មនុស្សចំនួន៤នាក់បានស្លាប់ ប្រជាពលរដ្ឋនិងកំលាំសមត្ថកិច្ចចំនួន ៦៤នាក់បានរងរបួសនិង មនុស្ស ២៣នាក់បាន​ឃាត់ខ្លួន ព្រមទាំងខូខាតទ្រព្យសម្បតិ្តសាធារណៈរបស់រដ្ឋ និងទ្រព្យសម្បត្តិរបស់ឯកជននៅរាជធានីភ្នំពេញ និងខេត្ត​ចំនួន ជាង៧លានដុល្លារចាប់តាំងថ្ងៃធ្វើបាតុកម្ម ក្រោយការបោះឆ្នោត ថ្ងៃទី២៨កក្កដា ឆ្នាំ២០១៣ រហូតដល់ដើម​ខែ​មករា ឆ្នាំ២០១៤ ដែលអាជ្ញាធរបានហៅថា ជាបាតុកម្មខុសច្បាប់ ដែលដឹកនាំដោយគណបក្សសង្គ្រោះជាតិ។ នេះបើ​យោងទៅតាម ការចេញផ្សាយសេចក្តីសម្រង់ របកគំហើញរបស់គណៈកម្មការវាយតម្លៃការខូតខាត ដែលបង្កឡើង​ដោយ​បាតុកម្ម របស់ក្រសួងមហាផ្ទៃដែលបានចេញផ្សាយកាលពីថ្ងៃទី២៦ ខែមិនា។

នៅក្រោយការបំបែកបន្ទាយបាតុកម្មរបស់គណបក្សប្រឆាំង នៅទីលានប្រជាធិបតេយ្យថ្ងៃទី០៤ ខែមករា ឆ្នាំ២០១៤។ (រូបថត MONOROOM.info/ O.vary)

បាតុកម្ម - សេចក្តីសម្រង់ពីការវាយតម្លៃ ចេញផ្សាយនៅថ្ងៃទី២៦ ខែមីនា ឲ្យដឹងថា ការខូចខាតទ្រព្យសម្បត្តិ​សាធារណៈ​រដ្ឋ និងឯកជននៅរាជធានីភ្នំពេញ និងបណ្តាខេត្តមួយចំនួន មានចំនួន៧.៦លានដុល្លារ ដែលក្នុងនោះ​ការ​ខូចខាតនៅរាជធានីភ្នំពេញ មានទៅដល់ជាង៧.៥លានដុល្លារ ខេត្តស្វាយរៀង ជាង៥ម៉ឺនដុល្លារ និងខេត្ត​កំពង់ឆ្នាំង ជិត២ពាន់ដុល្លារ។ ការខូចខាតទាំងនោះ រាប់បញ្ចូលទៅលើការខូចខាតផ្ទៃកៅស៊ូ មុខសួនកាណាឌីយ៉ាផ្លូវវ៉េងស្រេង មុខសាលារាជធានីភ្នំពេញ ការខូចខាតខឿនបែងចែកចរាចរណ៍ បាក់ក្បាលរ៉ូមប៊ីណេបាញ់ទឹកចំនួន ៣៥ក្បាល ខូចផ្កា ខូចមន្ទីរពេទ្យពហុព្យាបាលឯករាជ្យ និងហាងកាហ្វេជាដើម។ ចំណែកការខូចខាតនៅរោងចក្រកាត់ដេរវិញ មានចំនួន​ប្រមាណ ៧២លានដុល្លារ ក្នុងនោះរួមមានការខូចទ្រព្យសម្បត្តិ ១៧.២លាន ខូចសង្វាក់ផលិតកម្ម៤៦.២ ខូចសម្ភារៈ​ផ្សេងៗចំនួន៨.៧លាន។

