ជំនួបលើកនេះ ហាក់មិនមានភាពជឿនលឿន និងអាចគ្រាន់តែជាយន្ដការមួយ សម្រាប់អូសបន្លាយពេលប៉ុណ្ណោះ ព្រោះ​គណបក្សទាំងពីរ គ្មានចិត្តចង់ត្រូវគ្នានោះទេ។ នេះជាប្រតិកម្មរបស់លោក យ៉ង គឹមអេង មេដឹកនាំអង្គការ​សង្គម​ស៊ិវិលមួយរូប ទាក់ទងនឹងជំនួបទី៣ របស់ក្រុមការងារមកពីគណបក្សទាំងពីរ នៅព្រឹទ្ធសភា ថ្ងៃទី១០ ខែមីនានេះ។

ខាងមុខ៖ លោក ប៊ិន ឈិន (ខាងឆ្វេង) និងលោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា នៅមន្ទីរ​ព្រឹទ្ធសភា ថ្ងៃទី១០ ខែមីនា ឆ្នាំ២០១៤។ (រូបថត MONOROOM.info/ S. Tith)

នយោបាយកម្ពុជា - សម្រាប់អ្នកសង្កេតការណ៍ទូទៅ ក៏បានចាត់ទុកដែរថា ជំនួបទីបីនេះ បានជួបនឹងភាពបរាជ័យ ដោយសារតែគ្មានសេចក្ដីប្រកាសរួមណាមួយ ត្រូវបានធ្វើឡើងរវាងក្រុមការងារជាន់ខ្ពស់គណបក្សប្រជាជនកម្ពុជា និងគណបក្សសង្គ្រោះជាតិនោះឡើយ។ ដូច្នេះវាអាចជាមូលហេតុដ៏សំខាន់ ដែលធ្វើឲ្យប្រធាន​មជ្ឈមណ្ឌល​ពលរដ្ឋ​អភិវឌ្ឍន៍ និងសន្តិភាព លោក យ៉ង់ គឹមអេង  សម្ដែងនូវការខកចិត្ត ថាជាកិច្ចប្រជុំដែលពុំបានផ្តល់ប្រយោជន៍អ្វី ទៅ​ដល់ការ​ព្រមព្រៀងគ្នា នាពេលកន្លងមកពាក់ព័ន្ធនឹងការបោះឆ្នោត ដែលរួមមានការឯកភាព​ពីក្រសួងមហាផ្ទៃដែរ​នោះ។ លោកយល់ថា ជំនួបនេះហាក់បីដូចជា មិនមានភាពជឿនលឿនទៅមុខសោះ សម្រាប់ជាប្រយោជន៍​ប្រជា​ពលររដ្ឋ និងជាតិ។

ជាពិសេសការខកចិត្តដ៏ធំមួយ ដែលមន្ត្រីសង្គមស៊ីវិលចង់សង្កត់ធ្ងន់នោះ គឺគណបក្សប្រជាជនកម្ពុជា បានបដិសេធ​ចំពោះការចូលរួម របស់សង្គមស៊ីវិលក្នុងប្រព័ន្ធបោះឆ្នោតនេះ។ លោក យ៉ង់ គីមអេង បានបញ្ជាក់ថា សង្គមស៊ីវិល​ធ្វើការដោយផ្អែកលើមូលដ្ឋានតឹកតាង និងផ្តល់ជាអនុសាសន៍ទៅលើបញ្ហា ដែលកើតឡើងជាត់ស្តែង។ ក្រុមអង្គការ​សង្គមស៊ីវិលដែលមានជំនាញខាងផ្នែកនេះ គ្រាន់តែចង់បានស្ថាប័នរៀបចំការបោះឆ្នោត និងរដ្ឋាភិបាល​មាន​ភាព​ល្អ​ប្រសើរ និងទទួលបានកិត្តិយសលើឆាកអន្តរជាតិប៉ុណ្ណោះ។

