អ្នក​អង្កេត​អាមេរិក​ សង្ស័យ​អ្នក​បើក​យន្ដហោះ​បាត់​ខ្លួន ថា​ជា​ដើម​ហេតុ

ក្រុមមេធាវីអាមេរិក និងក្រុមអ្នកស៊ើបអង្កេត អេហ្វប៊ីអាយ (FBI) ងាកមកសំលឹងមើលការស៊ើបអង្កេត ដែលត្រូវធ្វើ​ទៅ​លើ​ លោក ហ្សាហារី អាមេដ សារ (Zaharie Ahmad Shah) មេបញ្ជាការបើកបរយន្ដហោះប៊ូអីង ដែលបាត់ខ្លួនតាំង​ពី​ជិតបីសប្ដាហ៍​មកហើយ។ ពួកគេបានរកឃើញចំនុចជាច្រើន ដែលឈានទៅដាក់ការសន្និដ្ឋានថា មេបញ្ជាការរូបនេះ ទំនងជាបានកាត់ផ្ដាច់ប្រព័ន្ធទំនាក់ទំនងរបស់យន្ដហោះ ពីបន្ទប់ត្រួតពិនិត្យជើងហោះហើរ នៅលើផែនដី ហើយបាន​បង្វិលទិសរបស់យន្ដហោះ ដោយការប៉ុនប៉ងមួយ។
Loading...
  • ដោយ: សុបិន្ដ
  • កែប្រែចុងក្រោយ: March 28, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ក្រុមមេធាវីអាមេរិក និងក្រុមអ្នកស៊ើបអង្កេត អេហ្វប៊ីអាយ (FBI) ងាកមកសំលឹងមើលការស៊ើបអង្កេត ដែលត្រូវធ្វើ​ទៅ​លើ​ លោក ហ្សាហារី អាមេដ សារ (Zaharie Ahmad Shah) មេបញ្ជាការបើកបរយន្ដហោះប៊ូអីង ដែលបាត់ខ្លួនតាំង​ពី​ជិតបីសប្ដាហ៍​មកហើយ។ ពួកគេបានរកឃើញចំនុចជាច្រើន ដែលឈានទៅដាក់ការសន្និដ្ឋានថា មេបញ្ជាការរូបនេះ ទំនងជាបានកាត់ផ្ដាច់ប្រព័ន្ធទំនាក់ទំនងរបស់យន្ដហោះ ពីបន្ទប់ត្រួតពិនិត្យជើងហោះហើរ នៅលើផែនដី ហើយបាន​បង្វិលទិសរបស់យន្ដហោះ ដោយការប៉ុនប៉ងមួយ។


លោក ហ្សាហារី អាមេដ សារ មេបញ្ជាការបើកបរយន្ដហោះប៊ូអីង ៧៧៧ ដែលបាត់ខ្លួន។ (រូបថតហ្វេសប៊ុក)

បាត់យន្ដហោះ - ចំណុចសង្ស័យទាក់ទងនឹងអំពើអស់សង្ឃឹមក្នុងជីវិត របស់អ្នកបើកបរយន្ដហោះ បានទាក់ទាញ​ការចាប់អារម្មណ៍របស់ក្រុមអ្នកស៊ើបអង្កេត ដើម្បីស្វែងរកមូលហេតុថា ហេតុអ្វីបានជាប្រព័ន្ធទំនាក់ទំនង​ចំនួនពីរ​គ្រឿង​នៅលើយន្ដហោះ ត្រូវបានកាត់ផ្ដាច់ជាបន្តបន្ទាប់ ចន្លោះរវាងតែប៉ុន្មាននាទីប៉ុណ្ណោះ?

