«ខ្ញុំមានការសោកស្តាយ ការឈឺចាប់ និងការអន់ចិត្តចំពោះទង្វើរបស់រាជរដ្ឋាភិបាល ដែលបានធ្វើដូចនេះ។ (...) ការ​ចាប់ខ្លួននេះមិនមានភស្តុតាងច្បាស់លាស់ទេ ចាប់បំពាន ដោយបំភិតបំភ័យ។ ខ្ញុំមានការរន្ធត់រកអ្វីប្រៀបមិនបានទេ ព្រោះកូនខ្ញុំតាំងពីតូចក្រូចឆ្មាមក មិនដែលបានធ្វើអ្វីខុសសោះ គាត់ជាមនុស្សល្អ ចេះជួយឪពុកម្តាយ និងបងប្អូន។» នេះជាការបង្ហាញនូវការខកចិត្តចំពោះរដ្ឋាភិបាល ដោយលោក ស៊ាង សារឿន អាយុ៥៧ឆ្នាំ និងអ្នកស្រី តូច សាន ត្រូវ​ជាឪពុកម្តាយរបស់លោក ថេង សារឿន មន្ត្រីសហជីពមួយរូបដែលត្រូវបានចាប់ឃុំខ្លួន កាលពីថ្ងៃទី០២ ខែមករាកន្លង​មកនេះ។

អ្នកស្រី តូច សាន ជាម្ដាយរបស់លោក ថេង សារឿន កំពុងត្រូវបានឃុំខ្លួននៅពន្ធនាគារព្រៃថ្លុក ខេត្តកំពង់ចាម។ (រូបថត MONOROOM.info/ O.Vary)

អាជ្ញាធរនិងអំណាច - ទាំងឪពុក ទាំងម្តាយរបស់លោក ថេង សារឿន បានបង្ហាញសភាពខ្លោចចិត្តរបស់ពួកគាត់ នូវ​ទង្វើរបស់កងកម្លាំងសម្រាប់ការពារជាតិ ដែលដឹកនាំដោយរដ្ឋាភិបាលលោក ហ៊ុន សែន បែរជាយកកម្លាំងទាំងនេះ​មកធ្វើការសំឡុត គម្រាម កំហែង បំភិតបំភ័យ និងវាយដំ ទាត់ធាក់មកលើប្រជាពលរដ្ឋស្លូតត្រង់ខ្លួនឯង​ ដូចសត្វធាតុ​យ៉ាង​នេះ។

ក្នុងអាយុ៥៨ ឆ្នាំ អ្នកស្រី តូច សាន បានចាត់ទុកថា ទង្វើបែបនេះជាអំពើព្រៃផ្សៃ ហូសពីច្បាប់រដ្ឋធម្មនុញ្ញ លើស​សម័យប៉ុលពតទៅទៀត ដោយបានពន្យល់យ៉ាងដូចនេះថា «ព្រោះសម័យប៉ុលពតបានសួរនាំខ្លះ តែនេះបានវាយ​យកៗតែម្តង»។ ទោះជាយ៉ាងនេះក្តី អ្នកស្រីក៏បានអំពាវនាវ សូមឲ្យរដ្ឋាភិបាលធ្វើការដោះលែងកូន និងអ្នកដទៃ​ទៀត​ដែលគ្មានកំហុសជាបន្ទាន់។

ម៉ម សូណង់ដូ ជាគំរូ...

អ្នកស្រី តូច សាទ មកពីភូមិឈូកសរ ឃុំឈើទាល ស្រុកស្វាយជ្រុំ ខេត្តស្វាយរៀង ដែលត្រូវជាម្តាយ លោក ថេង សាវឿន បានលើកឡើងថា គាត់មិននឹកស្មានថាកូនរបស់គាត់ត្រូវបានគេវាយដំពេញទាំងខ្លួនសោះ ពិសេសត្រង់​ក្បាលដែលត្រូវបានដេរចំនួនប្រាំពីរថ្នេរ។ អ្នកស្រីបានបញ្ជាក់ថា ពេលទៅដល់ពន្ធនាគារត្រពាងថ្លុង ខេត្តកំពុងចាម ជាមួយនឹងក្រុមអង្គការសិទ្ទិមនុស្សដំបូង បានជួប និងឃើញពីសភាពរាងកាយកូន ជាមួយនឹងទឹកភ្នែក​រលីងរលោង​អ្នកស្រី បានតាំងចិត្តនិយាយទៅកាន់កូនយ៉ាងនេះថា «កូនកុំបាក់ទឹកចិត្ត អ្វីដែលកូនបានធ្វើមិនខុស​ច្បាប់​រដ្ឋធម្មនុញ្ញ​ទេ កូនត្រូវតាំងស្មារតីឡើង។ (...) កូនត្រូវក្លាហានឡើង កូនជាលោកតាម៉ម សូណង់ដូទីពីរ លោកបានជួបសភាព​នេះ​បីដងហើយ កូនទើបតែទីមួយ កូនត្រូវក្លាហានឡើង។»