លោក ប៊ិន ឈិន តំណាងគណបក្សប្រជាជនកម្ពុជា នៅក្នុងជំនួបបច្ចេកទេសនៅមន្ទីរព្រឹទ្ធសភាថ្ងៃទី១០ ខែមីនានេះ បានលើកឡើងក្រោយពីបញ្ចប់កិច្ចប្រជុំនេះថា គណបក្សរបស់លោក បានស្នើសុំឲ្យមានអព្យាក្រិតភាព និង​សុច្ចរិទ្ធភាព​របស់អង្គការសង្គមស៊ីវិល ពាក់ព័ន្ធនិងការបោះឆ្នោត។ មន្ត្រីជាន់ខ្ពស់របស់គណបក្សកាន់អំណាចរូបនេះ បានពន្យល់ថា «ក្នុងលក្ខខ័ណ្ឌចាំបាច់ និង​គ្រប់គ្រាន់ (វា)មិនអស់ទេ តែគ្រាន់បើជាងយើងពិនិត្យសើរៗ»។

ការលើកឡើងរបស់មន្ត្រីគណបក្សប្រជាជនកម្ពុជា មិនទទួូលបានការយល់ស្របពីក្រុមការងាររបស់គណបក្ស​សង្គ្រោះជាតិនោះឡើយ។ នៅក្នុងជំនួបដដែល គណបក្សសង្គ្រោះជាតិ ក៏បានលើកសំណើរ សុំឲ្យមាន​ការ​កែ​ទម្រង់​ជាមូលដ្ឋាន ទៅ​លើគណៈកម្មាធិការជាតិរៀបចំការបោះឆ្នោត ដើម្បីឲ្យស្ថាប័ននេះ មានភាពទទួលខុសត្រូវ និង​ប្រកបដោយតម្លាភាពអាចទទួលយកបាន ជៀសវាងបញ្ហាដូចក្នុងពេលកន្លងមក។ ប៉ុន្តែសំណើរនេះ មិនត្រូវបាន ក្រុមការងារ​របស់​គណបក្សប្រជាជនកម្ពុជា ទទួលយកនៅឡើយដូចគ្នា។ ការបដិសេធ និងការមិនទាន់ទទួលយក ដែលជំរុញឲ្យជំនួបលើកទីបីនេះ ជួបនូវ​ភាព​បរាជ័យ។

ជាមួយនឹងការខកចិត្តខាងលើ លោក យ៉ង គឹមអេង បានចាត់ទុកថា កិច្ចប្រជុំនេះ អាចគ្រាន់តែជាការអូសបន្លាយ​ពេលវេលា ហើយជាពិសេសទៅទៀតនោះ គឺគណបក្សទាំងពីរ គ្មានចិត្តចង់ត្រូវគ្នានោះទេ។ លោក បានពន្យល់ថា «កាលមុនក្នុងការកែទម្រង់ហ្នឹង គណបក្សទាំងពីរ ក៏ធ្លាប់ចេញសេចក្តីថ្លែងការណ៍ដូចគ្នាថា ខ្លួនមានការរីករាយ មាន​គំនិត មានផែនការក្នុងការកែទម្រង់ប្រព័ន្ធបោះឆ្នោត។ ហេតុអីពេលនេះ ពាក់ព័ន្ធនឹងកំណែទម្រង់គ.ជ.ប នេះ ជាការ​ជាប់គាំង មិនអាចរកនូចចំណុចរួមមួយ ដើម្បីចេញសេចក្តីថ្លែងការណ៍រួម ដើម្បីឲ្យគេមានការសាទរ​ចំពោះកិច្ចប្រជុំ​លើកនេះ?»

យ៉ាងណាក៏ដោយ ក៏មន្ត្រីមកពីគណបក្សទាំងពីរបានបង្ហញនូវសុទ្ទិដ្ឋិនិយមដូចគ្នាថា បន្ទាប់​ពីទទួលបាន​ការ​ណែនាំ​ពីថ្នាក់ដឹកនាំ របស់គណបក្សទាំងសងខាងរួចរាល់ នៅក្នុងជំនួបលើកទី៤ នាថ្ងៃ​ទី១៧ ខែមីនាខាងមុខ អាច​នឹងមាន​លទ្ធផលជាវិជ្ជមាន​ ហើយការខ្វែងគំនិតគ្នាក្នុងថ្ងៃនេះ អាចនឹងទម្លុះទម្លាយបាននៅពេលនោះ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១០ មីនា ២០១៤