សកម្មជនដីធ្លីបឹងកក់ទាំង៥នាក់ រួមមាន អ្នកស្រី ទេព វន្នី អ្នកស្រី យ៉ោម បុប្ផា អ្នកស្រី បូ ឆវី អ្នកស្រី ផាន់ ឈុនរ៉េត និងអ្នកស្រី សុង ស្រីលាភ ត្រូវបានកងសន្តិសុខសណ្ដាប់ធ្នាប់រាជធានីភ្នំពេញ និងក្រុមពាក់សំលៀកបំពាក់ធម្មតា​ច្រើនសិបនាក់ ចាប់ដាក់លើរថយន្ដនាំចេញទៅដោយបង្ខំ ខណៈពួកគាត់កំពុងធ្វើដំណើរ តម្រង់ទៅស្ថានទូតបារាំង មកដល់​មុខ​មន្ទីរវះកាត់បេះដួង (ក្បែរមន្ទីរពេទ្យកាល់ម៉ែត)។ នេះបើតាមសម្តីអ្នកស្រី គង់ ចាន់ថា សកម្មជនតវ៉ាសិទ្ធិ​លំនៅ​ដ្ឋាន​នៅបឹងកក់មួយរូបទៀត ដែលមានសំណាងបានរួចខ្លួនពីការចាប់ខ្លួននេះ ហើយបានថ្លែងប្រាប់​ទស្សនាវដ្ដី​មនោរម្យព័ងអាំងហ្វូ នៅក្រោយហេតុការណ៍នោះភ្លាម។

អ្នកស្រី គង់ ចាន់ថា សកម្មជនតវ៉ាសិទ្ធិ​លំនៅ​ដ្ឋាននៅភូមិបឹងកក់ នៅព្រឹកថ្ងៃទី០៦ ខែមករា ឆ្នាំ២០១៤។ (រូបថត MONOROOM.info/ O.Vary)

សណ្ដាប់ធ្នាប់ - អ្នកស្រី គង់ ចាន់ថា ដែលបានរួចខ្លួនពីការចាប់បញ្ចូលរថយន្ដនេះ បានប្រាប់ពីមូលហេតុនៃ​ការ​រួច​ខ្លួនរបស់អ្នកស្រី​ថា ​ដោយ​សារអ្នកស្រីមិនបានស្ថិតនៅក្នុងចំណោមគ្នាអ្នកស្រី នៅក្នុងអំឡុងពេលចាប់ខ្លួននេះឡើយ ព្រោះអ្នកស្រី​បានកំពុងតែនិយាយ ទូរស័ព្ទជាមួយអ្នកសារពត៌មានផ្សេង ទាក់ទងនឹងការទាមទារតវ៉ាមួយ ដែលនឹង​ត្រៀម​ធ្វើនៅ​ព្រឹកថ្ងៃទី០៦ ខែមករានេះ របស់ប្រជាសហគមន៍អ្នកភូមិបឹងកក់ នៅមុខស្ថានទូតបារាំង​ប្រចាំកម្ពុជា ក្នុង​រាជធានី​ភ្នំពេញ។

អ្នកស្រីបានថ្លែងរៀបរាប់ថា នៅវេលា​ម៉ោងប្រមាណជា៧កន្លះព្រឹក ក្រុមរបស់អ្នកស្រីបានដើរមកដល់ចំណុច​ មុខ​មន្ទីរវះកាត់បេះដូង ជិតកាច់ជ្រុងផ្លូវកែងនៃស្ថានទូតបារាំង ស្រាប់តែមានមនុស្សមួយក្រុមជិះរថយន្ដទ្រុង​ធុនធំ​ចំនួន​ពីរគ្រឿង និងរថយន្ដទេសចរណ៍មួយគ្រឿងមកឈប់នៅក្បែរនោះ ហើយបានចុះព័ទ្ធចាប់ក្រុមគ្នីគ្នារបស់អ្នកស្រី ចំនួនប្រាំនាក់ ដាក់បញ្ចូលទៅក្នុងរថយន្ដទេសចរណ៍ ដឹកនាំចេញទៅបាត់ ដោយមិនមានសាកសួរអ្វីទាំងអស់។

អ្នកស្រី ចាន់ថា បានបង្ហាញពីភិនភាគនៃក្រុមមនុស្សទាំងនោះ ថាមានមាឌធំៗ ស្លៀកពាក់ស៊ីវិលមួយចំនួន និងមាន​ស្លៀក​ឯកសណ្ឋានសន្តិសុខសណ្ដាប់ធ្នាប់ ពាក់មួកសុវត្ថិភាពជិតក្បាល។ អ្នកស្រីនិយាយថា មើលមិនស្គាល់ក្រុម​នេះមកពីណា និងជានរណាឡើយ ហើយក្រុមជនទាំងនេះបាននាំខ្លួនស្ត្រីទាំងប្រាំនាក់ចេញទៅ ដោយមិនមាន​បង្ហាញ​«ដីកាចាប់ខ្លួន»អ្វីទាំងអស់។

