ព្រះអង្គម្ចាស់ក្សត្រីយ៍ នរោត្តម អរុណរស្មី បានថ្វាយព្រះលិខិតសូមព្រះរាជានុញ្ញាតពីព្រះមហាក្សត្រ ធ្វើទស្សនកិច្ច​រយៈពេល១សប្តាហ៍នៅប្រទេសជប៉ុន ស្របនឹងឱកាសនៃខួបអនុស្សាវរីយ៍ លើកទី៦០ នៃទំនាក់ទំនងការទូតជប៉ុន​កម្ពុជា។

ម្ចាស់ក្សត្រី នរោត្ថម អរុណ រស្មី នៅក្នុងសមាជរបស់គណបក្ស។ MONOROOM.info photo/ O.Vary

កាទូត - កាលពីថ្ងៃទី៣១ ខែមករា ឆ្នាំ២០១៤ម្សិលមិញនេះ ព្រះអង្គម្ចាស់ក្សត្រីយ៍ នរោត្តម អរុណរស្មី បានចេញ​លិខិតស្នើសុំមួយ ទៅកាន់ព្រះមហាក្សត្រនៃប្រទេសកម្ពុជា ដើម្បីយាងទស្សនកិច្ចទៅកាន់ប្រទេសជប៉ុន តាមការ​អញ្ញើញរបស់ក្រសួងការរទេសជប៉ុន ក៏ដូចជាព្រះរាជាណាចក្រជប៉ុន រយៈពេលមួយសប្តាហ៍។

ដំណើរទស្សនកិច្ចនេះនឹងចាប់ផ្តើមចាប់ពីថ្ងៃទី១០ ខែកុម្ភៈ ឆ្នាំ២០១៤ ខាងមុខនេះ តទៅ។ គោលបំណងនៃដំណើរ​ទស្សនកិច្ចនេះដែរ ដើម្បីរិតចំណងមេត្រីភាពប្រពៃណីរវាងព្រះរាជាណាចក្រកម្ពុជា និងព្រះរាជាណាចក្រជប៉ុន ព្រម​ជាឱកាសអបអរសារទេនៃបុណ្យខួបអនុស្សារីយ៍លើកទី៦០ នៃទំនាក់ទំនងការទូតរវាងប្រទេសជប៉ុន និងកម្ពុជា​ផង​ដែរ។

ព្រះលិខិតដដែលនេះបន្តថា ក្នុងឱកាសទស្សនៈកិច្ចនេះ នឹងមានព្រះរាជសវនការ ជាមួយសមាជិកព្រះរាជវង្សនុវង្ស ព្រះរាជាណាចក្រជប៉ុន ជំនួបជាមួយរដ្ឋមន្ត្រីក្រសួងការបរទេស ជំនួបការងារជាមួយមន្ត្រីការបរទេស ទទួល​បន្ទុក​កិច្ចការអាស៊ី និងទស្សនកិច្ចនៅខេត្ត Kyoto ផងដែរ។ យ៉ាងណាក៏ដោយ ក៏ព្រះអង្គម្ចាស់ក្សត្រីយ៍ នរោត្តម អរុណរស្មី បានបញ្ជាក់ថា សេចក្តីអញ្ជើញនេះចំពោះទ្រង់ ធ្វើឡើក្នុងឋានៈទ្រង់ជាព្រះអនុជនៃព្រះករុណាព្រះមហាក្សត្រ នៃ​ព្រះ​រាជាណាចក្រកម្ពុជាតែប៉ុណ្ណោះ ដែលទំនងមិនមានលក្ខណៈផ្លូវការរវាងរដ្ឋាភិបាល និងរដ្ឋាភិបាលនោះឡើយ៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) -ភ្នំពេញ ថ្ងៃទី ៣១ ខែមករា ឆ្នាំ២០១៤