ជាកូនទីពីរ ដែលបានបែកគ្នាជាមួយប្រពន្ធជាងពីឆ្នាំទៅហើយនោះ អ្នកស្រីជាម្តាយបានបន្តរថា ក្នុងស្ថានភាព​បច្ចុប្បន្ននេះកូនអ្នកស្រី មានសភាពជម្ងឺកាន់តែធ្ងន់ធ្ងរ ដោយមានសភាពស្លេកស្លាំង និងរឹងបំពង់ករ។ អ្នកស្រី​បានបន្ត​ថា ឥឡូវនេះមានមេធាវីចំនួនប្រាំពីររូបសម្រាប់ការពារ ដែលជាជំនួយរបស់អង្គការសិទ្ធិមនុស្សប្រចាំនៅកម្ពុជា។

ជាមួយគ្នានេះ លោក ស៊ាន សារឿន ដែលត្រូវជាឪពុកនោះក៏បានបង្ហាញនូវការហួសចិត្ត និងភាព​សោកស្តាយយ៉ាង​ខ្លាំង​ចំពោះទង្វើ របស់កងកម្លាំងជាតិ របស់រាជរដ្ឋាភិបាលមកលើប្រជាពលរដ្ឋខ្មែរស្លូត្រង់។ លោកបានបញ្ជាក់​យ៉ាង​ដូច្នេះ «មានការសោកស្តាយយ៉ាងខ្លាំងជាទីបំផុត។ (...) មិនថាកូនខ្ញុំទេ បងប្អូនប្រជាពលរដ្ឋទាំងអស់ មានការ​សោក​ស្តាយចំពោះរាចរដ្ឋាភិបាលសព្វថ្ងៃ គ្មានឃើញនូវយុត្តិធម៌ និងដោះស្រាយបញ្ហាសម្រាប់ប្រជាពលរដ្ឋទេ។»

ដោយភាពគ្មានជំនឿចិត្តលើតុលាការ និងរដ្ឋាភិបាលតទៅទៀតនោះ លោក ស៊ាន សារឿន បានស្នើសុំ​ដល់អង្គការ​ក្រៅរដ្ឋាភិបាល និងអង្គការអន្តរជាតិ ជួយចាត់វិធានការ និងឃ្លាំមើល និងជម្រុញផ្តល់នូវយុត្តិធម៌ ជាមួយនឹងការ​ការដោះលែងអ្នកទាំងអស់នោះជាបន្ទាន់។ ជាមួយនឹងការដោះលែងនោះដែរ លោកស្នើរឲ្យ​រដ្ឋាភិបាលគួរយក​ចិត្ត​ទុកដាក់ ទៅលើអ្នកដែលបានប្រព្រឹត្តល្មើសច្បាប់ពិតប្រាកដ ដូចជាជនដៃដល់ អ្នកដែលប្រើអំពើហិង្សា ពិសេស​អ្នក​ដែលបានបាញ់សម្លាប់មនុស្ស ដោយចេតនាជាដើម មកផ្តន្ទាទោសតាមផ្លូវច្បាប់។

ទស្សនាវដ្ដីមនោរម្យព័ងអាំងហ្វូ មិនអាចសុំចម្លើយបំភ្លឺពីមន្ត្រីតំណាងរដ្ឋាភិបាលណាម្នាក់ បាននៅឡើយ នៅព្រឹកថ្ងៃ​សៅរ៍ទី១១ ខែមករានេះ។ តែលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី ធ្លាប់បានថ្លែងប្រាប់ទស្សនាវដ្ដី​តាម​ទូរស័ព្ទ កាលពីថ្ងៃទី០៩ ខែមករាថា សកម្មភាពបង្ក្រាបរបស់កងកម្លាំង ដែលមានកន្លងមក បានធ្វើឡើងដោយស្រប​តាមច្បាប់ ដើម្បីឲ្យសណ្តាប់ធ្នាប់​សាធារណៈ វិលមកសភាពដូចដើមវិញ​តែប៉ុណ្ណោះ។