តែសម្រាប់ លោក ណៃ វ៉ង់ដា អនុប្រធានផ្នែកសិទ្ធិមនុស្សរបស់អង្គការ អាដហុក វិញ បានថ្លែងប្រាប់ទស្សនាវដ្ដី​ថា សកម្មភាពនៃការតវ៉ា​ដោយ​សន្តិវិធី មិនសមណា នឹងត្រូវរដ្ឋាភិបាលចាប់ខ្លួនបែបនេះឡើយ ព្រោះវាខុសនឹងគោល​ការណ៏​នៃសិទ្ធិ​បញ្ចេញមតិ។ យ៉ាងណាម៉ិញ ខាងលោក ក៏កំពុងតែតាមដានមើលថា តើពេលនេះស្ថានភាពរបស់​សកម្មជន​តវ៉ាសិទ្ធិលំនៅដ្ឋានទាំងនោះ ស្ថិតនៅទីណាឲ្យពិតប្រាកដ បើទោះជាលោកទើបនឹងបានទទួលដំណឹងថា សកម្មជន​ទាំងប្រាំនាក់នោះ ប្រហែល​ជាត្រូវបានបញ្ចូន ទៅកាន់ស្នងការរាជធានីភ្នំពេញក្តី។

ចំពោះហេតុការណ៏នៃការចាប់ខ្លួននេះ ទស្សនាវដ្តីមនោរម្យព័ងអាំងហ្វូ មិនអាចទាន់ទាក់ទងបានភ្លាមៗ នូវមន្ត្រីអ្នក​ទទួលខុសត្រូវរបស់អាជ្ញាធរណាម្នាក់ ដើម្បីសុំការលំអិតនៃហេតុការណ៍នេះបានឡើយ។ ប៉ុន្តែសម្រាប់បទបញ្ជាថ្មី ដែលបានផ្សាយឲ្យដឹងកាលពីពេលថ្មីៗនេះ អាជ្ញាធរកម្ពុជាដែលគ្រប់គ្រងដោយរដ្ឋាភិបាលលោក ហ៊ុន សែន បាន​ធ្វើការហាមប្រាមរាល់​ការជួបជុំណាក៏ដោយ ដែលមានចំនួនលើសពី១០នាក់ ដោយលើកយកពីមូលហេតុ​សណ្ដាប់​ធ្នាប់សាធារណៈមកអះអាង បន្ទាប់ពីមានព្រឹត្តិការណ៍ផ្ទុះអំពើហិង្សា នៅតាមបណ្ដោយផ្លូវវេងស្រង នៅថ្ងៃទី០៣ និង​ការរើរុះបណ្ដេញ​បាតុកម្មរបស់គណបក្សសង្គ្រោះជាតិ ចេញពីទីលានប្រជាធិបតេយ្យ កាលពីថ្ងៃទី០៤ ខែមករា​នោះ​មក​។

ដោយឡែក អ្នកស្រី គង់ ចាន់ថា ដែលនៅរួចខ្លួនពីការឡោមព័ទ្ធចាប់ខ្លួននេះ បានថ្លែងអំពានាវតាមរយៈក្រុមអ្នក​សារព័ត៌មាន ​ដល់ស្ថានទូតបរទេសប្រចាំនៅកម្ពុជាទាំងអស់ មេត្តាជួយអន្តរគមន៏ទៅរដ្ឋាភិបាល ឲ្យមាន​ការ​គោរព​ច្បាប់ និង​សិទ្ធិប្រជាពលរដ្ឋកុំឲ្យមានការរំលោភបំពានបែបនេះ និងសូមរកយុត្តិធម៌ដល់ស្រ្តីទាំងប្រាំនាក់ ដែលត្រូវ​បានចាប់ខ្លួន​ទៅបាត់ស្រមោលនេះផង។

សូមបញ្ជាក់ថា នៅព្រឹកថ្ងៃទី០៦ ខែមករានេះ ក្រុមសកម្មជនតវ៉ាសិទ្ធិដីធ្លី មកពីតំបន់បឹងកក់ មានគោលបំណង​ចង់​ដាក់ញាតិ ទៅកាន់ស្ថានទូតបារាំង ដើម្បីស្នើ​សុំឲ្យ​ស្ថានទូតមួយនេះ ជួយធ្វើអន្តរាគមន៏លើករណីចាប់ខ្លួន លោក វ៉ង ពៅ និង ជនផ្សេងៗទៀតចំនួនដប់នាក់ ព្រម​ទាំងរកយុត្តិធម៌ឲ្យជនរងគ្រោះ ​ដែលបានស្លាប់ដោយសារការទាមទារ​ឲ្យមានការតម្លើងប្រាក់ខែ នៅក្នុងព្រឹត្តិការណ៍ប្រឈមមុខដោយហិង្សាកន្លងមក៕

----------------------------------------------
ដោយ៖ ក. សេងហុង ថ្ងៃ០៦ ខែមករា ឆ្នាំ ២០១៤
រាយការណ៏ដោយ៖ លោក អ៊ុម វ៉ារី
រក្សាសិទ្ឋដោយ៖ ទស្សនាវដ្តីមនោរម្យព័រអាំងហ្វូ