រហូតមកដល់ម៉ោងនេះ គេនៅមិនទាន់រកឃើញ នូវចំនុចសង្ស័យថា ការចាប់ពង្រត់យន្ដហោះនេះ ថាជាស្នាដៃរបស់​អ្នកដំណើរសមញ្ញណាម្នាក់នៅឡើយ។ ម្យ៉ាងទៀត ការសង្ស័យដែលទាក់ទងនឹងបញ្ហាបច្ចេកទេស (ដូជា ម៉ាស៊ីនខូច) ក៏នៅមិនទាន់មានឃើញតម្រុយរឹងមាំណាមួយ មកបញ្ជាក់បានដូចគ្នា។ ដោយសារតែហេតុនេះ ទើបអ្នកស៊ើបអង្កេត​បានគិតថា គឺអ្នកបើកបរយន្ដហោះផ្ទាល់នេះតែម្ដង ដែលមានបំណងចង់ប្ដូរទិសដៅ របស់យន្ដហោះ។ ប៉ុន្តែដើម្បីអ្វី ក្នុងមូលហេតុអ្វី? អ្នកស៊ើបអង្កេតទាំងនោះ បានបង្ហើបទៀតថា ទំនងជាលទ្ធផល នៃក្ដីអស់សង្ឃឹម។

កាលពីសប្ដាហ៍មុន អាជ្ញាធររបស់ប្រទេសម៉ាឡេស៊ី បានប្រគល់ទៅឲ្យភ្នាក់ងារស៊ើបអង្កេតអាមេរិក អេហ្វប៊ីអាយ នូវ​ប្រព័ន្ធកំព្យូទ័រ ដែលរៀបជាការបើកបរយន្ដហោះសាកល្បង របស់លោក ហ្សាហារី អាមេដ សារ មេបញ្ជាការបើក​បរ​យន្ដហោះប៊ូអីង ដើម្បីស្រាវជ្រាវឆែកឆេរ។ លោក ជេម ខូម៉ី (James Comey) នាយកគ្រប់គ្រងរបស់​ការិយាល័យ​សហព័ន្ធ​ស៊ើបអង្កេត (FBI) របស់អាមេរិកនេះ បានប្រកាសកាលពីថ្ងៃពុធកន្លងមកថា «ការពិនិត្យរុករកក្នុង​ម៉ាស៊ីន​បើក​បរសាកល្បងតាមប្រព័ន្ធកំព្យូទ័រ របស់អ្នកបើកបរយន្ដហោះ នឹងអាចរួចរាល់នៅរវាងពី១ឬ២ថ្ងៃខាងមុខនេះ»។

ទិន្និន័យជាច្រើនត្រូវបានលប់ចេញ ពីម៉ាស៊ីនបើកបរសាកល្បង

អ្នកស៊ើបអង្កេត ចងយកត្រឡប់មកវិញនូវទិន្នន័យទាំងនោះ ដែលត្រូវបានលប់ចេញពីអង្គផ្ទុករបស់កំព្យូទ័រ កាលពី​អំឡុងដើមខែកុម្ភះ។ ការសែតម៉ាឡេស៊ី បានដកស្រង់នូវអ្វី ដែលគេបានរកឃើញនៅក្នុង ម៉ាស៊ីនបើកបរ​សាកល្បង​នោះ មកសរសរថា មេបញ្ជាការបើកបរយន្ដហោះប៊ូអីង បានរៀនបើកជាញឹកញយ ឆ្ពោះទៅកាន់ព្រលាន​យន្ដហោះ​ផ្សេងទៀត ដែលស្ថិតនៅក្នុងឬនៅក្បែរមហាសមុទ្រឥណ្ឌា។ ព្រលានយន្ដហោះទាំងនោះ មានចំងាយផ្លូវសម្រាប់​ចុះ​ចតតែ១០០០ម៉ែត្រប៉ុណ្ណោះ បើប្រៀបធៀបមកព្រលានយន្ដហោះជាទូទៅ ដែលមានចម្ងាយផ្លូវសម្រាប់ការចុះចត រហូតដល់ទៅ២៥០០ម៉ែត្រ។ គេឆ្ងល់ថា ហេតុអ្វីបានអ្នកបើកបរយន្ដហោះប៊ូអីង ៧៧៧ រូបនេះ ព្យាយាមហ្វឹកហាត់​យក​ការចុះចត នៅលើព្រលានដ៏ខ្លីរបៀបនេះ?