ជាមួយនឹងភាពតានតឹងផ្នែកនយោបាយនៅកម្ពុជា ភាពលំបាកវេទនារបស់ប្រជាពលរដ្ឋក្នុងពេលកន្លងមក ភាព​ស្រេកឃ្លានចង់បានការរស់នៅសមរម្យក្នុងសង្គម របស់ប្រជាពលរដ្ឋ បានបង្ខំចិត្ត​ពួកគាត់ទាមទារ​នូវការប្រើប្រាស់​សិទ្ធិក្នុងនាមជាពលរដ្ឋម្នាក់ បានចូលរួមជាមួយនឹងបាតុកម្មនានា ក្នុងបំណងតែមួយគត់ គឺ ការរស់នៅក្នុង​សេចក្តី​ថ្លៃថ្នូរ និងការគោរព។ ផ្ទុយទៅវិញ រដ្ឋាភិបាលមិនត្រឹមតែមិនបានដោះស្រាយ និងស្វែងរកដំណោះស្រាយណា​មួយ​សមរម្យដើម្បីបញ្ជាសនូវហិង្សាឡើយ បែរជាប្រើប្រាស់នូវកម្លាំងរបស់ជាតិ ជាមួយនិងកម្លាំងសន្តិសុខ មកវាយបំបែក ជំនួសការចចារ និងការដោះស្រាយ ដែលជាវិធីសាស្រ្តមួយវិលទៅរកការគ្រប់គ្រងអំណាចតាមបែបបុគ្គល មិនមែន​តាមច្បាប់ គោលការណ៍នៃលិទ្ធិប្រជាធិបតេយ្យឡើយ។ នេះជាករលើកឡើងរបស់លោក ចាន់ សុវ៉េត មន្ត្រី​ការពារ​សិទ្ធិមនុស្សនៃសមាគមអាដហុក កាលពីព្រឹកថ្ងៃទី៩ ខែមករាកន្លងមក នៅជិតក្បាលនាគ សួនច្បារផ្សារ​ចាស់។

មន្ត្រីសិទ្ធិមនុស្សដដែល បាននិយាយឲ្យដឹងទៀតថា «ក្នុងដំណាក់កាលនេះ គួតែធ្វើការដោះស្រាយដោយសន្តិវិធី។ (...) ប្រសើរជាងការប្រើកម្លាំងជ្រុលហួសប្រមាណបែបនេះ។ (...) អ្នកដែលបង្ហាញនូវគោលជំហរផ្ទុយ​ មិនអាច​​កំណត់​បានថាជាអ្នកប្រឆាំងទេ ហើយអ្នកកាន់ជំហរផ្ទុយមិនមែនជាមនុស្សឥតប្រយោជន៍ក្នុងសង្កមដែរ ត្រូវ​អនុញ្ញាតិ​ឲ្យ​​ពួក​គាត់មានសិទ្ធិសេរីភាពគ្រប់គ្រាន់ ដើម្បីចូលរួមចំណែកក្នុងសង្គមប្រជាធិបតេយ្យ និង​ការ​គោរព​សិទ្ធិ​មនុស្ស។»

សូមរម្លឹកថាលោក ថេង សាវឿន ត្រូវបានចាប់ខ្លួនកាលពីថ្ងៃទី២ ខែមករា ឆ្នាំ២០១៤ នៅពេលមានការប៉ះទង្គិចគ្នា ជាមួយទាហានឆ័ត្រយោង៩១១ ជាមួយក្រុមកម្មករធ្វើបាតុកម្មអហិង្សានៅមុខរោងចក្រ យ៉ាក ជីន។ លោក ថេង សាវឿន ត្រូវបានបញ្ជូនខ្លួនមកកាន់សាលាដំបូងរាជធានីភ្នំពេញកាលពីថ្ងៃទី៣ ខែមករា សម្រេចចោទពីបទ​តាម​មាត្រា ២១៨ (ហិង្សាដោយចេតនាដោយមានស្ថានទង្ងន់ទោស) និងតាមមាត្រា៤១៤ (ការបំផ្លាញទ្រព្យសម្បត្តិ​ដោយចេតនា ដោយមានស្ថានទង្ងន់ទោស) នៃក្រមព្រហ្មទណ្ឌ។ ហើយបានបញ្ជូនខ្លួនទៅឃុំនៅគុកត្រពាំងថ្លុង ក្នុងខេត្តកំពង់ចាម ជិតព្រំដែនវៀតណាម៕

សូមទស្សនាវីដេអូ នៃកិច្ចសម្ភាសនោះទាំងស្រុងដូចតទៅ៖

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១១ ខែមករា ឆ្នាំ២០១៣