គម្រោងសាងសង់ទំនប់វារីអគ្គិសនីសេសានក្រោមពីរ ក្នុងរយៈកាលជាងពីរឆ្នាំមកនេះ ឃើញមានការអភិវឌ្ឍន៍​លើ​ការ«កាប់»ព្រៃឈើច្រើនជាង ការស្វែង«រក»ដីសម្រាប់ប្រជាពលរដ្ឋរស់នៅ។ តំណាងសហគមន៍ក្នុងតំបន់នោះ​ បាន​ថ្លែងយ៉ាងនេះ ដោយបានបញ្ជាក់ទៀតថា ប្រជាសហគមន៍បានស្វះស្វែងរកអន្តរាគមន៍រឿងដីធ្លីនេះ តាមការ​ដាក់​ញ្ញត្តិ​ទៅស្ថានទូតនានា រដ្ឋាភិបាល និងទៅក្រសួងរ៉ែ និងថាមពល តែនៅតែមិនមានឃើញមានការកម្រើកអ្វីឡើយ។

ជីវភាពប្រជាពលរដ្ឋនៅតាមបណ្ដោយទន្លេសេសាន ខេត្តស្ទឹងត្រែង។ (រូបថត សហការី)

គម្រោងដីធ្លី - លោក កែវ ម៉ីប តំណាងប្រជាសហគមន៍ភូមិក្បាលរមាស ស្រុកសេសាន ខេត្តស្ទឹងត្រែង បាននិយាយ​ថា «បើសាងសង់ក៏សាងសង់ទៅ តែសូមកាត់បន្ថយការប៉ះពាល់ ដល់ការរស់នៅរបស់ប្រជាពលរដ្ឋ។ (…) អ្វីដែល​សំខាន់ មិនដែលឃើញរដ្ឋាភិបាលមកអើត មកមើលរឿងដីធ្លីទេ ឃើញតែក្រុមហ៊ុនមកធ្វើនិងកាប់ព្រៃឈើជា​បន្ត​បន្ទាប់។ (…) បើនៅ(ឲ្យរស់នៅ)កន្លែងណាឲ្យដឹងពិតប្រាកដ តែនេះនៅមិនទាន់ដឹងអីទេ។»

ការថ្លែងរបស់តំណាងពលរដ្ឋខាងលើ ចង់សំដៅទៅលើគម្រោងសាងសង់វារីអគ្គីសនីសេសានក្រោម២ សម្រាប់​ថាមពល ច្រើនជាង៤០០ មេហ្គាវ៉ាត់ ក្រោមការវិនិយោគដែលមានទឹកប្រាក់ ជាង៧៨១លានដុល្លារអាមេរិក របស់​ក្រុមហ៊ុនចម្រុះខ្មែរ-ចិន-​វៀតណាម ឈ្មោះ ហាយដ្រូ ផៅវ័រឡូវើសេសានពីរ។ គម្រោងនេះត្រូវបានរដ្ឋាភិបាល​កម្ពុជា​អនុម័ត្រ កាលពីថ្ងៃទី២ ខែវិច្ឆិកា ឆ្នាំ២០១២ សម្រាប់ការវិនិយោគដែលមានរយៈពេល ៤៥ឆ្នាំ ក្នុងនោះ ៥ឆ្នាំសម្រាប់​ធ្វើការសាងសង់ និង៤០ឆ្នាំសម្រាប់ធ្វើអាជីវកម្ម។

