ផ្នែកអ្នកបង្កើតល្បែងប្រកួតប្រជែងនេះ មិនបានគិតដល់ទេថា វិញ្ញាសារដែលពួកគេបានដាក់ចុះមក បង្កឲ្យ​មានប្រតិកម្មខ្លាំងក្លាដូច្នេះឡើយ។ ប្រតិកម្មរហូតដល់ធ្វើឲ្យក្រុមហ៊ុនអាកាសចរណ៍ ប្រកាសលប់ចោល​ការ​ប្រកួតប្រជែងនេះ ដែលមានបំណងចង់ប្រគល់សំបុត្រធ្វើដំណើរដោយមិនគិតថ្លៃ ទៅដល់អ្នកដែលឆ្លើយ​ត្រូវ​នឹងសំនួរ។

សំនួរនោះ គឺអ្នកចូលរួមត្រូវសរសេរជាបញ្ជីមួយ នៃទិសដៅធ្វើដំណើរដែលខ្លួនចង់ទៅ មុននឹង«ស្លាប់»។ បណ្ដាញទូរទស្សន៍របស់បារាំងមួយ បាននិយាយថា នេះជាការល្បងប្រាជ្ញាដ៏អាក្រក់មួយ ខណៈពេល​ដែល​ក្រុមហ៊ុន បានជួបគ្រោះថ្នាក់យន្ដហោះ ដល់ទៅពីរដង ស្លាប់មនុស្សដល់ទៅជាង៥០០នាក់ តែក្នុង​រយៈពេល​ត្រឹមតែ៤ខែប៉ុណ្ណោះ។

ការបង្កើតល្បែងនេះឡើង ដើម្បីចង់ផ្ដល់ឱកាស ទៅឲ្យអតិថិជនរប​ស់ខ្លួនសារជាថ្មី ដោយសារតែតាំងពីជួប​ព្រឹត្តិការណ៍ផ្ទួនៗគ្នានេះហើយ ក្រុមហ៊ុនអាកាសចរណ៍ របស់ប្រទេសម៉ាឡេស៊ីមួយនេះ បានកំពុងជួបប្រទះ នូវវិបត្តិហិរញ្ញវត្ថុយ៉ាងធ្ងន់ធ្ងរ។ រូបថតជាច្រើន ត្រូវបានបង្ហោះផ្សព្វផ្សាយ ពាសពេញបណ្ដាញសង្គម បង្ហាញ​កៅអីទំនេរសឹងតែទាំងអស់ នៅក្នុងយន្ដហោះ ម៉ាឡេស៊ីអ៊ែរឡាញ។ ក្រុមហ៊ុនក៏បានប្រកាសផងដែរ ពីការ​បញ្ឈប់​បុគ្គលិក  ៦០០០នាក់ ប្រមាណជា១ភាគបី នៃបុគ្គលិកទាំងអស់។

ប៉ុន្តែការបង្កើតល្បែងប្រកួតប្រជែង ដែលសម្រាប់តែអតិថិជន ជាតិអូស្ត្រាលី និងញ៉ូ ហ្សេឡេននោះ បានបង្ក​ឲ្យមានការវាយតបត្រឡប់មកវិញ យ៉ាងជូរចត់ ដោយសារតែល្បែងនេះ បានបង្ហាញសំនួរដែល​មិនបានគិត​ពី​ខ្លួនឯង។ បណ្ដាញផ្សាព្វផ្សាយជាច្រើន របស់ប្រទេសទាំងនោះ បានលើកមកធ្វើការប្រៀបធៀបថា៖ «តើ​ពិត​ជាមហាសមុទ្រឥណ្ឌាខាងត្បូង (តំបន់ដែលយន្ដហោះទីមួយ បានធ្លាក់បាត់ខ្លួន?) និងតំបន់សង្គ្រាមនៅ​ប្រទេស​អ៊ុយក្រែន (តំបន់ដែលយន្ដហោះទីពីរ ត្រូវបានបាញ់ទម្លាក់?) នោះមែនឬ​ ជាទិសដៅធ្វើដំណើរ​ដ៏​ថ្លៃថ្លា ដែល​អ្នក​ដំណើរទាំងឡាយក្នុងពិភពលោក ចង់ធ្វើដំណើរជាមួយម៉ាឡេស៊ីអ៊ែរឡាញ?»៕