សម្រាប់បណ្ដាជនសមញ្ញ ឬគ្រហស្ថ បានប្រើពាក្យថា «ហ៊ុន សែន អើយ ចុះចេញទៅ» ឬ«ហ៊ុន សែន ចុះចេញ» នៅ​ក្នុងការតវ៉ារបស់ពួកគេ ក្នុងរយៈពេលចុងក្រោយនេះ។ តែពាក្យថ្មីមួយទៀត ដែលទើបនឹងបង្កើតដោយ ព្រះសង្ឃ​ដែលបានរួមតវ៉ា ក្នុងគោលបំណង អោយលោក ហ៊ុន សែនចុះចេញពីតំណែងដែរនោះ គឺ «សុំបិណ្ឌបាតញោម ហ៊ុន សែន អើយ ចុះចេញទៅ»។

ព្រះសង្ឃលើកយកពាក្យនេះមកកាន់ ដើម្បីបង្ហាញពីការតវ៉ារបស់ព្រះអង្គប្រឆាំងលោក ហ៊ុន សែន។ (រូបថត MONOROOM.info/ O.Vary)

បាតុកម្ម - «បើរាស្រ្ត និងព្រះសង្ឃមិនពេញចិត្តនឹងការដឹកនាំរបស់គាត់ហើយ តើគាត់នៅធ្វើអីទៀត បើគាត់គ្មាន​តម្លៃ​អីសំរាប់រាស្រ្តផង?» នេះជាសង្ឃីការរបស់ព្រះតេជគុណ ឃឹម សំអឿន ដែលគាត់បានចូលរួមតវ៉ា ក្នងគោលបំណង​អោយ ហ៊ុន សែន ចុះចេញពីតំណែង។

រយះពេលចុងក្រោយនេះ ចាប់តាំងពីការបោះឆ្នោតនិតិកាលទីប្រាំ ការបាតុកម្មកើតមានជាច្រើនលើក។ វត្តមាន​របស់​ព្រះសង្ឃត្រូវបានគេរិះគន់ថា ព្រះសង្ឃជាអ្នកប្រកាន់ធម៌ខន្តី មិនគួរចូលរួមក្នុងបាតុកម្ម ដែលនាំអោយ​ខុសធម៌​វិន័យ​ជាព្រះសង្ឃខ្មែរ។ តែដោយកំហឹងឈឺចាប់របស់ប្រជាជនខ្មែរ ទើបធ្វើអោយព្រះសង្ឃមួយចំនួន បានចូលរួមធ្វើ​បាតុកម្ម​ទាមទារដើម្បីរកយុត្តិធម៌ ដូចសង្ឃដីការរបស់ព្រះតេជគុណឃឹម សំអឿន យ៉ាងដូច្នេះថា «អាត្មាមក​ចូលរួម​បាតុកម្មនេះ ក្នុងបំណងជួយរាស្រ្តរបស់បស់អាត្មា បើរាស្រ្តមានទុក្ខ អាត្មាក៏មានទុក្ខដែរ»។

ជាព្រះសង្ឃមួយអង្គ ក្នុងចំណោមព្រះសង្ឃផ្សេងទៀត ដែលបាននិមន្តមកពីវត្តភ្នំ ស្រួចខេត្តបាត់ដំបង និងមាន​កំហឹងឈឺចាប់​នឹងការកាន់អំណាចជាង ៣០ឆ្នាំរបស់ លោក ហ៊ុន សែននោះ ព្រះតេយជគុណឃឹម សំអឿន បាន​ចូលរួមធ្វើបាតុកម្មតវ៉ាទាមទារ ជាមួយអ្នកភូមបឹងកក់ ក៏ដូចជាគណបក្សសង្រ្គោះជាតិ ក្នុងការរក​ដំណោះស្រាយ​ជូនអ្នកភូមិបឹងកក់ និង សូមអោយ ហ៊ុន សែន លាលែងចេញពីតណែង។ ព្រះអង្គនៅតែប្រកាន់ជំហថា «នឹងធ្វើ​បាតុកម្មជារៀងរាល់ថ្ងៃ បើ ហ៊ុន សែន មិនចុះ គឺអាត្មាមិនឈប់»។

ក្នុងពេលធ្វើបាតុកម្មបិទផ្លូវ ជាមួយអ្នកភូមិបឹងកក់ កាលពីថ្ងៃទី២៣ ខែធ្នូនេះ ព្រះតេយជគុណ ឃឹម សំអឿន មាន​សង្ឃ​ដីការទាំងកំហឹងថា «លោកហ៊ុន សែន នាមជាសម្តេច ជាអ្នកសម្រេចការងារ ក្នុងនិងក្រៅប្រទេស តែធាតុ​ពិត​មិនបានបំរើឆន្ទៈរាស្រ្ត និងប្រជាពលរដ្ឋ មិនបានសំរេចកិច្ចការអ្វី អោយប្រជាពលរដ្ឋខ្មែរបានសុខនោះទេ មានតែ​យកកាណុងកាំភ្លើងមកភ្ជង់ខ្មែរ និងបង្ហាញអំណាចថាខ្លួនខ្លាំងតែប៉ុណ្ណោះ។ តើការដឹកនាំបែបផ្តាច់ការ និងការ​អភិវឌ្ឍន៍​ដែលបណ្តេញប្រជាជនវាត្រឹមត្រូវដែរឬទេ? បើមិនត្រឹមត្រូវទេ សូមចាកចេញទៅជាប្រញាប់។»

ជាមួយនឹងឃ្លាថា «សុំបិណ្ឌបាតញោម ហ៊ុន សែន អើយ ចុះចេញទៅ» ព្រះតេជគុណអះអាងទៀតថា «យើងទាំង​អស់គ្នាមិនគាំទ្រ មិនត្រូវការគោលនយោបាយ របស់អគ្គមហាសេនាបតី ស៊ីទឹក ស៊ីដី នោះទេ។កំហុសដែលពួក​លោកឯងនេះ ងាកទៅរកនរក ប្រេត សូមចុះចេញទៅ ពួកយើងលែង​ត្រូវការ​ហើយ បើដឹកនាំពីបាតដៃទទេ ទៅរក​បាត​ដៃទទេគ្មានខ្លឹមសារនោះទេ»៕

រូបបន្ថែមពីការតវ៉ានៅមុខសាលារាជធានី៖

----------------------------------------------
ដោយ ៖ ក. ចាន់នីតា - ភ្នំពេញ ថ្ងៃទី២៤ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