ប្រធានសហភាពការងារកម្ពុជា (ស៊ីខាវឌូ) បានច្រានចោលសេចក្តីសម្រេច របស់ក្រសួងការងារ ដែលបានធ្វើការ​ពិភាក្សានាព្រឹកថ្ងៃទី២៤ ខែធ្នូនេះថា គ្រាន់តែជានីតិវិធីតែប៉ុណ្ណោះ ព្រោះថាក្រសួងមួយនេះមានគោលជំហរ និង​បាន​ធ្វើការសម្រេចរួចមុនការពិភាក្សាគ្នានេះទៅហើយ ក្នុងតម្លើងប្រាក់ខែសម្រាប់កម្មករ សម្រាប់ប្រាក់បៀរវត្សកម្មករ​អាណត្តិទីប្រាំនេះ។

លោក អាត់ ធន់ (ខាងឆ្វេង) ក្នុងអង្គប្រជុំសម្រេចការតម្លើងប្រាក់បៀវត្សកម្មករ នៅក្រសួងការងារថ្ងៃទី២៤ខែធ្នូ ឆ្នាំ២០១៣។ (រូបថត MONOROOM.info/ O. Vary)

ការងារ - លោក អាត់ ធន់ ប្រធានសហភាពការងារកម្ពុជា (ស៊ីខាវឌូ) បានផ្តល់កិច្ចសម្ភាសជាមួយអ្នកសារព័ត៌មាន បន្ទាប់ពីបញ្ចប់នៃកិច្ចប្រជុំនាព្រឹកថ្ងៃទី២៤ ខែធ្នូ នាទីស្តីការក្រសួងការងារនេះថា មិនមែនជាកិច្ចប្រជុំពិភាក្សា ក្នុង​ការស្វែងរកដំណោះស្រាយសម្រាប់ប្រាក់ខែកម្មករនោះទេ តែជាការសម្រេចឈរលើគោលជំហររបស់ក្រសួង និង​តំណាងនិយោជកប៉ុណ្ណោះ។

មន្រ្តីសហជីពរូបនេះបានពន្យល់យ៉ាងដូច្នេះថា ក្នុងកិច្ចប្រជុំនេះភាគីខាងក្រសួងដែលមានគ្នារហូតដល់១១នាក់នោះ រួមទាំងរដ្ឋមន្រ្តីក្រសួងការងារលោក អ៊ិត សំហេង ផងនោះ ហាក់បីដូចជាមានទំនោរទៅខាងនិយោជក (ក្រុមហ៊ុន) ព្រោះម្នាក់ៗបានលើកឡើង ផ្តោតសំខាន់ទៅលើប្រយោជន៍និយោជក ខ្លាចតែនិយោជកទាំងនោះដក​ហ៊ុនចេញពី​កម្ពុជា ហើយជំរុញឲ្យភាគីតំណាងកម្មករត្រូវចេះថ្លឹងថ្លែង គិតពិចារណា មុននឹងសម្រេចចិត្តទាមទារប្រាក់ខែដែល​ពួកគេគិតថាមិនអាច​ទៅរួច។

១១សម្លេងពីខាងក្រសួង !

លោកបានបន្តថា ក្នុងនោះក៏មានតំណាងនិយោជក (ក្រុមហ៊ុន) ចំនួនប្រាំពីរនាក់ទៀត ដែលអាចនាំឲ្យមានសម្លេង​រហូតដល់១៨សម្លេង។ ដោយឡែកសហជីពតំណាងឲ្យកម្មករ មានតែប្រាំពីរសហជីព ក្នុងនោះមានសហជីព​ចំនួន​ប្រាំ ដែលបានគាំទ្រលើការសម្រេចនេះ។ លោកបន្ថែមថា មានតែសហជីពពីរប៉ុណ្ណោះដែលមិនគាំទ្រ គឺសហភាព​ការងារកម្ពុជា (ស៊ីខាវឌូ) ដែលដឹកនាំដោយរូបលោក និងសហព័ន្ធសហជីពជាតិ នៃឧស្សាហកម្មវាយនភណ្ឌ​កាត់​ដេរ​កម្ពុជា ដែលដែកនាំដោយ អ្នកស្រី ម៉ម ញឹម។

