ហ្វេសប៊ុក ហ៊ុន សែន៖ អាណត្តិ​ទី​៥ នាំ​មក​នូវ​ការ​ផ្លាស់​ប្តូរ​ល្អៗ

«អាណត្តិទី៥ នាំមកនូវការផ្លាស់ប្តូរល្អៗសំរាប់ប្រទេសជាតិ» នេះជាឃ្លាមួយដែលដកស្រង់ចេញពីទំព័រ ហ្វេសប៊ុក​មួយ ដែលគេជឿថា ជារបស់នាយករដ្ឋមន្រ្តីកម្ពុជា លោក ហ៊ុន សែន។ ឃ្លាដ៏ខ្លី តែមានន័យវែង ហាក់ចង់បញ្ជាក់​អះអាងប្រាប់​ទៅដល់អ្នក​គាំទ្រទំព័រនេះ ពីអ្វីល្អៗ ដែលនាយករដ្ឋមន្ត្រីចាស់វស្សាជាងគេនៅអាស៊ីរូបនេះ នាំ​មកឲ្យ​សំរាប់សង្គមកម្ពុជាទាំងមូល។
Loading...
  • ដោយ: ប្រាថ្នា
  • កែប្រែចុងក្រោយ: January 27, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

«អាណត្តិទី៥ នាំមកនូវការផ្លាស់ប្តូរល្អៗសំរាប់ប្រទេសជាតិ» នេះជាឃ្លាមួយដែលដកស្រង់ចេញពីទំព័រ ហ្វេសប៊ុក​មួយ ដែលគេជឿថា ជារបស់នាយករដ្ឋមន្រ្តីកម្ពុជា លោក ហ៊ុន សែន។ ឃ្លាដ៏ខ្លី តែមានន័យវែង ហាក់ចង់បញ្ជាក់​អះអាងប្រាប់​ទៅដល់អ្នក​គាំទ្រទំព័រនេះ ពីអ្វីល្អៗ ដែលនាយករដ្ឋមន្ត្រីចាស់វស្សាជាងគេនៅអាស៊ីរូបនេះ នាំ​មកឲ្យ​សំរាប់សង្គមកម្ពុជាទាំងមូល។


លោក ហ៊ុន សែន នាយករដ្ឋមន្រ្តីកម្ពុជា។

សង្គមខ្មែរ - ទំព័រហ្វេសប៊ុកមួយដែលមានឈ្មោះថា Samdech Hun Sen, Cambodian Prime Minister ទំព័រនេះ​ត្រូវបានគេជឿថា ជារបស់នាយករដ្ឋមន្រ្តី ហ៊ុន សែន នោះ បានសរសេរនៅទំព័ររបស់ខ្លួនថា «រួបរួមជាមួយសម្តេច​តេជោ ហ៊ុន សែន ក្នុងការផ្លាស់ ប្តូរសង្គមជាតិអោយបានល្អប្រសើរ» ឃ្លានេះ ទំនងជាម្ចាស់ទំព័រ ចង់អោយប្រជា​ពលរដ្ឋ​​កម្ពុជា​ប្រុសស្រី ត្រូវតែរួបរួមជាមួយលោក ហ៊ុន សែន ឬជាមួយរដ្ឋាភិបាលរបស់លោក បើ​ចង់ឲ្យ​ប្រទេស​ជាតិរីកចំរើន។

ស្របពេលដែលប្រទេសកម្ពុជា កំពុងជួបនូវវិបត្តិសង្គម និងទទួលរងនូវការរិះគន់ និងការថ្កោលទោសពីប្រជាពលរដ្ឋ និងអន្តរជាតិ ចំពោះចំណាត់ការវាយបង្ក្រាបរបស់កងកម្លាំងអាជ្ញាធរ  លើបាតុកម្មអហិង្សារបស់ពលរដ្ឋកន្លងមក ទំព័រហ្វេសប៊ុកដែលមានមនុស្សតាមដានជាង១៧ម៉ឺននាក់មួយនេះ បានរៀបរាប់ថែមទៀតថា «នេះជាពេលវេលា​ដ៏សំខាន់បំផុត សំរាប់មន្រ្តីទាំងអស់ ក្នុងការបំរើប្រជាពលរដ្ឋ អោយអស់ពីកំលាំងកាយចិត្ត។ ទំនុកចិត្ត និងតួនាទី​ដែលរាជរដ្ឋាភិបាលប្រគល់ជូន ត្រូវតែយកមកបំរើប្រជាពលរដ្ឋអោយបានត្រឹមត្រូវ និង ​ត្រូវចេះបរិច្ចាគធនធានជួយ​សហគមន៍ និងសង្គមជាតិរបស់យើង។»

ក្នុងទំព័រដែលនេះបន្តថា «រាជរដ្ឋាភិបាលកំពុងដំណើរការកំណែទម្រង់ ដែលរួមទាំងការគ្រប់គ្រង និងដឹកនាំរបស់​មន្រ្តីក្រោមឱវាទទាំងអស់។ សម្តេចតេជោ មិនកាន់ជើង បុគ្គលអសកម្ម ខិលខូច ដែលធ្វើបាបប្រជាពលរដ្ឋឡើយ។ រាជរដ្ឋាភិបាលអាណត្តិទី ៥ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រ​កម្ពុជា នឹងនាំមកនូវការផ្លាស់ប្តូរល្អៗសំរាប់ប្រទេសជាតិ»។

