ក្បួនយាត្រារបស់ប្រជាពលរដ្ធដែលមកពីគ្រប់ទិសទី ដែលបានធ្វើធម្មយាត្រា ដើរថ្មើរជើងចាប់ពីខេត្តកំពតមក រហូតដល់រាជធានីភ្នំពេញ ប្រើអស់រយៈពេលដប់ថ្ងៃ បានបញ្ឃប់សកម្មភាពរបស់ខ្លួន ត្រង់គោលដៅមុខរដ្ធសភា នៅថ្ងៃទី១០ ខែធ្នូឆ្នាំ២០១៣នេះ។ ក្រោយពេលញាត្តិរបស់គាត់ មិនត្រូវបានទទួលយក ពីសំណាក់តំណាងរាស្រ្ត​ឬសមាជិកណាម្នាក់នៃរដ្ឋសភានោះ ក្រុម​សមាជិកទាំងអស់នៃក្បួនក្រុមយាត្រា ត្រូវបានបំបែកគ្នាទៅ​កាន់​គោលដៅ​ផ្សេងៗ​គ្នាវិញ នាម៉ោងប្រហែល១២ថ្ងៃ​ត្រង់។

រដ្ឋសភាជាតិ នៃព្រះរាជាណាចក្រកម្ពុជា មើលពីខាងក្រៅ។ (រូបថត wikimedia.org)

ធម្មយាត្រាសិទ្ធិមនុស្ស - អ៊ំប្រុសម្នាក់អាយុប្រហែល៣០ឆ្នាំ បានប្រាប់ពីមូលហេតុនៃការរំសាយក្បួន​អបអរសិទ្ធិ​មនុស្សនេះថា ដោយសារពួកគាត់មានការនឿយហត់ខ្លាំង ក្នុងការដើរពីខេត្តកំពតមកទីក្រុងភ្នំពេញនេះអស់១០ថ្ងៃ។ ម្យ៉ាងវិញទៀត ញាត្តិរបស់គាត់មិនត្រូវបានខាងភាគីណាមួយ មកទទួលយកទៀតនោះ ទើបនាំគ្នារំសាយ។

អ្នកទទួលខុសត្រូវម្នាក់ខាងសមាគមប្រជាធិបតេយ្យ បានផ្តល់បទសំភាសន៏ថា គាត់មានការខកបំណងយ៉ាងខ្លាំង នាពេលក្រុមក្បួនយាត្រារបស់គាត់ ខិតខំដើម្បីយកញាត្តិមក ប៉ុន្តែមិនត្រូវបាន ខាងភាគីណាមួយមកទទួល​យក​ដូច្នេះ។ ទោះបីយ៉ាងណា គាត់នឹងខិតខំធ្វើការផ្សព្វផ្សាយញាត្តិទាំងនេះ តាមប្រពន្ឋ័ផ្សព្វផ្សាយផ្សេងៗ របស់សង្គម​ស៊ីវិល និងតាមរយៈអ៊ីធឺណែត។

រដ្ឋសភាឈប់សម្រាក

ទាក់ទងនឹង ការដាក់ពាក្យបណ្ដឹង ឬញត្តិរបស់ពលរដ្ឋអ្នកធ្វើធម្មាយាត្រាទាំងនេះ លោក ជាម យៀម តំណាងរាស្ត្រ​មកពី​គណបក្សប្រជាជនកម្ពុជា ដែលកាន់អំណាចសព្វថ្ងៃ និងជាសមាជិកជាន់ខ្ពស់មួយរូប​នៃរដ្ឋសភាកម្ពុជា បាន​ប្រាប់ទស្សនាវដ្តីមនោរម្យព័ងទាំងហ្វូ ថា រដ្ធសភាមានគណកម្មាការទីមួយ តំណាងដោយ លោកញ៉ែម ថាវី ជាអ្នក​ទទួលពាក្យបណ្តឹងទាក់ទងនឹងសិទ្ធមនុស្សនេះ។ ប៉ុន្តែការមិនទទួលយកញាត្តិថ្ងៃនេះ លោក​បានលើកមូលហេតុថា ដោយសារតែជាថ្ងៃឈប់សម្រាក គ្មានអ្នកធ្វើការ ទើបមិនមានការទទួលញាត្តិនេះ។ ប៉ុន្តែ​បើពួកគាត់យកញាត្តិមក​ដាក់​នាថ្ងៃធ្វើការ ខាងរដ្ធសភានឹងទទួលយកញាត្តិរបស់ពួកគាត់ដូចធម្មតា។

ចំណែក លោក ញ៉ែម ប៉ុញ្ញាឫទ្ធិ អ្នកនាំពាក្យខាងគណបក្សសង្គ្រោះជាតិ បានថ្លែងប្រាប់ ទស្សនាវដ្តីថា រូបលោក​បាន​ដឹងពីក្បួនធម្មាយាត្រាមួយផ្នែក មានគោលបំណងយកញាត្តិនេះទៅដាក់រដ្ធសភា ប៉ុន្តែខាងលោក ជាគណបក្ស​សង្គ្រោះ​ជាតិមិនបានទៅកាន់រដ្ធសភាទេ។ លោកបញ្ជាក់មូលហេតុថា ដោយសារតែខាងគណបក្សសង្គ្រោះជាតិ មិនទាន់ចូលក្នុងសភាឯកបក្ស ហើយក៏គ្មានគម្រោងចូលសភាឯកបក្សនោះដែរ ទើបសមាជិកតំណាងរាស្ត្រ​របស់​គណបក្សសង្គ្រោះជាតិ មិនបានទទួលញាត្តិនេះ។ ចំណែកខាងគណបក្សគាត់បានដឹងដំណឹងនេះ តាមរយៈប្រព័ន្ធ​ផ្សព្វផ្សាយ។

លោកបានថ្លែងបន្ថែមថា ព្រឹកមិញមានមួយក្រុមមួយបានយកញាត្តិនេះ មកឲ្យគណបក្សសង្គ្រោះជាតិ នៅទីលាន​ប្រជាធិបតេយ្យ​ដែរ ប៉ុន្តែទោះបីយ៉ាងណា ខាងលោកនៅមិនទាន់ដឹងថាតើខាងណាជាអ្នកយកមកនៅឡើយ។ ទោះ​បីយ៉ាងណា លោក ញ៉ែម ប៉ុញ្ញាឫទ្ធិ បានបញ្ជាក់ថា បើខាងក្បួនធម្មាយាត្រាណាមួយ មានបំណងយកញាត្តិ​នោះមក​ឲ្យ អាចយកមកខាងទីលានប្រជាធិបតេយ្យបាន ឬទីស្នាក់ការគណបក្សក៏បាន៕

-----------------------------
ដោយ៖ ក. សេងហុង - ភ្នំពេញ ថ្ងៃទី១០ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