នៅក្នុងរបាយការណ៍បានបញ្ជាក់ថា ការខូចខាតបណ្តាលមកពីបាតុកម្ម ដឹកនាំដោយគណបក្សសង្គ្រោះជាតិ បង្កឲ្យ​មានការប៉ះទង្គិចគ្នាដោយហិង្សា ក្នុងព្រឹត្តិការណ៍ កាលពីថ្ងៃទី២ និងថ្ងៃទី៣ ខែមករា ឆ្នាំ២០១៤ នៅតំបន់​រោងចក្រ​យាកជីង និងតាមបណ្តាយផ្លូវវេងស្រេង បានបណ្តាលឲ្យប្រជាពលរដ្ឋស្លាប់ ៤ នាក់ ប្រជាពលរដ្ឋរងរបួស ៣៥ នាក់ កងកម្លាំងរាជអាវុធហត្ថរបួស ២៩ នាក់ កងកម្លាំងនគរបាលជាតិ របួស ១៦ នាក់ ឃាត់ខ្លួនមនុស្ស ២៣ នាក់។

នៅក្នុងរបាយការណ៍នោះបានសរសេរថា ក្រោយការប្រកាសលទ្ធផលបោះឆ្នោតអាណត្តិទី៥ ថ្ងៃទី២៨ កក្កដា ឆ្នាំ​២០១៣ គណបក្សសង្គ្រោះជាតិដឹកនាំដោយលោក សម រង្ស៊ី និងលោក កឹម សុខា បានដឹកនាំធ្វើបាតុកម្មជាបន្តបន្ទាប់ ដោយញុះញង់ កុហក បោកប្រាស់ ប្រជាពលរដ្ឋក្នុងនិងក្រៅប្រទេស ព្រមទាំងមតិសាធារណៈ ដើម្បីគៀងគរ​ប្រមូល​កំលាំងមនុស្ស និងធនធានហិរញ្ញវត្ថុសំរាប់ចូលរួម និងគាំទ្របាតុកម្មរបស់ខ្លួននៅទីលានប្រជាធិបតេយ្យ ប៉ុន្តែដោយ​សកម្មភាពបាតុកម្មរបស់ខ្លួន ពុំទទួលបានលទ្ធផលដូចការរំពឹងទុក គណបក្សសង្គ្រោះជាតិបាន​ប្រកាសធ្វើបាតុកម្មជា​រៀងរាល់ថ្ងៃនៅទីលានប្រជាធិបតេយ្យ ដែលបន្ទាប់មកបាតុកម្មនៅនឹងកន្លែងនេះ ក៏ក្លាយជាបាតុកម្មដើរដង្ហែរ​តាមដង​ផ្លូវនានា ក្នុងរាជធានីភ្នំពេញ ទោះបីពុំមានច្បាប់អនុញ្ញាតិពីសាលារាជធានីក្តី។

«បាតុកម្មខុសច្បាប់ ដែលដឺកនាំដោយគណបក្សសង្គ្រោះជាតិ គឺជាសកម្មភាពបង្ករហេតុ ដែលមានផែនការគ្រោងទុក និងមានចេតនាផ្តួលរំលំរដ្ឋាភិបាលស្របច្បាប់ ដោយធ្វើការញុះញង់ បង្កឲ្យកើតមានអំពើហិង្សាយ៉ាងអនាធិបតេយ្យ ពេលប៉ះទង្គិចជាមួយកងកម្លាំងសមត្ថកិច្ច រហូតដល់បង្កឲ្យមានការបាត់បង់អាយុជីវិតមនុស្ស របួសកងកម្លាំង​សមត្ថកិច្ច ប្រជាពលរដ្ឋ និងមានការឃាត់ខ្លួនមនុស្សមួយចំនួន»។