នៅក្នុងប្រតិកម្មរបស់អ្នកចូលរួមយោបល់ជាច្រើននោះ មានមួយចំនួន សុទ្ធសឹងតែជាអ្នកដែលបានយល់ស្រប ទៅ​នឹងការលើកឡើងខាងលើ។ អ្នកខ្លះថែមទាំងនិយាយដឹងគុណដោយមិនវៀចវេ នូវថ្ងៃ៧មករា ដែលបានផ្ដល់​នូវ​ជីវិត​ថ្មីឲ្យដល់ប្រជាជនកម្ពុជា​នោះ​ថែមទៀត។ ប៉ុន្តែសម្រាប់អ្នកចូលរួមយោបល់ ទៅលើរូបថតនេះ ដែលមិនចូលចិត្ត​ការ​ដឹកនាំរបស់លោក ហ៊ុន សែន បានចូលខ្លួនមកបន្ថែមល្បោយ យ៉ាងព្រោងព្រាត។

ម្ចាស់ទំព័រហ្វេសប៊ុកមួយឈ្មោះថា ព្រះសង្ឃ ឯករាជ្យ បានសរសេរប្រតិកម្មថា «រួបរួមជាមួយសម្តេចតេជោ ហ៊ុន សែន ក្នុងការផ្លាស់ប្តូរសង្គមជាតិអោយបានល្អប្រសើរ រួមមានចូលរួមបង្កើតអំពើពុករលួយ ក្នុងប្រទេសឲ្យកាន់តែ​បានច្រើន និងចូលរួមមិនចេះគោរពសិទ្ឋិមនុស្ស ឲ្យច្រើន ចូលរួមមិនទប់ស្កាត់ការកាប់បំផ្លាញ់ព្រៃឈើខុសច្បាប់ ឲ្យបានច្រើន យកដីធ្លីពីប្រជាពលរដ្ឋឲ្យបានកាន់តែច្រើន ផ្ដាច់ការនិយមឲ្យកាន់តែច្រើន ជំពាក់លុយបរទេសឲ្យកាន់​តែច្រើន ធ្វើបាបរាស្រ្តខ្មែរឲ្យកាន់តែច្រើន។»

ម្ចាស់ទំព័រមួយទៀត ឈ្មោះ Sambath Chhum បានសរសេរថា «បើចេះផ្លាស់ប្តូរ ផ្លាស់យូរហើយ ៣៥ឆ្នាំពូ កុំចង់​មក​បោក»។ កាន់តែឆ្ងាយជាងនេះ ម្ចាស់ទំព័រ Mana JB បានសរសេរឌឺដងដាក់ថា «ខ្ញុំស្រលាញ់សម្តេច និងគោរពនូវ​ឧត្ដមគតិសម្ដេចជានិច្ច បើសិនជាពេលនេះសម្ដេចព្រមចុះចេញ... សម្ដេចអើយចុះចេញទៅ...»។

ការធ្វើបច្ចុប្បន្នភាពនៅលើទំព័រនាយករដ្ឋមន្ត្រី ហ៊ុន សែន នេះ បានកើតឡើងចំពេលដែលបាតុកម្មតវ៉ា ទាមទារ​សិទ្ធិ​សេរីភាព បានផ្ទុះឡើងជាបន្តបន្ទាប់ ទោះជាអជ្ញាធរនៅក្រោមការគ្រប់គ្រងរបស់លោក ហ៊ុន សែន បានព្យាយាម​បង្ក្រាបយ៉ាងរង្គាលនោះក្ដី។ ការផ្ទុះបាតុកម្មជាបន្តបន្ទាប់ រួមនឹងការបង្ក្រាបរបស់កងកម្លាំងទាំងនេះ ជំរុញឲ្យមាន​ប្រតិកម្មមកពីគ្រប់ទិសទី រិះគន់ការដឹកនាំរបស់លោក ហ៊ុន សែន ដោយពួកគេចាត់ទុកថា ភាសា«គតិបណ្ឌិត»​ដែល​សម្គាល់ពីតម្លែនៃការដឹកនាំរបស់លោក ហ៊ុន សែន បានកើតមានឡើងតែ«សម្បកក្រៅ»ប៉ុណ្ណោះ។

ក្រុមអ្នកជំនាញមួយចំនួន ថែមទាំងបានវាយតម្លៃ ពីកង្វះសមត្ថភាពរបស់មេដឹកនាំរូបនេះ ដែលសម្រាប់​រយៈពេល​ជិត៣០ឆ្នាំមកនេះ មិនបានធ្វើឲ្យឃើញអ្វី«ផ្លាស់ប្ដូ» ក្រៅពីការបង្ក្រាប បាញ់បោះ បនបារ និងប្រើប្រាស់ភាសាឯង​អញនោះឡើយ។ ជាពិសេសភស្ដុតាង ដែលមិនពិបាកនឹងស្វែងរកនោះ គឺចាប់តាំងពីបុរសខ្លាំងរូបនេះ ថ្លែងជា​សាធារណៈនៅខេត្តក្រចេះ ទាក់ទងនឹងការបង្ក្រាបការតវ៉ាប្រឆាំងនោះមក ប្រសិទ្ធិភាពនៃការផ្លាស់ប្ដូរនេះពិតជាមាន​កម្រិតខ្ពស់មែន ដោយហេតុក្រុមបាតុករប្រឆាំង មានរបួសនិងចាប់ខ្លួនជាបន្តបន្ទាប់។ តែផ្ទុយទៅវិញ បើរាប់ពីពេល​បានតំណែងជានាយករដ្ឋមន្ត្រីថ្មី រហូតមកដល់ពេលនេះ សម្ដេចអគ្គមហាសេនាបតីតេជោរូបនេះ មិនមានឃើញធ្វើ​អ្វីជាដុំកំភួន ឲ្យមានការផ្លាស់ប្ដូរទាក់ទងនឹងជីវភាប្រជាជន ឬបញ្ហាយុត្តិធម៌នោះឡើយ៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) - ភ្នំពេញ ថ្ងៃទី ២៧ ខែមករា ឆ្នាំ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...