ្រដើម្បីរកយន្ដហោះដែលគេជឿជាក់ថា បានធ្លាក់នៅទីនោះ។ តែយ៉ាងណាក៏ដោយ ការសង្ស័យដែលនិយាយថា យន្ដហោះត្រូវបានចាប់ពង្រត់ នៅតែត្រូវបានគេគិតយកជាការបាននៅឡើយ។ ត្រង់ថា ចាប់ពង្រត់យកទៅទម្លាក់នៅកណ្ដាលលំហសមុទ្រ ឬយកទៅទុកចាប់ជម្រិត ដូចការលើកឡើងរបស់សារព័ត៌មានរ៉ូស្សីនោះ មានតែនៅពេលអនាគតទេ ដែលការពិតនៃការបាត់យន្ដហោះ នឹងអាចត្រូវបានលាតត្រដាង៕