នៅក្នុងរបាយការណ៍បានលើកឡើងថា បាតុកម្មនេះ បានបង្កឲ្យប៉ះពាល់ដល់សិទ្ធិសេរីភាព សុវត្ថិភាព សណ្តាប់ធ្នាប់​សាធារណៈ និងផលប្រយោជន៍របស់ប្រជាពលរដ្ឋ និងវិនិយោគិនដទៃទៀតយ៉ាងធ្ងន់ធ្ងរ ដែលជាសកម្មភាព​រំលោភ​សិទ្ធិមនុស្សវិច្ឆេទកម្មសេដ្ឋកិច្ច វិធ័ង្សនានយោបាយ និងបង្កគ្រោះមហន្តរាយដល់សន្តិសុខជាតិ បំរើឲ្យឧបាយកល និងមហិច្ឆតានយោបាយរបស់គណបក្សសង្គ្រោះជាតិ។ នៅក្នុងរបាយការណ៍នោះបានឲ្យដឹងទៀតថា ៖ «បាតុកម្ម​ខុសច្បាប់ដឹកនាំដោយគណបក្សសង្គ្រោះជាតិ ក៏បង្កឲ្យមានការរើសអើងជាតិសាសន៍ បំបែកបំបាក់សាមគ្គីជាតិ​បង្ក​អនាធិបតេយ្យ មិនមានការទទួលខុសត្រូវ និងមិនគោរពច្បាប់ ដែលនៅជាធរមាន»។

លោក គៀត ច័ន្ទថារិទ្ធ អ្នកនាំពាក្យស្នងការនគរបាលជាតិបានថ្លែងឲ្យដឹងថា សមត្ថកិច្ចត្រូវរងចាំមើល​របាយការណ៍​មួយទៀតដែលស៊ើបអង្កេតដែលបង្កឲ្យមានអំពើរហឹង្សារនៅថ្ងៃទី២និងថ្ងៃទី២ ខែមករា នៅលើវិថីវ៉េងស្រេង ចំណែក​របាយការណ៍គ្រាន់តែនិយាយ អំពីបាតុកម្មធ្វើឲ្យខូចខាតដោយសារតែបាតុកម្មប៉ុណ្ណោះ ប៉ន្តែអំពើហឹង្សាដែលនាំឲ្យ​ខូខាត​នោះវាទាក់ទងគ្នា។ លោកបានឲ្យដឹងទៀតថា ៖ «ទាក់ទងចំណាត់ការដាក់ទោសពៃ គណបក្សសង្គ្រោះជាតិ គឺហួសសមត្ថភាពខ្ញុំហើយ លុះត្រាតែក្រសួងមហាផ្ទៃ រឺក៏រដ្ឋាភិបាលទើបអាចឆ្លើយបាន»។

លោកស្រី មូរ សុខហួ អ្នកនាំពាក្យគណបក្សសង្គ្រោះជាតិបានថ្លែងថា គណបក្សសង្គ្រោះជាតិ ពុំអាចទទួល​យក​បាន​ទេ ចំពោះរបាយការណ៍ ដែលចេញមកពីគណកម្មាធិការមិនឯករាជ្យនោះ គឺពុំទទួលយកបានទេ ថាតើកំាភ្លើង អាវុធ​ទាំងអស់នោះបានមកពីណា? ហើយគណកម្មាធិការនោះ គឺជាក្រសួងមហាផ្ទៃដដែល។ អ្នកស្រីបានថ្លែងថា៖ «នេះ​គឺជារបាយការណ៍ ចោរចាប់ចោរតែប៉ុណ្ណោះ»។

កាលពីថ្ងៃ ទី១២ ខែ មករា លោកនាយករដ្ឋមន្រ្តី ហ៊ុន សែន បានប្រកាសបង្កើតគណៈកម្មការ ដើម្បីធ្វើការស៊ើប​អង្កេត​លើអំពើហិង្សា ដែលបានកើតឡើងនៅផ្លូវ វ៉េងស្រេង ដោយគណៈកម្មការនេះ ដឹកនាំដោយលោក ស ខេង រដ្ឋមន្រ្តី​ក្រសួង មហាផ្ទៃ៕

------------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី២៧ មីនា ២០១៤