ប្រជាពលរដ្ឋទាំងអស់ ត្រូវ​តែ​មាន​សិទ្ធិ​ស្មើគ្នា​មិន​ថា​ក្នុង​ស្រុក ឬ​ក្រៅ​ស្រុក​ឡើយ ហើយ​សិទ្ធិ​ទាំង​នោះ​ត្រូវ​បាន​គាំពារ​ដោយ​រដ្ឋាភិបាល​កម្ពុជា តាម​ច្បាប់​រដ្ឋធម្មនុញ្ញ។ ដូច​ករណី​មន្ត្រី​ទូត​ដែល​ទៅ​បំរើ​ការ​នៅ​ក្រៅ​ប្រទេស ពលរដ្ឋ​ដែល​ទៅ​រៀន ធ្វើ​កម្ម​សិក្សា ឬ​បំពេញ​បេសកកម្ម​នៅ​បរទេស ក៏​មាន​សិទ្ធិ​ដូច​គ្នា ក្នុង​នាម​មន្រ្តី​បម្រើ​ការងារ​ឬសិស្ស​និស្សិត​នៅ​ក្នុង​ប្រទេស​ដែរ។ នេះ​ជា​ការ​លើក​ឡើង របស់​តំណាង​ក្រុម​ការងារ របស់​គណបក្ស​សង្គ្រោះ​ជាតិ លោក គួយ ប៊ុនរឿន ទាក់​ទង​នឹង​សិទ្ធិ​បោះឆ្នោត របស់​ពលរដ្ឋ​កម្ពុជា​នៅ​ក្រៅ​ប្រទេស។ លោក​និយាយ​ថា រដ្ឋ​ត្រូវ​ធានា​និង​គិតគូរ​ពី​បញ្ហា នៃ​ការ​បោះ​ឆ្នោត​នៅ​ក្រៅ​ប្រទេស​នេះ ក្នុង​នាម​ជា​អ្នក​ធានា​សិទ្ធិ​របស់​ប្រជា​ពលរដ្ឋ ក្នុង​ការ​បោះ​ឆ្នោត។

លោកបានពន្យល់ទៀតថា៖ «យើងកំពុងពិភាក្សាគ្នា ថាតើមានលទ្ធភាពអាចទៅរួចប៉ុណ្ណា។ (…) យើងអាច​បង្កើតការិយាល័យបោះឆ្នោត នៅក្រៅប្រទេសបានឬអត់។ ហើយអ្នកណាជាទទួលខុសត្រូវ អ្នកគ្រប់គ្រង អំពីការចុះបោះឆ្នោតហ្នឹង។ (…) មានបញ្ហាច្រើន ដែលត្រូវគិតទាំងអស់គ្នា។ ប៉ុន្តែបើមិនទាន់​មានលទ្ធភាព​គ្រប់គ្រាន់… យ៉ាងហោចណាស់​ក៏យើងបានគិតពីបងប្អូនប្រជាពលរដ្ឋខ្មែរ ដែលមានសិទ្ធិបោះឆ្នោត​នៅក្រៅ​ប្រទេសដែរ។»

សម្រាប់គណបក្សប្រជាជនកម្ពុជា តាមរយៈលោក ប៊ិន ឈិន ជាតំណាងក្នុងកិច្ចប្រជុំក្រុមបច្ចេកទេសនោះ បានលើកឡើងថា ក្រុមការងាររបស់លោក មិនជំទាស់នឹងការបង្កើតការិយាល័យបោះឆ្នោត សម្រាប់ក្រៅ​ប្រទេសនោះទេ ប៉ុន្តែវាមានភាពលំបាកច្រើនយ៉ាង។ លោកបានពន្យល់ឡើងថា៖ «ការលំបាក ខ្ញុំគិតថា មាន​ការលំបាកក្នុងរឿងអធិបតេយ្យស្រុកគេ។ យើងទៅរញ៉េរញ៉ៃនៅស្រុកគេអត់បានទេ។ ចឹងបានជា​គោលការណ៍​របស់គណបក្សប្រជាជនកម្ពុជា ឲ្យគេមកចុះឈ្មោះទៅ។ ហើយគេមានលទ្ធភាពមកបោះឆ្នោត គឺបោះឆ្នោត​ទៅបានហើយ។»

សូមបញ្ជាក់ថា ក្រុមការងារបច្ចេកទេសនៃគណបក្សទាំងពីរ នារសៀលថ្ងៃទី១៩ ខែធ្នូម្សិលម៉ិញនេះ នៅវិមាន​រដ្ឋសភា បានបន្តពិភាក្សាលើវិសោធនកម្ម សេចក្តីស្នើច្បាប់ ស្តីពី ការបោះឆ្នោតជ្រើសតាំងអ្នកតំណាងរាស្ត្រ។ ហើយក្រុមការងារទាំងពីរ បានត្រឹមតែសម្រេចបញ្ចប់ លើចំណុចស្តីពីការការចុះឈ្មោះអ្នកបោះឆ្នោត ក្នុង​ជំពូក​ទីប្រាំប៉ុណ្ណោះ។ ចំណុចនៅសល់ និងបន្តចួបពិភាក្សាបន្តទៀតថ្ងៃទី២២ ខែធ្នូ សប្តាហ៍ក្រោយ៕

សូមទស្សនាកិច្ចសម្ភាស របស់លោក គួយ ប៊ុនរឿន និងលោក ប៊ិន ឈិន ដូចខាងក្រោម៖