កីឡាករវាយកូនហ្គោល ចំណាត់ថ្នាក់លេខ១ក្នុងពិភពលោក ថៃហ្គើវ៉ូត (Tiger Woods) បានទទួលទឹកប្រាក់ច្រើន​ជាង​១,៣ពាន់លានដុល្លារអាមេរិក ទៅលើចំណូលជាអាជីព ដើម្បីឡើងទៅឈរលេខ១នៅលើតារាងចំណាត់ថ្នាក់ ហ្គោល​ ឌីចេស ៥០ (Golf Digest 50) សម្រាប់ការរកចំណូលបាន៨៣លានដុល្លារ កាលពីឆ្នាំទៅម៉ិញ។ នេះបើយោងតាម​សេចក្ដីរាយការណ៍ របស់គេហទំព័រ bleacherreport.com កាលពីពេលថ្មីៗនេះ។

កីឡាករ ថៃហ្គើវ៉ូត ពូកែខាងវាយកូនហ្គោល ជាប់ចំណាត់ពិភពលោក។ (រូបថត Golfweed.com/ Tracy Wilcox)

កីឡាវាយកូនហ្គោល - ថៃហ្គើវ៉ូត ដែលជាម្ចាស់ជើងឯកពានរង្វាន់ធំៗ១៤សម័យកាល បានឡើងឈរលេខ១ជា​លើក​ទី១១ក្នុងប្រវត្តិសាស្ត្ររយៈពេល១១ឆ្នាំ របស់ទស្សនាវដ្តី ហ្គោល ឌីចេស (Golf Digest) ជាមួយនឹងទឹកប្រាក់​ចំណូល​កាលពីឆ្នាំមុន ចំនួន​៨៣.០៩១.៥០៨ដុល្លារអាមេរិក ក្នុងនោះរាប់បញ្ចូលទាំងទឹកប្រាក់៧១លានដុល្លារ ដែលបានមក​ពីចំណូលក្រៅ​ពីការ​ប្រកួត និងច្រើនជាង១២លានដុល្លារអាមេរិកសម្រាប់រង្វាន់ជាទឹកប្រាក់។

ទស្សនាវដ្តីនេះ បញ្ជាក់ឲ្យដឹងទៀតថា ការឈ្នះរង្វាន់របស់ វ៉ូត ក្នុងទឹកប្រាក់ច្រើនជាង១៥៥លានដុល្លារ មានកម្រិត​តិចជាង១២ភាគរយបើប្រៀបធៀបទៅនឹងចំណូលអាជីពរបស់គេ ខណៈដែលប្រាក់ចំណូលចំនួន​១,១៦ពាន់​លាន​ដុល្លារ បានមកពីការចុះកិច្ចសន្យាផ្សាយពាណិជ្ជកម្មផ្សេងៗបើគិតចាប់ តាំងពីការបង្ហាញខ្លួនក្នុង​ការប្រកួត​អាជីព​ជាលើកទី១កាលពីឆ្នាំ ១៩៩៦។ ហើយនេះជាតួលេខមួយដែលបន្តកើនឡើង បើទោះបីក្រោយពីមានរឿង​អាស្រូវ​ផ្លូវភេទ និងការខូចចិត្តពីការលែងលះគ្នាក៏ដោយ។

កិច្ចព្រមព្រៀងផ្សាយពាណិជ្ជកម្មជាមួយនឹងក្រុមហ៊ុន Electronic Arts ទាក់ទងនឹងវីដេអូប្រកួតកីឡាវាយកូនគោល បានបញ្ចប់នៅក្នុងឆ្នាំ២០១៣ ហើយស្របពេលរូបគេមិនបានឈានដល់កិច្ចព្រមព្រៀងផ្សេងៗដែលនឹង ផ្តល់ចំណូល​ចំនួន១០០លានដុល្លារអាមេរិកក្នុងរយៈពេល១ឆ្នាំ កីឡាកររូបនេះបានវាយបកវិញ ក្នុងឆ្នាំ២០១១ជាមួយនឹង ចំណូល​៦២លាន ដុល្លារក្នុងរយៈពេលមួយឆ្នាំ សម្រាប់ការចុះកិច្ចសន្យាផ្សាយពាណិជ្ជកម្មផ្សេងៗ។