ប៉ុន្តែអ្វីដែលជាការយល់ឃើញ របស់ពលរដ្ឋដែលរស់ក្នុងតំបន់នោះ និងបានក្លាយខ្លួនជាជន​រងគ្រោះនឹងការបណ្ដេញ​ចេញ ទៅរកការបោះទីតាំងថ្មីនោះ បានត្អូញថា ការដោះស្រាយដើម្បីរកដីថ្មី សម្រាប់ឲ្យពលរដ្ឋរស់នៅ មានលក្ខណៈ​យឺតយ៉ាវ មិនស្វាហាប់ដូចការចូលមកកាប់ព្រៃឈើចេញទៅនោះឡើយ។ លោកក្រូ យូរ មេភូមិក្បាលរមាស បាន​និយាយថា «ដំណឹងយ៉ាងណានោះគ្មានទេ សំណងក៏គ្មានដែរ ស្ងាត់ឈឹង។ មានតែក្នុងគម្រោង តែការអនុវត្ត​គ្មាន​ទេ​សម្រាប់ប្រជាពលរដ្ឋ តែសម្រាប់ក្រុមហ៊ុនវិញ ធ្វើជាបន្តរបន្ទាប់មកទល់នឹងពេលនេះ។» រីឯមេឃុំក្បាលរមាសលោក វឿន សម្បត្តិ ក៏ថ្លែងទទួលស្គាល់ដែរ ពីការមិនយកចិត្តទុកដាក់របស់ថ្នាក់លើ (រដ្ឋាភិបាល និងថ្នាក់ខេត្ត) ចំពោះការ​ដោះស្រាយដីធ្លីសម្រាប់ប្រជាពលរដ្ឋ ក្នុងរយៈកាលកន្លងមក រហូតដល់បច្ចុប្បន្ន។

តំណាងមួយរូបទៀត ពីខាងសហគមន៍ស្រែគរ លោក ហ្វឿង ហេង បានត្អូញដោយចំៗថា «មានតែគម្រោងកាប់​ព្រៃ​ឈើត្រូវបានអនុវត្តជាក់ស្តែង តែគម្រោងដីធ្លីប្រជាពលរដ្ឋ មិនឃើញមានការអនុវត្តជាក់ស្តែងសោះ។» ការត្អូញត្អែរ ដែលសម្រាប់លោកជំទប់ទីមួយឃុំស្រែគរ លោក បេង តេង ក៏បានថ្លែងស្រដៀងគ្នានេះដែរថា ក្នុងគម្រោងមានពិត​ប្រាកដណាស់ តែមិនទាន់ឃើញចុះមកសិក្សាផ្ទាល់ ដល់ទីកន្លែងនៅឡើយ ទាំងខាងក្រុមហ៊ុន និង​ទាំងរដ្ឋាភិបាល។

លោកហូ សំ អុល អ្នកសម្របសម្រួលមួយរូប របស់សមាគមអាដហុក ប្រចាំខេត្តស្ទឹងត្រែង បានយល់ស្របនឹងការ​លើកឡើងខាងលើ ថារដ្ឋាភិបាល ឬអាជ្ញាធរខេត្តបានត្រឹមតែធ្វើការផ្សព្វផ្សាយ ឯបញ្ហាដីធ្លីមួយចំនួនធំ នៅមិនទាន់​ឃើញមានភាពជាក់លាក់ ដើម្បីកំណត់ពេលវេលា និងទីតាំងដីពិត ក្នុងការដោះស្រាយចែកជូន​ប្រជាពលរដ្ឋនៅ​ឡើយ។ ទាក់ទងនឹងការកាប់ព្រៃឈើ មន្ត្រីសង្គមស៊ីវិលរូបនេះ បានពន្យល់ថា ទាំងក្រុមហ៊ុនក៏បានកាប់ និងទាំង​ប្រជាពលរដ្ឋ ក៏បានចូលរួមកាប់ដែរ តែឈើដែលកាប់ហើយ ត្រូវបានប្រមូលទិញដោយក្រុមហ៊ុនដដែល។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីលោក ឡូយ សុផាត អភិបាលខេត្តស្ទឹងត្រែងបានទេ នាថ្ងៃសៅរ៍​ទី១៥ ខែមីនានេះ ដោយភ្ជាប់ទំនាក់ទំនងមិនបាន។

តែតំណាងក្រុមហ៊ុនឆាយហ្វ័រណេ របស់ប្រទេសចិន ធ្លាប់បានសន្យាថានឹងខិតខំសហការណ៍ ជាមួយក្រុមការងារ​ថ្នាក់​ខេត្ត ដើម្បីរៀបចំឲ្យប្រជាពលរដ្ឋ ធ្វើការផ្លាស់ប្តូរទីលំនៅទៅកាន់កន្លែងថ្មី ឲ្យបានឆាប់ សំដៅធ្វើឲ្យគម្រោង​សាង​សង់​វារីអគ្គីសនីសេសានក្រោមពីរ មានដំណើរការទៅបានដោយរលូន តាមគំរោងវិនិយោគ៕

-------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៥ ខែមីនា ឆ្នាំ២០១៤