សហភាពការងារកម្ពុជា (ស៊ីខាវឌូ) បន្តរថា សរុបទៅសម្លេងដែលគាំទ្រឲ្យកម្មករទទួលបានប្រាក់បន្ថែមចំនួនតែ១៥ ដុល្លានោះ មានច្រើនលើសលុបរហូតដល់២៣លើ២៥សម្លេង។ លោកបានបន្តរថា ការសម្រេចខាងលើនេះ ជាការ​រៀចំទុកជាមុនរបស់ក្រសួង ដោយលោកបានសម្តែងនូវការភ្ញាក់ផ្អើលថា «ការស្រាវជ្រាវមានរយៈពេលវែង។ តាម​ការស្រាវជ្រាវនោះ ឃើញថាការចំណាយរបស់កម្មករជាប្រចាំខែ មានចំនួន១៥៧ដុល្លា ទៅ១៦៧ដុល្លា។ ហើយ​ពួកគាត់ (កម្មករនិយោជិក) មានប្រាក់ខែអប្បរមានតែ៨០ដុល្លាទេ។ ដល់ពេលសម្រេចបន្ថែមប្រាក់ខែនោះ បែរជា​ដាក់ចេញនូវចំនួន១៥ដុល្លា ១៥ដុល្លា ១៦ដុល្លា ១៧ដុល្លា ១៧ដុល្លា នេះមិនមានការជជែកគ្នានោះទេ ដាក់ហើយ​លើកដៃសម្រេចតែម្តង។ ខ្ញុំគិតថា នេះជាការរៀបចំទុកជាមុន ក្នុងការសម្រេចនេះតែម្តង។»

សម្រាប់តំណាងនិយោជក (ក្រុមហ៊ុន) លោក ណាង សុធី បានផ្តល់កិច្ចសម្ភាសជាមួយអ្នកសារព័ត៌មានយ៉ាងខ្លីថា «យើងមករកស៊ីនៅក្នុងប្រទេសនេះ ដោយឈរលើគោលការណ៍ច្បាប់ដែលមាន ទើបរឹងមាំ។ ដូច្នេះ ធ្វើយ៉ាងណា​ត្រូវគោរពតាមច្បាប់។»

ដោយឡែក លោក សោម អូន បានពន្យល់ចំពោះការលើកដៃគាំទ្រនៃការសម្រេចនេះថា «តាមស្ថានភាពសេដ្ឋកិច្ច​ល្អប្រសើរ ដូច្នេះការជំរុញឲ្យបាន១៥ដុល្លា រហូតដល់១៦០ដុល្លា។ លក្ខណៈពិសេសមួយទៀត ចំនួនដែលឡើងនេះ បូកបន្ថែមជាមួយប្រាក់ដែលមានស្រាប់។ (…) ដើម្បីឲ្យមានឧស្សាហកម្មធុនធ្ងន់ ដែលមានទុនច្រើនចូលមក។ ព្រោះ​អាចផ្តល់ឲ្យប្រាក់ខែដល់កម្មករច្រើនជាងនេះ។ (…) គោលការណ៍លិទ្ធិប្រជាធិបតេយ្យ គោរពតាមមតិភាកច្រើន។»

«ទទួលយកអានេះសិនទៅ...»

ជាចុងក្រោយនៃកិច្ចប្រជុំពិភាក្សានេះលោក អ៊ិត សំហេង រដ្ឋមន្ត្រីក្រសួងការងារ បណ្តុះបណ្តាលវិជ្ជាជីវៈ ទំនងជា​ដឹង​នូវតម្រុយខ្លះៗ ដែលអាចមានបាតុកម្មប្រឆាំង ដោយការមិនលើកដៃគាំទ្ររបសើលោក អាត់ ធន់។ ដូចនេះហើយ ទើបលោកបានធ្វើការព្រមានថា «សូមអំពាវនាវកុំឲ្យយកបញ្ហានេះ បង្កឲ្យមានភាពស្មុកស្មាញដល់ប្រទេសជាតិ និង​រំខានដល់កម្មករកម្មការនីរបស់យើង។ ទទួលយកអានេះសិនទៅ អ្វីដែលធ្វើបាននេះ ជាការបានកម្រៃ​ទៅមុខ​ហើយ។ បើយើងទារឲ្យបានដូចចិត្តយើងតែម្តង ជារឿងមួយពិបាកណាស់។ (…) អ្នកណាក៍ចង់ឲ្យច្រើនដែរ យើងធ្វើ​តាមលទ្ធភាព មួយជំហានម្តងៗ។ (…) ការធ្វើបាតុកម្ម កូដកម្ម ទូទាំងប្រទេស វាគ្មានប្រយោជន៍អ្វីសម្រាប់​កម្មករ​និយោជិក សម្រាប់ផលិតកម្ម ក៏ដូចជាសេដ្ឋកិច្ចជាតិយើង និងសម្រាប់ជីវភាពរបស់កម្មករកម្មការនីយើងទេ៕»

----------------------------------------------
ដោយ៖ អ៊ុម វ៉ារី - ភ្នំពេញថ្ងៃទី២៤ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