អ្នក ដែលឈរលេខ២នៅលើបញ្ជីអ្នករកចំណូលខ្ពស់ជាងគេក្នុងឆ្នាំ២០១៣ របស់ទស្សនាវដ្តី ហ្គោល ឌីចេស បាន​ធ្លាក់ទៅលើកីឡាករ ភិល ម៉ិកគិលស៊ុន (Phil Mickelson) ជាមួយនឹងការរកចំណូលបាន ៥២.០០៩.១៥៦​ដុល្លារ​អាមេរិក ខណៈទឹកប្រាក់ប្រមាណជា៤៥លានដុល្លារ គឺបានមកពីការផ្សាយពាណិជ្ជកម្ម និងចំណូលមិនមែនជា​ប្រាក់​រង្វាន់។ កីឡាករវាយកូនហ្គោលរបស់អាមេរិករូបនេះ បានឈ្នះពានរង្វាន់ ប្រ៊ីធីស អូផេន (British Open) កាលពី​ឆ្នាំ​មុន និងសង្ឃឹមថា នឹងបំពេញអាជីពក្នុងកម្មវិធី ហ្គ្រេន ស្លេម (Grand Slam) តាមរយៈការឈ្នះពានរង្វាន់ យូអេស អូផេន (US Open) នៅឆ្នាំនេះ។

លោក អាណូលដ៍ ភែលមើរ (Arnold Palmer) វ័យ៨៤ អតីតកីឡាករវាយកូនគោលម្នាក់ បានស្ថិតក្នុងចំណាត់​ថ្នាក់​លេខ៣ ជាមួយនឹងការរកបានចំណូល៤០លានដុល្លារអាមេរិក ដោយចំណូលភាគច្រើនបានមកពីកិច្ចព្រមព្រៀង​លើសិទ្ធិផ្សាយតាមទូរទស្សន៍។ លោក ជែក និកក្លាស (Jack Nicklaus) ដែលនឹងឈានចូលវ័យ៧៤ឆ្នាំ នៅថ្ងៃទី២១ ខែមករា នោះ បានឈរក្នុងចំណាត់ថ្នាក់លេខ៤ជាមួយការរកចំណូលក្នុងឆ្នាំ ២០១៣ ចំនួន២៦លានដុល្លារ។
ម្ចាស់ជើងឯកពានរង្វាន់សំខាន់១៨ សម័យកាលរូបនេះ នឹងចូលរួមជាមួយនឹងលោក ភែលមើរ និង ហ្គារី ភ្លេយើរ (Gary Player) ក្នុងនាមជាភ្ញៀវកិត្តិយសដើម្បីអបអរការចាប់ផ្តើមការប្រកួត Masters ក្នុងឆ្នាំនីមួយៗ។

កីឡាករវាយកូនគោលរបស់ស៊ុយអែត ហ៊េនរិក ស្តេនស៊ុន (Henrik Stenson) ដែលបានឈ្នះ​ពានរង្វាន់ក្នុង​កម្មវិធី​ប្រកួត US PGA Tour និងព្រឹត្តិការណ៍ Race to Dubai របស់ក្របខ័ណ្ឌ European Tour នោះ បានឈរក្នុងចំណាត់​ថ្នាក់លេខ៥ជាមួយនឹងប្រាក់ចំណូលចំនួន ២១.៤៤៤.៦៧០ដុល្លារ ខណៈទឹកប្រាក់ប្រមាណជា២,៨៥លានដុល្លារ បានមកពីប្រាក់រង្វាន់របស់គេ៕

--------------------------------------
ដោយ​ វ៉ន ដារ៉ា (ទំនាក់ទំនង៖ [email protected]) - ភ្នំពេញ ថ្ងៃទី១២ខែមករា ឆ្នាំ២០១៤