កាលពីចុងខែកុម្ភៈ លោកនាយករដ្ឋមន្រ្តី ហ៊ុន សែន បានសម្រេចប្រកាសដកបម្រាមក្នុងការជួបជុំធ្វើបាតុកម្ម ពោល​គឺអនុញ្ញាត​ឲ្យមានការធ្វើបាតុកម្ម ឬការប្រមូលផ្តុំសម្តែងមតិឡើងវិញ ពីសំណាក់ក្រុមអ្នកតវ៉ា គណបក្សជំទាស់ និង​អង្គការសង្គមស៊ីវិលជាដើម។ តែរហូតមកដល់ពេលនេះ ការធ្វើបាតុកម្ម ឬការប្រមូលផ្តុំរបស់ អង្គការសង្គមស៊ីវិល សហជីព និងសកម្មជនសិទ្ធិមនុស្ស នៅតែទទួលរងការត្បិតត្បៀត និងបំភិតបំភៃនៅឡើយ។

លោក ហ៊ុន សែន (រូបលើកដៃនៅកណ្ដាល) នាយករដ្ឋមន្ត្រីកម្ពុជា។ (រូបថត ហ្វេសប៊ុក)

សិទ្ធិពលរដ្ឋ - នៅព្រឹកថ្ងៃទី០៥ ខែមីនា នេះ យ៉ាងហោចណាស់ ក៏មានស្ត្រីអ្នកបឹងកក់៣នាក់ដែរ ត្រូវបានសន្តិសុខ​សាលារាជធានីភ្នំពេញ ចាប់ខ្លួន ខណៈពួកគាត់ជាង១០នាក់ បានប្រមូលផ្តុំនៅខាងមុខសាលារាជធានីភ្នំពេញ ដើម្បី​ទទូចឲ្យមានការដោះស្រាយវិវាទដីធ្លីរបស់ពួកគាត់ ដែលបានអូសបន្លាយ ជាច្រើនឆ្នាំមកហើយនោះ។ អ្នកស្រី យ៉ោម បុប្ផា ជាតំណាងអ្នកភូមិបឹងកក់ ហើយដែលបានស្ថិតនៅក្នុងហេតុការណ៍ចាប់ខ្លួននោះ បាននិយាយប្រាប់អ្នក​សារព័ត៌មានថា៖ «ការចាប់ខ្លួននេះ គឺជាការគឃ្លើន ទៅនឹងសម្តីរបស់សម្តេចតេជោ ហ៊ុន សែន»។

លោកនាយរដ្ឋមន្រ្តី ហ៊ុន សែន ក្នុងពិធីមួយនៅខេត្តព្រះសីហនុ កាលពីថ្ងៃទី២៥ ខែកុម្ភៈ ទន្ទឹមនឹងលើកទឹកចិត្ត​ឲ្យ​មានបាតុកម្មគាំទ្រ រដ្ឋាភិបាលគណបក្សប្រជាជនកម្ពុជា លោក ហ៊ុន សែន ក៏បានថ្លែងសារនយោបាយ ផ្ដាំផ្ញើទៅ​អាជ្ញាធរគ្រប់លំដាប់ថ្នាក់ ឲ្យជួយសម្របសម្រួល ដល់ការធ្វើបាតុកម្ម និងការប្រមូលផ្តុំសម្តែងមតិឡើងវិញ របស់​គណបក្សជំទាស់ និងមជ្ឈដ្ឋានមួយចំនួនទៀត ផងដែរ។

តែនៅថ្ងៃទី០៤ ខែមីនា សហជីពចំនួន១៨ បានផ្តេជ្ញាថា នឹងដឹកនាំកម្មករធ្វើបាតុកម្មនៅថ្ងៃទី៨ ខែមិនា នៅទីលាន​ប្រជាធិបតេយ្យ តាមការគ្រោងទុក ក្នុងគោលបំណងទាមទារ ឲ្យរដ្ឋាភិបាលដោះលែងអ្នកជាប់ឃុំ២១នាក់ និងដំឡើង​ប្រាក់ឈ្នួលគោល១៦០ដុល្លារក្នុង១ខែ ដល់កម្មករ។ ការប្ដេជ្ញារបស់ក្រុមសហជីព គឺបន្ទាប់ពីសាលារាជធានីភ្នំពេញ បានបដិសេធការស្នើសុំ របស់ពួកគេ ដោយអះអាងថា រង់ចាំការសម្រេចពីក្រសួងមហាផ្ទៃ។

លោក ជា មុន្នី ប្រធានសហជីសេរីកម្មករកម្ពុជា បានសម្តែងការសោកស្តាយចំពោះគោលជំហររបស់សាលា​រាជធានី​ភ្នំពេញ ដែលមិនបានផ្តល់លទ្ធភាពពេញលេញ ដល់ការបញ្ចេញមតិរបស់ប្រជាពលរដ្ឋ។ ប្រធានសហជីសេរីកម្មករ​កម្ពុជា រូបនេះបានបញ្ជាក់ថា៖ «ការលើកឡើងរបស់លោក ហ៊ុន សែន មិនអាចយកជាការបានទេ។ កាលពីលើក​ឡើង​នៅខេត្តព្រះសីហនុ គាត់(ហ៊ុន សែន)ថា ដកបម្រាមបាតុកម្ម។ តែការពិតសាលាក្រុងអត់ដកផង។ អញ្ចឹង​ការ​លើកឡើងរបស់លោក ហ៊ុន សែន យ៉ាប់ស្តាប់ដែរហ្នឹង!»។

ជុំវិញករណីនេះ អនុប្រធានស៊ើបអង្កេតសមាគមន៍ការពារសិទ្ធិមនុស្ស អាដហុក (Adhoc) លោក ចាន់ សុវេត បាន​ពន្យល់ថា កម្ពុជាបច្ចុប្បន្នត្រូវយកច្បាប់មកដោះស្រាយបញ្ហា ហើយមិនត្រូវធ្វើការសម្រេចអ្វីមួយ អាស្រ័យលើអ្នក​នយោបាយ ឬអ្នកកាន់អំណាចណាម្នាក់នោះទេ។ អនុប្រធានស៊ើបអង្កេតបន្តថា យោងច្បាប់ស្តីពីបាតុកម្មបានកំណត់ ថា អ្នកធ្វើមិនបាច់សុំច្បាប់នោះទេ ដោយគ្រាន់តែជូនដំណឹង ទៅសមត្ថកិច្ចពាក់ព័ន្ធគឺគ្រប់គ្រាន់ហើយ។

លោក ចាន់ សុវេត បញ្ជាក់ថា៖ «ប្រទេសកម្ពុជាមិនទាន់មានសិទ្ធិសេរីភាព គ្រប់គ្រាន់នោះទេ។ សេរីភាពមិនត្រូវ​កំណត់​ដោយបុគ្គលនោះទេ គឺត្រូវកំណត់ដោយច្បាប់។ យកច្បាប់ទៅអនុវត្ត។ ឲ្យគេធ្វើសិនទៅ បើគេធ្វើខុស ប្តឹងគេ​ទៅតុលាការទៅ(...)។ ប៉ុន្តែឥឡូវរដ្ឋាភិបាល ដូចជាខ្លាចការប្រមូលផ្តុំរបស់ប្រជាពលរដ្ឋ។»៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៥ មីនា ២០១៤