វិស្វករម្នាក់នៅលើយន្ដហោះបាត់ខ្លួន ទំនងជាបង្ហោះរូបចេញពីកោះមួយ
វិស្វករមួយរូប លោក ហ្វីលីព វូដ (Philip Wood) របស់ក្រុមហ៊ុនកំព្យូទ័រ អាយប៊ីអឹម (IBM) ដ៏ល្បី ដែលបានស្ថិតនៅលើយន្ដហោះបាត់ខ្លួន ជាមួយនឹងវិស្វករបច្ចេកវិទ្យាជាន់ខ្ពស់ចំនួន១០នាក់ផ្សេងទៀត ទំនងជាបានបង្ហោះរូបថត (ថតក្នុងស្បៃអន្ធកាល ងងឹតសូន្យសុង) មួយសន្លឹក ចេញពីទូរស័ព្ទអាយហ្វូន (Iphone) បន្ទាប់ពីយន្ដហោះនេះត្រូវបានចាប់ពង្រត់។ បើតាមការវិភាគ បានឲ្យដឹងថា រូបថតនេះត្រូវបានថតចេញពីទីតាំងមួយក្បែរនឹង កោះ ឌីយ៉េហ្គោ ហ្គាស៊ីយ៉ា (Diego Garcia) ដែលមានបន្ទាយទាហានយោធាអាមេរិកាំងតាំងនៅ កណ្ដាលមហាសមុទ្រឥណ្ឌា។
ព្រលានយន្ដហោះ នៅលើប្រជុំកោះ ឌីយ៉េហ្គោ ហ្គាស៊ីយ៉ា កណ្ដាលមហាសមុទ្រឥណ្ឌា។ (រូបថត ហ្គូហ្គ័ល)
បាត់យន្ដហោះ - នេះជាចំណុចសង្ស័យឬជាពាក្យចចាមអារ៉ាមថ្មីទៀត ដែលត្រូវបានបញ្ចេញឲ្យដឹង កាលពីដើមខែមេសានេះ បន្ទាប់ពីការរុករកយ៉ាងពេញទំហឹង តែមិនសូវជាមានសង្ឃឹម នៅក្នុងលំហខាងត្បូងនៃមហាសមុទ្រឥណ្ឌា ជាមួយប្រទេសជាច្រើននោះ។ ប៉ុន្តែការបែកធ្លាយ«ការសង្ស័យ»នេះ នៅមិនទាន់មានភាពច្បាស់លាស់ បញ្ជាក់ដោយក្រុមអ្នកស៊ើបអង្កេត នៃការបាត់ខ្លួនរបស់យន្ដហោះប៊ូអីង ៧៧៧ ភ្ជាប់ជើងហោះហើរ MH370 ពីរដ្ឋធានីកូឡាឡំពួរ ឆ្ពោះទៅរដ្ឋធានីប៉េកាំង នោះនៅឡើយ។
បន្ទាប់ពីត្រូវបានចាប់ពង្រត់នោះមក សាក្សីជាច្រើនបាននិយាយថា ពួកគេបានឃើញយន្ដហោះប៊ូអីង ចុះចតនៅទីកន្លែងមួយដែលគេស្គាល់ថា ជាបន្ទាយយោធាកណ្ដាលមហាសមុទ្រឥណ្ឌារបស់សហរដ្ឋអាមេរិក ក្នុងប្រជុំកោះ ឌីយ៉េហ្គោ ហ្គាស៊ីយ៉ា។ គេថែមទាំងដឹងពី ស្លាកស្នាមធ្លាក់ប្រេង និងទិន្នន័យនៃប្រព័ន្ធផ្កាយរណប ថាអាចនឹងបញ្ជាក់ពីការអះអាងនេះ។ តែសាក្សី និងភស្ដុតាងទាំងអស់ ត្រូវបានគេព្យាយាមពង្វៀង ដើម្បីឈានទៅដល់ការបំភ្លេចចោលទាំងស្រុង ដោយគេបានបញ្ជាក់ថា ទាំងនោះសុទ្ធសឹងជាព័ត៌មានបំភ្លៃ ក្នុងខណៈពេលដែលការស្រាវជ្រាវរុករកយន្ដហោះ នៅតែបន្តធ្វើនៅឡើយ។
