នាយករដ្ឋមន្រ្តីកម្ពុជាលោក ហ៊ុន សែន មិនបានប្រតិកម្មខ្លាំងក្លា ចំពោះគម្រោងសមាជរបស់គណបក្ស​សង្រ្គោះជាតិ​នោះទេ តែបានព្រមានដោយប្រយោលថា កុំធ្វើអ្វីហួសដែនកំណត់របស់ច្បាប់ ហើយគម្បីប្រកាន់ធម៌ខន្តី។ ការលើក​ឡើងរបស់លោក ហ៊ុន សែន បានកើតឡើងមួយថ្ងៃប៉ុណ្ណោះ ក្រោយការប្រកាសរបស់លោក សម រង្ស៊ី ប្រធាន​គណបក្ស​សង្រ្គោះជាតិ ថានឹងដឹកនាំធ្វើសមាជប្រជាពលរដ្ឋ នៅថ្ងៃទី៣០ ខែមីនា ឆ្នាំ២០១៤ នៅទីលានប្រជា​ធិបតេយ្យ។

លោក ហ៊ុន សែន នាយករដ្ឋមន្រ្តីកម្ពុជា។

នយោបាយកម្ពុជា - ថ្ងៃទី២៧ មីនា នេះលោក ហ៊ុន សែន នាយករដ្ឋមន្រ្តីកម្ពុជា ក្នុងកម្មវិធីមួយនៅខេត្តពោធិ៍សាត់ បានអះអាថា លោកមិនព្រួយបារម្ភ នឹងការធ្វើបាតុកម្មណាមួយនោះទេ តែលោកបានព្រមានថា ការធ្វើបាតុកម្ម​ណា​មួយនោះ កុំឲ្យតែផុតពីច្បាប់កំណត់ និងហួសកំណត់ពីការខន្តី។ ការថ្លែងសារនយោបាយ ដែលទំនងសំដៅដល់​ការ​ធ្វើសមាជ របស់គណបក្សសង្គ្រោះជាតិ លោកហ៊ុន សែន បានសង្កត់ធ្ងន់ថា ការធ្វើបាតុកម្មជាសិទ្ធិសេរីភាព​របស់​ប្រជាពលរដ្ឋ តែកុំឲ្យឈានទៅដល់ការប្រើអំពើហិង្សា និងការបែកបាក់ជាតិ។

លោក សម រង្ស៊ី ប្រធានគណបក្សសង្រ្គោះជាតិ បានថ្លែងក្នុងសន្និសីទកាសែត នៅទីស្នាក់ការកណ្តាល របស់​គណបក្សខ្លួន ពីថ្ងៃម្សិលមិញថា គណបក្សសង្រ្គោះជាតិ នឹងដឹកនាំធ្វើសមាជប្រជាពលរដ្ឋ តាមបែបប្រជាធិបតេយ្យ នៅថ្ងៃទី៣០ ខែមីនា ឆ្នាំ២០១៤ លើទីលានប្រជាធិបតេយ្យ ក្បែរស្ថានទូតអាមេរិក។ ប្រធានគណបក្សជំទាស់រូបនេះ បានបន្ថែមថា កម្មវិធីនោះ គឺជាសមាជសម្តែងមតិប្រជាពលរដ្ឋ មិនមែនជាបាតុកម្មដើម្បីទម្លាក់រដ្ឋាភិបាល ឬប្រឆាំង​គណបក្សនយោបាយណាមួយនោះទេ។

ប្រធានមជ្ឈមណ្ឌលអភិវឌ្ឍន៍ពលរដ្ឋ និងសន្តិភាព លោក យ៉ង់ គឹមអេង បានពន្យល់ថា ការអត់ធ្មត់ ក្នុងការចរចា ដើម្បី​សម្រេចបានលទ្ធផលពិតប្រាកដ ក្នុងការកំណែទម្រង់ដ៏ទូលំទូលាយ គឺជាកាតព្វកិច្ចដែល គណបក្សប្រជាជនកម្ពុជា និងគណបក្សសង្រ្គោះជាតិ ត្រូវតែប្រកាន់យក។

លោក យ៉ង់ គឹមអេង បញ្ជាក់ថា៖ «យើងឃើញថាបាតុកម្មបណ្តើរចរចាបណ្តើរ ដែលជាការដាក់សម្ពាធ ក៏ដូចជាមិន​មានឃើញអ្វីប្លែក។ ហើយរឿងសំខាន់គណបក្សទាំងពីរ ត្រូវតាំងចិត្តឲ្យមុតមាំ ក្នុងការស្វែងរកដំណោះស្រាយរួម។ ហើយត្រូវយកបញ្ហាជាក់ស្តែង ជាអាទិភាព មកជជែក ដោយភាពស្មោះត្រង់។»

គួរកត់សម្គាល់ថា ការធ្វើសមាជរបស់គណបក្សសង្រ្គោះជាតិ គឺបានកើតឡើង ស្របពេលដែលគណៈកម្មការចម្រុះ​កែទម្រង់ការបោះឆ្នោត របស់គណបក្សប្រជាជនកម្ពុជា និងគណបក្សសង្រ្គោះជាតិ បានផ្អាកការចរចាមួយរយៈ ដោយសារមានការខ្វែងគំនិតគ្នា លើលក្ខខណ្ឌកំណែទម្រង់ តែតំណាងក្រុមការងារបច្ចេកទេស នៃគណបក្សទាំងពីរ​បានអះអាងថា នឹងបន្តជួបជជែកគ្នាជាថ្មី៕

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២៧ មីនា ២០១៤