ប្រមាណជាជាង៣០០ វត្ថុអណ្ដែតលើផ្ទៃទឹកផ្សេងទៀត ត្រូវបានថតឆ្លុះឃើញដោយប្រព័ន្ធផ្កាយរណប របស់ប្រទេស​ថៃ នៅលើផ្ទៃមហាសមុទ្រឥណ្ឌាខាងត្បូង នៅថ្ងៃព្រហស្បត្តិ៍ទី២៧ ខែមីនានេះ។ ការថតឆ្លុះរកឃើញ​ ត្រូវបានផ្សាយ​ឲ្យដឹងនៅមុនពេលបេសកកម្មរុករកនៅកណ្ដាលផ្ទៃមហាសមុទ្រ ត្រូវបានផ្អាកជាថ្មីទៀត ដោយសារស្ថានភាព​ឧត្តុនិយម មិនអំណោយផល។

រូបភាពថតចម្លងពីការឆ្លុះឃើញ របស់ផ្កាយរណបថៃ។

បាត់យន្ដហោះ - រូបភាពជាច្រើន ពីប្រព័ន្ធផ្កាយរណបរបស់ប្រទេសថៃ បានបង្ហាញពីវត្ថុអណ្ដែតលើផ្ទៃទឹក​ប្រមាណ​ជា ៣០០ ក្នុងតំបន់រុករកយន្ដហោះប៊ូអីង នៃជើងហោះហើរ MH370 នៅកណ្ដាលមហាសមុទ្រឥណ្ឌាខាងត្បូង។ នាយក​ប្រតិបត្តិនៃទីភ្នាក់ងារសាធារណៈ GISTDA លោក អាណុដ ស្នីដវង្ស បានថ្លែងបញ្ជាក់ថា «វត្ថុមួយចំនួន ពីក្នុង​ចំណោមនោះ មានបណ្ដោយប្រវែងរហូតដល់ទៅ១៥ម៉ែត្រ»។

ប៉ុន្តែអ្នកទទួលខុសត្រូវរូបនេះ មិនបានបញ្ជាក់ថា រូបភាពទាំងនេះ ថាជាបំណែកបែកបាក់របស់យន្ដហោះ របស់​ក្រុមហ៊ុនម៉ាឡេស៊ីអ៊ែឡាញ ដែលបានបាត់ខ្លួនតាំងពីថ្ងៃទី៨ ខែមីនានោះទេ។ វត្ថុទាំងនេះ បានស្ថិតរាយដេរដាស នៅលើផ្ទៃទឹកជាច្រើនរយគីឡូម៉ែត្រការ៉េ និងស្ថិតនៅចម្ងាយ២០០គីឡូម៉ែត្រ ពីវត្ថុទាំង១២២ ថតឆ្លុះឃើញដោយ​ប្រព័ន្ធផ្កាយរណបរបស់បារាំង ផ្សាយឲ្យដឹងកាលពីមួយថ្ងៃមុន។

ការរុករកបានផ្អាកជាថ្មីទៀត

នៅលើតំបន់ដែលគេសង្ស័យថា ជាកន្លែងដែលយន្ដហោះធ្លាក់នោះ បានរងនូវស្ថានភាពឧត្តុនិយម​យ៉ាងអាក្រក់​ជា​ថ្មីទៀត នៅថ្ងៃព្រហស្បត្តិ៍នេះ បង្កឲ្យការរុករកដែលបានចាប់ផ្ដើមធ្វើឡើងវិញ កាលពីថ្ងៃពុធម្សិលម៉ិញ បានផ្អាក​សកម្មភាពរបស់ខ្លួនជាថ្មីទៀត។ យន្ដហោះ និងនាវាទាំងអស់ ត្រូវបានហៅឲ្យត្រឡប់មកវិញ។

ក្រុមហ៊ុនធានារ៉ាប់រងចិន ចាប់ផ្ដើមសងប្រាក់ធានារ៉ាប់រង ទៅឲ្យគ្រួសារជនរងគ្រោះ

បើទោះជាបំណែកយន្ដហោះ មិនទាល់ត្រូវបានរកឃើញ និងមូលហេតុពិតប្រាកដរបស់យន្ដហោះ នៅមិនទាន់​បាន​រកឃើញច្បាស់លាស់នៅឡើយ តែក្រុមហ៊ុនធានារ៉ាប់រងចិន ចាប់ផ្ដើមសងប្រាក់ធានារ៉ាប់រង ទៅដល់អតិថិជន​របស់​ខ្លួន។ បើតាមសារព័ត៌មានចិនថ្មី  បានឲ្យដឹងថា គ្រួសាររបស់ជនរងគ្រោះ យ៉ាងហោចណាស់ចំនួន៧ បានទទួល​កាលពីថ្ងៃអង្គារ នូវទឹកប្រាក់ប្រមាណជា ៤,១៧លានយ័ន ពីក្រុមហ៊ុន ឆាណាឡៃហ្វ (China Life) ដែលពួកគេបាន​ទិញការធានារ៉ាប់រង សម្រាប់ធ្វើដំណើរ។ ក្រុមហ៊ុនផ្សេងទៀត ដូចជា ឆាណាប៉ាស៊ីភិក អ៊ិនសួរ៉េន (China Pacific Insurance)  ក៏បានអះអាងដែរថាខ្លួន បានបង់ប្រាក់ចំនួន ៥២៥ ០០០យ័ន ទៅគ្រួសារដែលមានសាច់ញាតិរងគ្រោះ នៅលើយន្ដហោះប៊ូអ៊ីង ៧៧៧៕

-----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២è មីនា ២០១៤