ចំណុចសង្ស័យថ្មីដែលធ្វើឲ្យគេចាប់អារម្មណ៍នោះ អ្នកដំណើរម្នាក់នៅលើយន្ដហោះ ដែលជាវិស្វកររបស់ក្រុមហ៊ុនបច្ចេកវិទ្យាអាយប៊ីអ៊ីមដ៏ល្បីរបស់អាមេរិក លោក ហ្វីលីព វូដ ទំនងជាបានផ្ញើររូបថតមួយសន្លឹក ទៅលើប្រព័ន្ធអាំងធើណែត ហើយបាននិយាយថា លោកកំពុងជាប់ក្នុងពន្ធនាគារងងឹតមួយ នៅជាមួយអ្នកដំណើរផ្សេងទៀត។ គេហទំព័រដែលសរសេរពីហេតុការណ៍នេះ បានបញ្ជាក់ថា លោក ហ្វលីព ត្រូវបានចងភ្នែកនិងដៃទាំងគូជាប់ តែថាដៃរបស់លោកអាចកម្រើក ដើម្បីដកយកទូរស័ព្ទពីហោប៉ៅខាងក្រោយ ហើយថតរូបនៅក្នុងទីងងឹតនោះ ជាមួយនឹងការទូរសារមួយសរសេរដោយ ប្រព័ន្ធសរសេរអក្សរដោយសម្លេង ដែលមានន័យជាអាថ៌ តាមភាសាអង់គ្លេសថា៖
«I have been held hostage by unknown military personal after my flight was hijacked (blindfolded). I work for IBM and I have managed to hide my cellphone in my ass during the hijack. I have been separated from the rest of the passengers and I am in a cell. My name is Philip Wood. I think I have been drugged as well and cannot think clearly.»
រូបថតដែលគេបញ្ជាក់ថា ថតដោយទូរស័ព្ទអាយហ្វូន៥ របស់លោក ហ្វីលីព វូដ នោះ មានទិន្នន័យដែលបង្ហាញពីចំនុច GPS នៃការថតរូបដូច្នេះ៖
Latitude 7; 18;58.308906555175781
Longitude 72; 25; 35 55908203125
ដែលបញ្ជាក់ពីទីកន្លែងមួយ មានទីតាំងក្បែរនឹង បន្ទាយទាហានយោធាអាមេរិកាំង ស្ថិតនៅលើប្រជុំកោះ ឌីយ៉េហ្គោ ហ្គាស៊ីយ៉ា (Diego Garcia) កណ្ដាលមហាសមុទ្រឥណ្ឌា។
តែការសង្ស័យខាងលើនេះ ត្រូវបានអ្នកនាំពាក្យរបស់ស្ថានទូតអាមេរិក ប្រចាំនៅរដ្ឋធានីកូឡាឡំពួរ បដិសេធ ដោយនិយាយថា នៅក្នុងការលើកឡើងនេះ គ្មានអ្វីគួរឲ្យជឿជាក់ទាល់តែសោះ។ ស្រង់ការឆ្លើយតបតាមមែល កាលពីថ្ងៃទី១២ ខែមេសានេះ ដោយសារព័ត៌មានម៉ាឡេស៊ី Malaysia’s Star អ្នកនាំពាក្យបានសរសេរថា «គ្មានចំណុចណាមួយទាល់តែសោះ ដែលបង្ហាញថា យន្ដហោះប៊ូអីង ៧៧៧ របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ បានហោះទៅក្បែរប្រជុំកោះម៉ាលឌីវ ឬទៅក្បែរប្រជុំកោះ ឌីយ៉េហ្គោ ហ្គាស៊ីយ៉ា។ យន្ដហោះ នៃជើងហោះហើរ MH370 មិនបានចុះចតនៅ ឌីយ៉េហ្គោ ហ្គាស៊ីយ៉ា នោះទេ៕»
------------------------------------------------
ដោយ ឈូករ័ត្ន (ទំនាក់ទំនង៖ [email protected]) - ប៉ារីស ថ្ងៃទី១៤ ខែមេសា ឆ្នាំ២០១៤