អ្នកដែលនិយាយពី«ការបំបាត់»រាជានិយម នៅចក្រភពអង់គ្លេស អាចនឹងមានទោសជាប់ពន្ធនាគារ ... បើសូម្បី​ជន​នោះ ប្រើប្រាស់ពាក្យនេះជាការលេងសើចក៏ដោយ។

ព្រះ​មហាក្សត្រីយ៉ានី អលីហ្សប៊េដ ២ នៃចក្រភពអង់គ្លេស។ (រូបថត ឯកសារ)

រាជានិយម - រាជធានីឡុងដ៍នៃចក្រភពអង់គ្លេស បានរំលឹកឡើងវិញ ពីរាល់ការថ្លែងឬការអំពាវនាវណាក៏ដោយ ដែលនិយាយ​ដល់«ការបំបាត់»រាជានិយម នៅក្នុងប្រទេស នឹងត្រូវចាត់ទុកជានិច្ចកាល ថាជាបទល្មើសដែលត្រូវ​ទទួលទោសជាប់ពន្ធនាគារមួយជីវិត។ ការរំលឹកនេះបានធ្វើឡើង នៅក្រោយពេលមានការភ្លេចភ្លាំងមួយ ត្រូវបាន​ដាក់​បញ្ចូលដោយចៃដន្យ ទៅក្នុងច្បាប់ថ្មីដែលរដ្ឋាភិបាលអង់គ្លេស ត្រៀមនឹងដាក់ផ្សាយនៅខែឧសភាខាងមុខ។

ច្បាប់ថ្មីនោះបានកំណត់ពី«ការលែងចាត់ទុក»ថាជាបទល្មើស ទៅក្នុងបញ្ជីមួយមានចំនួន ៣០៩ករណី ហើយបាន​រាប់បញ្ចូលទាំងករណីមួយ ដែលមានចែងក្នុងជំពូកទីបី នៃច្បាប់ «Treason Felony Act» ឆ្នាំ១៨៤៨ ដែលត្រូវ​បាន​គេលែងយកមកប្រើប្រាស់ ដើម្បីធ្វើការតាមដានចោទប្រកាន់ តាំងពីឆ្នាំ១៨៧៩មក។

កាលពីចុងសប្ដាហ៍មុនេះ ក្រសួងយុត្តិធម៌អង់គ្លេស បានទទួលស្គាល់ថាមានកំហុសដោយអចេតនា។ ក្រសួងបាន​បញ្ជក់សារជាថ្មីថា បទ​ល្មើសដែលក្បត់នឹងរាជានិយម មិនត្រូវបានលប់ចេញពីគោលការណ៍ច្បាប់ទាំងឡាយ របស់​ចក្រភពនោះទេ។ អ្នកនាំពាក្យរបស់ក្រសួង បានថ្លែងអះអាងប្រាប់អ្នកសារព័ត៌មានថា «ជំពូកទីបី នៃច្បាប់«Treason Felony Act» ឆ្នាំ១៨៤៨ មិនត្រូវបាន​លើកលែងទេ»។

អត្ថបទសរសេរនៅក្នុងច្បាប់នោះបានចែងថា ជានិច្ចកាល វាជាលទ្ធភាពដែលត្រូវបានដាក់ទោស ក្នុងពន្ធនាគារ​រហូតមួយជីវិត ដោយគ្រាន់តែបាន«ស្រម័យ»ចង់ផ្ដួលរំលំ រាជបល្លង្គនៃចក្រភព ឬប្រកាសសង្គ្រាមប្រឆាំង​នឹង​ព្រះ​មហាក្សត្រីយ៉ានី អលីហ្សប៊េដ (Elizabeth) ២។ ច្បាប់នេះបានដាក់សុពលភាពរបស់ខ្លួន ទៅគ្រប់ជនណាក៏ដោយ ទាំងនៅក្នុងឬនៅក្រៅរាជាណាចក្រ។ «ជនជាប់ពិរុទ្ធទាំងឡាយ អាចនឹងត្រូវនិរទេសខ្លួនតាមសមុទ្រ រហូតមួយ​ជីវិត»។

កាលពីឆ្នាំ២០០១ តំណាងរាស្ត្រអង់គ្លេសជាច្រើននាក់បានគិតថា ច្បាប់នេះបានកំណត់ពីការដាក់ទោសទណ្ឌមួយ តាមបែបអន្តរសម័យកាល ដែលមិនបានឆ្លើយតបទៅនឹងប្រព័ន្ធច្បាប់ នៃសម័យកាលទំនើបនេះទេ។ ប៉ុន្តែអ្នក​តំណាងរាស្ត្រទាំងនោះ នៅតែចង់កំណត់ថា រាល់បំណង់ចង់បំបាត់រាជបល្ល័ង្គនៃជនណាក៏ដោយ ឲ្យស្ថិតនៅជា​បទ​ល្មើសដដែល៕

--------------------------------------------------
ដោយ ៖ ឈូករ័ត្ន - ប៉ារីស ថ្ងៃទី១៧ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