យន្ដហោះដែលភ្ជាប់ជើងហោះហើរ MH370 ពីរដ្ឋធានីកូឡាឡំពួរ ឆ្ពោះទៅកាន់រដ្ឋធានីប៉េកាំង បានងាកចេញ​ពីផ្លូវ​របស់វា នៅក្រោយបន្តិច ពីពេលយន្ដហោះបានបង្ហើបជើង ចេញព្រលានយន្ដហោះអន្តរជាតិរបស់ប្រទេសម៉ាឡេស៊ី។ យន្ដហោះបានបន្តដំណើរឆ្ពោះ​ទៅកាន់ទិសខាងត្បូង រហូតដល់ធ្លាក់ក្នុងទឹកសមុទ្រ ដែលទំនងជាបណ្ដាល​មកពី​«អស់សាំង»។ បើតាមការគណនារបស់ក្រុមអ្នកជំនាញ ពីពេលដែលបានបង្ហើបខ្លួន រហូតធ្លាក់នៅក្នុង​មហាសមុទ្រ​ឥណ្ឌាខាងត្បូងនោះ យន្ដហោះបានប្រើរយៈចម្ងាយ៥៥០០គីឡូម៉ែត្រ ដែលដូចជាខ្លីពេក បើប្រៀបធៀប​នឹងចំងាយ​ផ្លូវហោះហើរជាធម្មតា របស់យន្ដហោះប្រភេទនេះ ដែលអាចមានរហូតដល់ទៅ ៩៦០០គីឡូម៉ែត្រ។

យន្ដហោះ«ខ្មោច» ...

ក្រុមមេធាវីអាមេរិក ដែលបានការពារក្ដី ក្នុងបណ្ដឹងរបស់ជនជាតិឥណ្ឌូនេស៊ីមួយរូប ប្រឆាំងនឹងក្រុមហ៊ុនអាការចរណ៍ ម៉ាឡេស៊ីអ៊ែរឡាញ និងក្រុមហ៊ុនផលិតយន្ដហោះ ប៊ូអីង បានគិតថា អគ្គិភ័យឬសម្ពាធខុសប្រក្រតី​នៅក្នុងបន្ទប់បើក​បរ​យន្ដហោះ បានធ្វើឲ្យអ្នកបើកបរទាំងពីររូបបាត់បង់ស្មារតី ហើយបន្ទាប់ពីនោះយន្ដហោះប៊ូអ៊ីង បានក្លាយជា​យន្ដហោះ​«ខ្មោច» (គ្មានអ្នកបើក)។

កូនប្រុសចេញមុខការពារឪពុក

សម្រាប់កូនប្រុសរបស់ លោក ហ្សាហារី អាមេដ សារ បានបដិសេធចោលនូវរាល់ការលើកឡើងទាំងឡាយ ដែលថា​គ្រោះថ្នាក់នៃយន្ដហោះប៊ូអីង បណ្ដាលមកពីឪពុកខ្លួន។ យុវជនកូនអ្នកបើកបរយន្ដហោះ បានថ្លែងប្រាប់​សារព័ត៌មាន​មួយរបស់​ម៉ាឡេស៊ីថា ៖ «ខ្ញុំមិនគិតដូចអ្វី ដែលគេចោទប្រកាន់ឪពុកខ្ញុំនោះទេ។ ខ្ញុំស្គាល់ឪពុកខ្ញុំច្បាស់ណាស់។»

លោក ហ្សាហារី អាមេដ សារ ត្រូវបានសាច់ញាតិ និងមិត្តរួមអាជីពបញ្ជាក់អះអាងថា លោកជាអ្នកមានជំនក់ចិត្ត​មួយ​រូប​ ខាង​ផ្នែកអាកាសចរណ៍។ សហសេវិកមួយរូប ដែលបានធ្វើជាជំនួយការ​បើក​យន្ដហោះជាមួយលោក បានថ្លែង​ឲ្យ​ដឹងថា លោក ហ្សាហារី អាមេដ សាដ៍ ស្គាល់យន្ដហោះប៊ូអ៊ីង ៧៧៧ ដូច​ហោប៉ៅ​របស់លោកយ៉ាងអញ្ចឹង៕

---------------------------------------------------------
ដោយ សុបិន្ត (ទំនាក់ទំនង៖ [email protected]) - ម៉ុងរ៉េអាល់ ថ្ងៃទី២៧ មីនា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...